වේවැල්කඳුරට ජලයෙන් පීඩා
වැල්ලවාය ප්‍රා‍ෙද්ශීය ලේකම් කොට්ඨාසයට අයත් වැලිආර ප්‍රදේශයේ පිහිටි අලිකොටේ ඔයට අලිකොටේආර ජලාශයේ වැඩි වතුර නිදහස් කිරීමත් සමඟ අලිකොටේ ඔය හරහා වේවැල්කඳුර ගම්මානයට යාමට දමා ඇති සපත්තු පාලමට උඩින් නිරන්තරයෙන් ජලය ගලා යාම හේතුවෙන් එම ගම්මානයේ පදිංචි ජනතාව ගැටලු රැසකට මුහුණ දී සිටිති.
සපත්තු පාලමට උඩින් නිරන්තරයෙන්ම ජලය ගලා යාම හේතුවෙන් විශේෂයෙන්ම මල්වත්තාවල ජාතික පාසල, කුමාරදාස විද්‍යාලය ඇතුළු අවට ඇති විවිධ පාසල් කරා යන දරුවන් මෙන්ම රැකියා සඳහා යන පිරිස් මෙන්ම එදිනෙදා නගරයට පැමිණෙන පිරිසද දැඩි ලෙස අසරණ වී සිටිති.
අලිකොටේආර ජලාශයේ සිට මෙම සපත්තු පාලමට ඇති දුර මීටර් 200ක් පමණ වන බවත් ඒ තරම් ආසන්නයෙන් පිහිටි මෙම සපත්තු පාලම වෙනුවට ඉදිකළ යුතුව තිබුණේ සාමාන්‍ය පාලමක් බවත් පෙන්වා දෙන ගම්වාසීහු ඒ හේතුව නිසා මෙම ගම්මානයේ පදිංචි ජනතාව දෛනික ගමනාගමන කටයුතුවලදී නිරන්තරයෙන් විවිධ අසීරුතාවනට පත්වන බවත් කඩිනමින් මෙම ගැටලුව සම්බන්ධයෙන් වගකිවයුතු වාරිමාර්ග බලධාරින්ගේ අවධානය යොමු විය යුතු බවත් කියා සිටිති.
කුඹුරු වගාබිම් අක්කර 70කට අධික ප්‍රමාණයක් මෙම ගම්මානයේ පිහිටා ඇති අතර, ඒවායේ අස්වනු නෙළීමට යන්ත්‍ර සූත්‍ර පවා ගෙනයාමට මේ හේතුව නිසා නොහැකි වී ඇති අතර, ඒ හේතුවෙන් කුඹුරු වගා කළ ගොවීහු දැඩි ලෙස අසරණ වී සිටිති.
මෙම සපත්තු පාලමෙන් එගොඩ වූ ගමන් කුඹුරුයාය තිබුණ ද සපත්තු පාලමට උඩින් ජලය ගලා යාම හේතුවෙන් කිලෝමීටර් හතරක පමණ දුරක් යන්ත්‍ර සූත්‍ර ගෙන යාමට මේ හේතුව නිසා ඔවුන්ට සිදුවී තිබේ.
ගොවීන්ගේ පහසුව සඳහා කොසුවේ ජලය පිටාර ගලන විට ගමන් කිරීම සඳහා ඇළ දිගේ මාර්ගයක් සකස් කළද එය වැසිදාට මඩ වගුරක් වන බවත් ඒ මාර්ගය හරහා කුඹුරු ඉඩම්වලට පැමිණීමට කිලෝ මීටර් හතකට පමණ ආසන්න දුරක් පැමිණිය යුතු බවත් ගොවීහු කියා සිටිති. මේ නිසා ප්‍රදේශවාසීහු දැඩි අපහසුතාවට පත්ව සිටිති. එනිසා ප්‍රදේශවාසීන් ඉල්ලා සිටින්නේ මේ පිළිබඳව බලධාරින්ගේ අවධානය ඉක්මනින් යොමු විය යුතු බවය.
