අමෙරිකාවේ වැඩිදුර අධ්‍යාපනය හැදෑරීමට පැමිණෙන චීන ශිෂ්‍යයන්ට වීසා බලපත් සීමා කිරීම සඳහා එරට රෙපබ්ලිකන් මන්ත්‍රීවරු කොංග්‍රසයට නව කෙටුම්පතක් ඉදිරිපත් කර ඇතැයි විදෙස් මාධ්‍ය වාර්තා කරයි. අමෙරිකාවේ ජාතික ආරක්ෂාව සැලකිල්ලට ගනිමින් චීන ශිෂ්‍ය වීසා වර්ග 3ක් සීමා කිරීම නව කෙටුම්පතට ඇතුළත් වී ඇති බවත්, එම කෙටුම්පතට ඩිමොක්‍රටික් මන්ත්‍රීවරුන්ගේ දැඩි විරෝධතා එල්ල වී ඇති බවත් විදෙස් මාධ්‍ය වැඩිදුරටත් වාර්තා කරයි.
උතුරු කැරොලිනා ප්‍රාන්තයේ ඇඩිසන් මැක්ඩොවෙල්, ටෙනේසි ප්‍රාන්තයේ ඇන්ඩි ඔග්ලේස්, පෙනිසිල්වේනියා ප්‍රාන්තයේ ස්කොට් පෙරී සහ ටෙක්සාස් ප්‍රාන්තයේ බ්‍රෙන්ඩන් ගිල් සහ ට්‍රෝයි නේල්ස්ගේ සහාය ඇතිව බටහිර වර්ජිනියා ප්‍රාන්තයේ නියෝජිත රීලි මුවර් විසින් නව කෙටුම්පත ඉදිරිපත් කර ඇතැයි විදෙස් මාධ්‍ය සඳහන් කරයි. එම කෙටුම්පතට අනුව විද්‍යා, තාක්ෂණය, ඉංජිනේරු සහ ගණිත අංශයෙන් වැඩිදුර අධ්‍යාපනය සඳහා අමෙරිකාවට පැමිණෙන චීන සිසුන්ගේ ශිෂ්‍ය වීසා දැඩි ලෙස සීමා කිරීමට නිර්දේශ කර ඇතැයි වාර්තා වේ.
