මිද්දෙණිය ගල්පොත්තයාය කඩේවත්ත මංසන්ධියේදී ‘මිද්දෙණියේ කජ්ජා’ සහ ඔහුගේ පුතු හා දියණිය ඝාතනය කිරීමේ අපරාධය මෙහෙයවූ බව කියන දැනට ඩුබායි රාජ්‍යයේ සැඟවී සිටින ‘තැඹිලි ළහිරු’ හා ‘බැකෝ සමන්’ යන දෙදෙනාට වලස්මුල්ල මහේස්ත්‍රාත් හා අතිරේක දිසා විනිසුරු නවෝදා කෝකු හැන්නදිගේ මෙණෙවිය ඊයේ (18) විවෘත වරෙන්තු නිකුත් කළාය.
ඒ මිද්දෙණිය පොලීසියේ ස්ථානාධිපති ප්‍රධාන පොලිස් පරීක්ෂක රෝහාන් වික්‍රමසේකර මහතා විසින් ත්‍රිත්ව ඝාතනයට අදාළව මහේස්ත්‍රාත් අධිකරණයට වැඩිදුර කරුණු වාර්තා කරමින් කරන ලද ඉල්ලීමක් සැලකා බැලීමෙන් අනතුරුවය.
ඉකුත් මස 18 වැනි දින රාත්‍රී 10.30ට පමණ යතුරුපැදියකින් ගමන් කරමින් සිටි පිය පුතු හා දියණිය ඝාතන කරවීම සඳහා ප්‍රධාන සැලසුම් සකස් කොට ඇත්තේ තැඹිලි ලහිරු හා බැකෝ සමන් බවට පොලිස් පරීක්ෂණවලදී අනාවරණය වී තිබේ.
මෙලෙස විවෘත වරෙන්තු නිකුත් කරනු ලැබුවේ මිද්දෙනිය කුඩගල් ආරේ පදිංචිව සිටි එදිරිසිංහ කම්කානන්ගේ ළහිරු මදුෂාන් හෙවත් ‘තැඹිලි ලහිරු’ හා මිද්දෙනිය උලහිටියාවේ පදිංචිව සිටි නැදුන් හේවගේ නිර්මල සංජීව හෙවත් ‘බැකෝ සමන්’ නමැති දෙදෙනාටය.
මෙම සැකකරුවන් දෙදෙනා දකුණේ ක්‍රියාත්මක මත්ද්‍රව්‍ය ජාවාරමේද ප්‍රබලයන් දෙදෙනෙකු වන බවත්, ඔවුන් දෙදෙනාට එරෙහිව අපරාධ රැසක් සම්බන්ධයෙන් චෝදනා ඇති බවට ද පොලීසිය අධිකරණයට කරුණු වාර්තා කර තිබේ.
මෙම ඝාතනයට සැකපිට ප්‍රධාන වෙඩික්කරු ඇතුළුව සැකකරුවන් 11 දෙනෙකු අත්අඩංගුවට ගෙන තිබේ.