ජී.අයි.ආර්. ගරුසිංහ
වැල්ලවාය
පාදුක්ක කන්දබඩ මාර්ගය අබලන්
සීතාවක ප්‍රාදේශීය සභා බලප්‍රදේශයේ, පාදුක්ක මලගල හරහා හොරණ මාර්ගයත් පාදුක්ක මීරියගල්ල මාර්ගයත් සම්බන්ධ කෙරෙන උඩුමුල්ල අංගමුව මාර්ගයේ කන්දබඩ ප්‍රදේශය කාලයක සිට දැඩි ලෙස අබලන්ව පවතී.
මෙම මාර්ගයේ කොටසක් මීට වසර කිහිපයකට ඉහතදී කාපට් අතුරා සංවර්ධනය කරනු ලැබුවත් මාර්ගයේ අත්‍යවශ්‍යම කොටස වන මෙම වෙල්යාය මැදින් වැටී ඇති කොටසට වගකිවයුතු කිසිවකුගේ අවධානය නොමැති වීම නිසා, කිසිදු සංවර්ධනයක් නොකර වළවල් සෑදී ජලය පිරී ඇතැයි ඔවුහු පවසති.
මෙම මාර්ගය දෙපස විශාල ජනතාවක් පදිංචිව සිටින අතර, ඔවුන් පාදුක්ක නගරයටත්, පාසල් දරුවන් සහ රැකියාවන් සඳහා යන එන අයත් විශාල පිරිසක් මෙම මාර්ගයේ ගමන් කරනු ලබයි.
එලෙස ප්‍රදේශයේ ජනතාවට සම්පතක්ව පවතින මෙම මාර්ගයේ, හදිසි අවස්ථාවකට වාහනයක්වත් ධාවනය කළ නොහැකි තත්ත්වයේ පවතින කන්දබඩ ප්‍රදේශයේ මෙම කොටස, ඉදිරි කාලයකදී යථා තත්ත්වයට පත් කරන තෙක්, තාවකාලිකව ප්‍රදේශයේ ජනතාවගේ ප්‍රයෝජනය සඳහා සකස් කර දෙන මෙන් ඔවුහු වගකිවයුතු අංශවලින් ඉල්ලා සිටිති.
රෙක්සි වෙත්තසිංහ
පාදුක්ක
විදුලි සංඥා එළි දෙන්න
මාතර නගරයේ ප්‍රධාන බස් නැවතුම්පොළ ඉදිරිපිටට මාර්ග සංඥා විදුලි ආලෝක පද්ධතියක් අවශ්‍යය. මෙම ස්ථානයට විදුලි ආලෝක සංඥා නොමැති වීම විශාල අඩුපාඩුවකි. එම අඩුපාඩුව විශේෂයෙන් දැනෙන්නේ රථවාහන රියැදුරන්ටය.
මාතර ප්‍රධාන බස් නැවතුම ඉදිරිපිටට විදුලි ආලෝක සංඥා ක්‍රමය ඇති කිරීම අත්‍යවශ්‍යයි. රිය අනතුරු අවම කර ගැනීමට අවශ්‍ය කටයුතු කිරීම අදාළ වගකිව යුතු බලධාරින්ගේ යුතුකමකි.
එබැවින් මෙම ස්ථානයට විදුලි ආලෝක සංඥා පද්ධතියක් සවි කරන්නට කටයුතු කිරීමට වගකිව යුතු බලධාරින්ගේ අවධානය කඩිනමින් යොමු විය යුතුය.
වසන්ත ද සිල්වා.
වැලිගම
මිනිපේ දුන්ගොල්ලට බස් එකක් දෙන්න
දුන්ගොල්ල මාර්ගයේ පිහිටි අබලන් තත්ත්වයේ පවතින පැන්නුම් පාලම සංවර්ධනය කර ගමට බස් රථයක් ලබා දීමට පියවර ගන්නැයි ප්‍රවාහන ගැටලුවට වසර ගණනාවක සිට මුහුණ දෙන ගම්වාසීහු ඉල්ලා සිටිති. දුන්ගොල්ල ගම මිනිපේ ප්‍රාදේශීය ලේකම් කොට්ඨාසයේ හුදකලා වූ අතිදුෂ්කර ගම්මානයකි.
