ඉගෙනුම ලබන අවධියේදී පෙම් සම්බන්ධතා ඇති කර ගැනීම නුසුදුසු බව පවසමින් පියා කළ අවවාද නොරිස්සූ දැරියක් සිය දිවි හානි කරගත් ශෝචනීය පුවතක් මුල්ලේරියාව ප්‍රදේශයෙන් වාර්තාවේ.
මෙලෙස මියගොස් ඇත්තේ 14 හැවිරිදි දැරියකි. ඇය 10 වැනි ශ්‍රේණියේ ඉගෙනුම ලබමින් සිටි පාසලේ දිප්තිමත් ශිෂ්‍යාවකි. මෙම අවාසනාවන්ත සිද්ධිය සිදුව ඇත්තේ පාසල් නිවාඩු කාලයේ සිය නැගණියන් දෙදෙනා සමඟ නි‍ෙවසේ සිටින අතරතුරේදිය.
ඇය ගායනය, වාදනය, නර්තනය ආදි අංශයන්ගෙන් දක්ෂතා දක්වමින් ඉදිරියෙන්ම සිටි පාසලේ දීප්තිමත් සිසුවියක් බව විදුහලේ ආචාර්ය මඬුල්ල පැවසූහ. සමස්ත ලංකා ජයග්‍රහණ රැසක්ම ලබා දෙමින් විදුහලට කිර්තියක් අත්කර දීමට ඇය සමත්ව තිබේ. ඇයගේ මව ජිවිකාව ලෙස ස්වයං ව්‍යාපාරයක් ලෙස වඩේ විකිණීම කරගෙන ගොස් ඇත. මවගේ යෙහෙළියක් එම ආසන්නයේ වෙසෙන අතර ඇය නිතර නිතර එම නිවසට ගොස් ඇත. ශිෂ්‍යාව එම නිවසේ වෙසෙන පාසල් සිසුවකු සමඟ හිතවත්කමක් ඇති කරගෙන තිබුණි. ඒ බව ඇයගේ මවුපියන් හට දැනගැනීමට ලැබිමෙන් පසු ඔවුන් ඇයට නිතර අවවාද කර තිබුණි. සිද්ධිය වූ දිනයේ ද පියා විසින් ඉගෙන ගන්න වයසේ මෙවැනි සම්බන්ධතා නතර කර දමන මෙන් අවවාද කර ඇයට අතින් පහරක් ගසා ඇත. පසුව පියා වැඩට ගිය අවස්ථාවේ ඇය සියදිවි හානිකරගෙන තිබේ.
මරණ පරික්ෂණය කොළොන්නාව හදිසි මරණ පරීක්ෂක කාංචනා විජේනායක මහත්මිය ඉදිරියේ පවත්වා ඇත. එහිදී මෙම දියණියගේ මවත් පියාත් සාක්ෂි ලබා දුන්හ.
කොළොන්නාව හදිසි මරණ පරික්ෂක කාංචනා විජේනායක මහත්මිය මෙසේ ද පැවසුවාය.
“දරුවන් යන්නේ කොහෙද, කරන්නේ මොනවද කියලා මවුපියන් හොයන්න ඕනැ, නිතර අවධානයෙන් ඉන්න ඕනැ. එහෙම අවධානයෙන් හිටිය නම් මේ වගේ අවාසනාවන්ත සිදුවිම් වළක්වා ගන්න තිබුණා. මවුපියන් මිට වැඩිය දරුවන් ගැන හොයාබලන්න ඕනෑ. මේ අකාලයේ අහිමිව යන්නේ රටේ වටිනා සම්පත්.”
