නීති විරෝධී ලෙස ඉන්දියාවට ඇතුළුවීමේ චෝදනාව යටතේ දැනට එරට ආරක්ෂක අංශ මඟින් අත්අඩංගුවට ගෙන බන්ධනාගාරගත කර සිටින ජනිත් මධුසංඛ නොහොත් ‘පොඩි ලැසීට’ නීති උපදෙස් සහ ඇප ලබා ගැනීමට අවශ්‍ය සහාය ලබාදීමට නීතිඥවරුන් දෙදෙනකු ඊයේ (18) පස්වරුවේ කටුනායක ගුවන් තොටුපොළෙන් ඉන්දියාව බලා පිටත්ව ගියහ.
ගුවන්තොටුපොළේදී මාධ්‍යට අදහස් දැක්වූ එම නීතිඥවරුන්, ‘පොඩි ලැසී’ ට එරෙහිව ඉන්දියාවට නීතිවිරෝධී ලෙස ඇතුළුවීම පිළිබඳ චෝදනාවක් පමණක් එල්ල වී ඇති බවත්, ඔහුට ඒ සඳහා අවශ්‍ය නීති උපදෙස් ලබා දෙමින් ඇප ඉල්ලීමට තමන් කටයුතු කරන බවත් පැවසීය. ශ්‍රී ලංකාවේ පොලීසියට ‘පොඩි ලැසී’ සෙවීමට අවශ්‍ය කරන චෝදනා කිසිවක් නැති අපරාධ සඳහා නම් වී ඇති සැකකරුවකු නොවන බවද ඔවුහු පැවසූහ.
එමෙන්ම ඔහුට එරෙහිව ශ්‍රී ලංකාවේ අධිකරණ කීපයකම නඩු ගණනාවක් විභාග වෙමින් පවතින අතර, ඒ කිසිදු නඩු කටයුත්තක් සඳහා ඔහුට එරෙහිව වරෙන්තු නිකුත් වී නොමැති බවත්, තමන් එම නඩු කටයුතු සඳහා අවශ්‍ය සහාය දක්වන බවත් එම නීතිඥවරුන් දෙදෙනා පැවසීය.
මෙම නඩුව ලබන 21 වැනිදා ඉන්දියාවේ මුම්බායි නුවර තානේ (Thane) අධිකරණයේ දී විභාග වීමට නියමිතය.