දුන්ගොල්ල ගමේ පාසල් දරුවන් 60 දෙනෙකු පමණ සිටිති. මේ අයගෙන් ගමේ ප්‍රාථමික පාසලේ දරුවන් 38 දෙනෙකු පහ වසර දක්වා අධ්‍යාපනය ලබන අතර පහ වසරෙන් ඉහළ පන්තිවල දරුවන් ගමේ සිට කිලෝ මීටර් දෙකහමාරක් පමණ දුරින් පිහිටි මීගොල්ල මහා විද්‍යාලය වෙත යති. ඔවුන් එම පාසලට යා යුතු වන්නේ පා ගමනෙන් වන අතර, මේ පා ගමන් මාර්ගය වැටී ඇත්තේ වනඅලි නිතර සැරිසරන වනාන්තරය මැදිනි. මේ නිසා දරුවකුට තනිවම යාමට නොහැකි නිසා අලියා ගැවසෙන කැලෑ ප්‍රදේශය නිමාවෙන ස්ථානය දක්වා එම දරුවා රැගෙන යෑමටත් පෙරළා ගෙන ඒමටත් වැඩිහිටියකුට ගමන් කිරීමට සිදු වේ. මෙයට වසර ගණනකට පෙර හසලක නගරයේ සිට දුන්ගොල්ල ගම දක්වා හසලක ඩිපෝව මඟින් බස් රථයක් ධාවනය කළද ගමට ආසන්නයේ තිබෙන ජල මාර්ගයක් හරහා ඉදිකර ඇති පාලමේ අබලන් තත්ත්වය හේතුවෙන් එම බස් රථය නතර කර දැමීමට එම ඩිපෝවට සිදුවිය. ගමට බස් රථයක් ධාවනය නොවීමට හේතුව අබලන් පාලම නිසා, එම පාලම ප්‍රතිසංස්කරණය කර නැවත බස් රථයක් ලබා දෙන ලෙස ගම්වැසියෝ ඉල්ලා සිටිති.
ඊ.එම්.එස්. ඒකනායක
හසලක
හිටපු ජනපති වරප්‍රසාද හා බහුජන පැතුම
2024 සැප්තැම්බර් 21 පැවති ජනාධිපතිවරණයෙන් විශිෂ්ට ජයග්‍රහණයක් ලබාගත් අනුර කුමාර දිසානායක මහතා, සාධාරණ ජනතා වරමකින් ජනාධිපති ධුරයට පත් වූ අතර, වහාම දූෂිතයන්ගෙන් සමන්විතව තිබූ පාර්ලිමේන්තුව විසුරුවා හරින ලදී. පාර්ලිමේන්තු මැතිවරණය 2024 නොවැම්බර් 14 වැනි දින විශාල ජනතා උද්‍යෝගයක් මධ්‍යයේ ඉතාම සාමකාමීව පැවැත්වුණි. එකී මැතිවරණයෙන් ද අතිවිශිෂ්ට ජයක් ලබාගත් ජාතික ජන බලවේගයට අලුත් පාර්ලිමේන්තුවේ මන්ත්‍රීවරු තනි පක්ෂයක් හැටියට 159ක් හිමිවිය. මේ අනුව ජනතාවට පොරොන්දු වූ අයුරින් කුඩා කැබිනට් මණ්ඩල‍යක් පත් කළ ජනාධිපතිවරයා රාජ්‍ය අමාත්‍යවරු වෙනුවට නියෝජ්‍ය ඇමැතිවරු ඉතාම අඩු සංඛ්‍යාවකට සීමා කර මැතිවරණ දෙ‍කකදීම ජාතික ජන බලවේගයේ ප්‍රතිපත්ති ප්‍රකාශනයේ සඳහන් කළ අයුරින් කඩිනමින් ජනතා සේවයට අවතීර්ණ විය. විපක්ෂයට හිමි වූ මන්ත්‍රීවරු 66 