ඉදිරි පළාත් පාලන මැතිවරණයට නාමයෝජනා පත්‍ර බාරදීමට ගිය අපේක්ෂකයකු කුරුණෑගල දිස්ත්‍රික් සහකාර මැතිවරණ කොමසාරිස් හරේන්ද්‍ර රත්නායක මහතාගේ රාජකාරියට බාධා කිරීමේ සිද්ධියක් සම්බන්ධයෙන් ඊයේ (18) පස්වරුවේ ඔහුව අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ කුලියාපිටිය ප්‍රාදේශීය සභාවේ පොදුජන පෙරමුණේ හිටපු සභාපතිවරයා වූ සම්පත් කැටවලගෙදර නමැත්තාය.
ශ්‍රී ලංකාවේ සමාජවාදී පක්ෂය යටතේ බැලූනය ලකුණින් ඔහු මෙවර මැතිවරණය සඳහා කුලියාපිටිය ප්‍රාදේශීය සභාවට ඉදිරිපත් වීමට නියමිත අපේක්ෂකයෙකි.
මැතිවරණය සඳහා එම පක්ෂයේ නාමයෝජනා පත්‍ර බාර දීමට කුරුණෑගල දිස්ත්‍රික් ලේකම් කාර්යාලය වෙත ගිය අවස්ථාවේදී කුරුණෑගල දිස්ත්‍රික් සහකාර මැතිවරණ කොමසාරිස් හරේන්ද්‍ර රත්නායක මහතා ඉදිරියේ කලහකාරී ලෙස හැසිරීම හේතුවෙන් මැතිවරණ කොමසාරිස්වරයා විසින් කරන ලද පැමිණිල්ලක් මත එම අපේක්ෂකයා සැකපිට අත්අඩංගුවට ගෙන තිබේ.
එම පක්ෂයේ නාමයෝජනා පත්‍ර කිහිපයක් බාර දීමට පක්ෂයේ මහ ලේකම්වරයා සමඟ ගිය අවස්ථාවේදී ඒවායෙහි දෝෂ පවතින බවට සහකාර මැතිවරණ කොමසාරිස්වරයා විසින් පෙන්වා දුන් අවස්ථාවේදී සැකකරු ඔහුට තර්ජනය කරමින් ආවේගශීලීව හැසිරී ඇති බව පොලීසිය සඳහන් කළේය.
අත්අඩංගුවට ගෙන සිටින සැකකරු අද (19) දිනයේදී අධිකරණයට ඉදිරිපත් කිරීමට නියමිත බව කුරුණෑගල මූලස්ථාන ප්‍රධාන පොලිස් පරීක්ෂක ධම්ම චන්නක මහතා කොබ්බෑවල පැවසීය.
