ලෝක ආර්ථිකයේ ප්‍රවණතා සම්බන්ධව අනාවැකි පළ කිරීමේ ප්‍රකට මූල්‍ය සමාගමක් වන අමෙරිකාවේ මෝගන් ස්ටැන්ලි බැංකු සමාගමේ වාර්තාවකට අනුව ලොව වඩාත්ම ඉල්ලුම ඇති පාරිභෝගික වෙළෙඳපොළ බවට ඉන්දියාව පත්වනු ඇතැයි අනාවැකි පළ වී ඇතැයි විදෙස් මාධ්‍ය වාර්තා කරයි. ඉන්දියාව වර්තමානය වන විට ගෝලීය බලශක්ති සංක්‍රමණයෙන් සහ ආර්ථික වර්ධනයෙන් ස්ථාවරත්වයක් පෙන්නුම් කර ඇති බවත්, එරට ජනගහන වර්ධනය සහ ප්‍රජාතන්ත්‍රවාදය එරට පාරිභෝගික වෙළෙඳපොළ ශක්තිමත් කිරීමට ඉවහල් වී ඇති බවත් මෝගන් ස්ටැන්ලි වාර්තාවේ සඳහන් වන බව විදෙස් මාධ්‍ය වැඩිදුරටත් වාර්තා කරයි.
මූල්‍ය හා මුදල් ප්‍රතිපත්තිය මෙන්ම සේවා අපනයනය ඉහළ මට්ටමක පවතින බැවින් දේශීය දළ නිෂ්පාදනයෙන් ඉන්දියාව 2025 මූල්‍ය වර්ෂයේදි 6.3% ක වර්ධනයක් ද, 2026 මූල්‍ය වර්ෂයේදී 6.5% ක වර්ධනයක් ද පෙන්නුම් කරනු ඇතැයි මෝගන් ස්ටැන්ලි වාර්තාව මගින් වැඩිදුරටත් අනාවැකි පළ කර තිබේ.
