සාවද්‍ය තොරතුරු සහ අපහාසාත්මක ප්‍රකාශ නිකුත් කිරීම වැළැක්වීමේ අරමුණින් යුතුව පාකිස්තාන රජය විසින් සයිබර් අපරාධ නීතිය සංශෝධනය කරනු ලැබීම ජාත්‍යන්තර මාධ්‍ය ආයතනයේ විවේචනයට ලක්වී ඇතැයි විදෙස් මාධ්‍ය වාර්තා කරයි. නව සංශෝධන මගින් සයිබර් අවකාශය විමර්ශනය පුළුල් කිරීමට සහ වාරණය කිරිමට පාකිස්තාන රජයට වැඩි බලයක් ලැබී ඇති බවට චෝදනා එල්ල වී ඇතැයි ද විදෙස් මාධ්‍ය වැඩිදුරටත් වාර්තා කරයි.
නව සංශෝධන තුළින් රජයට එරෙහි විවේචන මැඬ පැවැත්වීමටත්, ප්‍රතිවාදී දේශපාලකයන් සහ සිවිල් සමාජ ක්‍රියාකාරීන්ට එරෙහිව කටයුතු කිරීමට පාකිස්තාන රජයට අවස්ථාව ලැබී ඇති බවත් විදෙස් මාධ්‍ය සඳහන් කරයි.
ඩිජිටල් අවකාශය වෙත මුදා හරිනු ලබන ප්‍රවෘත්ති සහ ඡායාරූප නිරීක්ෂණය කිරීම සහ වාරණය කිරීම තුළින් සයිබර් නීති සංශෝධනයෙන් පාකිස්තාන රජයට වාසිදායක තත්ත්වයක් නිර්මාණය වී ඇතැයි එරට මාධ්‍යවේදීන් චෝදනා කර තිබේ. සයිබර් අපරාධ මැඬලීමට නීති සකස් කිරීම වර්තමානයේදි ජාත්‍යන්තර වශයෙන් අත්‍යවශ්‍ය කරුණක් වුවත් පාකිස්තානයේ සයිබර් නීති සංශෝධනය මාධ්‍යවේදින්ට, සමාජ ක්‍රියාකාරීන්ට සහ සාමාන්‍ය ජනතාවට එරෙහිව අවියක් ලෙස භාවිත කිරීමට හේතු වනු ඇතැයි මාධ්‍යවේදීන් අතර බියක් පැතිරී ඇතැයි ද වාර්තා වේ.
