ඊශ්‍රායල හමුදාව පෙරේදා රාත්‍රියේ සිට අඛණ්ඩව ගාසා තීරයට එල්ල කළ ගුවන් ප්‍රහාරමාලාවකින් පලස්තීනුවන් 400කට අධීක පිරිසක් ජීවිතක්ෂයට පත්වූ බව අල් ජසීරා පුවත් සේවය වාර්තා කළේය. පසුගිය ජනවාරියේ 19 වැනිදායින් පසු ගාසා තීරයේ සිදුවූ විශාලතම ප්‍රහාරය මෙය බව වාර්තා වේ. එම ගුවන් ප්‍රහාරය ඛාන් යුනිස් සහ රෆා නගර ඇතුළුව ගාසා තීරය පුරා එල්ල වී ඇති අතර, දරුවන් වැඩි ප්‍රමාණයක් ප්‍රහාරයෙන් මිය ගිය බව ගාසා
තීරයේ සෞඛ්‍ය අමාත්‍යාංශය නිවේදනය කළ බව අල් ජසීරා පුවත් සේවය වැඩිදුරටත් වාර්තා කළේය. මළසිරුරුවලින් ගාසා තීරයේ රෝහල්වල පිරී ඇති බවත්, තුවාලකරුවන් 562ක් රෝහල්ගත කර ඇති බවත් වාර්තා වේ.
මේ වන විට ගොඩනැඟිලි සුන්බුන්වලට යටවූවන් සොයා මෙහෙයුම් ආරම්භ කර ඇති අතර, පසුගිය ජනවාරි මස 19 වැනිදා ක්‍රියාත්මක වූ ඊශ්‍රායලය සහ හමාස් සංවිධානය අතර සටන් විරාම ගිවිසුමේ සති 6ක පළමු අදියර නිමාවෙන් පසු ආරම්භ වූ දෙවැනි අදියරේ සාකච්ඡා අසාර්ථක වීම ගුවන් ප්‍රහාරයට හේතු වී ඇතැයි ද වාර්තා වේ.
හමාස් සංවිධානය සිය හමුදා ශක්තිය වැඩි කරමින් සිටින බවත්, එය වැළැක්වීම සඳහා ගුවන් ප්‍රහාරය එල්ල කිරීම හැර වෙනත් විකල්පයක් නොතිබූ බවත් නිවේදනයක් නිකුත් කරමින් ඊශ්‍රායල අගමැති බෙන්ජමින් නෙතන්යාහුගේ කාර්යාලය ප්‍රකාශ කර තිබේ. දැනට ඉතිරිව සිටින ප්‍රාණ ඇපකරුවන් නිදහස් කිරීම හමාස් සංවිධානය විසින් ප්‍රතික්ෂේප කරනු ලැබීම ද ප්‍රහාරය එල්ල කිරීමට හේතු වූ බව එම නිවේදනයේ සඳහන් කර ඇතැයි වාර්තා වේ. හමාස් සංවිධානය සතුව තවත් ප්‍රාණඇපකරුවන් 59 දෙනකු සිටින බවත්, ඉන් 24 දෙනකු ජීවත්ව සිටින බවට තොරතුරු ලැබී ඇති බවත් ඊශ්‍රායලය ප්‍රකාශ කර ඇති අතර, ගාසා තීරයට නව ගුවන් ප්‍රහාර එල්ල කිරීම තෝරා ගැනීමෙන් ප්‍රාණ ඇපකරුවන් මුදා ගැනීම පිළිබඳ අදහස ඊශ්‍රායල රජය අත්හැර දමා ඇතැයි ප්‍රාණඇපකරුවන්ගේ පවුලේ සාමාජිකයන් රජයට දොස් පවරා ඇතැයි ද වාර්තා වේ.