දෙනා සමඟ අන්ත පරාජයකට පත් වුණ බව දත් හිටපු මැති, ඇමැතිවරු සෑහෙන පිරිසක් මහජනයා ඉදිරියට යාමට නොහැකි නිසාම, එම පාර්ලිමේන්තු මැතිවරණයට ඉදිරිපත් නොවීය. මේ පිරිස පාර්ලිමේන්තු මැතිවරණයෙන් පසුව, ඉතාම නිහඬ පිළිවෙතක් අනුගමනය කරමින් සිට, නව ජනතා ආණ්ඩුවට මාස 02ක් යාමටත් පෙර, එම ආණ්ඩුව දැඩි ලෙස විවේචනය කරන්නට පටන්ගත් අතර, ජනතාව අපේක්ෂා කළ රටේ මුදල් කාබාසිනියා කළ පසුගිය පාලනයේ දූෂිතයන්ට එරෙහිව, මිනීමරුවන්ට එරෙහිව, හොරුන්ට එරෙහිව විමර්ශන කටයුතු කඩිනමින් සිදු වන බව පෙනී යාමෙන්, ඉමහත් කලබලයට, බියට පත්ව ඔවුන්ගේ දැඩි විරෝධය දක්වමින් අසත්‍යය කරුණු කාරණා විශාල ප්‍රමාණයක් දක්වන්නට විය. නමුත් මේ රටේ අනාගතය ගැන සිතා පත්කර ගත් ජාතික ජන බලවේගයේ ආණ්ඩුව පිහිටුවීමට තම වටිනා ඡන්දය පාවිච්චි කළ ජනතාව මේ දක්වාම ජාතික ජන බලවේග ආණ්ඩුව සමඟම සිටීම මේ රටේ වාසනාවකි. නමුත් පරාජය වූ හිටපු දූෂිත මැති, ඇමැතිවරු ඉතාම සුළු පිරිසක් දැනට පාර්ලිමේන්තුවේ සිටින මන්ත්‍රීවරුන් දෙතුන් දෙනෙක් එක්ව මෙම නව රජය පෙරළා දමන්නට හැකි යැයි මෝඩ බලාපොරොත්තුවෙන් කටයුතු කරනවා දැකීම, විහිළු සහගතය. එම අය අතර විශේෂයෙන් නාමල් රාජපක්ෂ, දිලිත් ජයවීර, විමල් වීරවංශ, ජොන්ස්ටන් ප්‍රනාන්දු, උදය ගම්මන්පිල, අනුර ප්‍රියදර්ශන යාපා, සුසිල් ප්‍රේමජයන්ත, ඩී.වී.චානක වැනි අය නම් වශයෙන් සඳහන් කළ හැකිය.
නමුත් මේ අය මොනතරම් කෑගැසුවද, වැඩිම වුණොත් අප්‍රේල්, මැයි වන විට පළාත් පාලන මැතිවරණවලින් ද ජාතික ජන බලවේගය අතිවිශිෂ්ට වූ ජයක් ලබාගත් පසුව, මේ පිරිස අනිවාර්යයෙන්ම නිහඬ වන අතර, සමහරුන්ට “මහඋළු ගෙදර”, ඉදිරි කාලය ගත කරන්නට සිදුවීම නොවැළැක්විය හැකිය. එය මේ රටේ බහුතර ජනතාවගේ බලාපොරොත්තුව හා එකම අපේක්ෂාවයි. ජාතික ජන බලවේගයේ පසුගිය මැතිවරණ ප්‍රකාශනයෙන් පොරොන්දු දුන් ආකාරයට දැනට දේශපාලනයෙන් විශ්‍රාම ගොස් මහජන මුදල් කෝටි ගණනින් වියදම් කරමින්, අසාධාරණ ලෙස සැප සම්පත් ලබන හිටපු ජනාධිපතිවරු, ජනාධිපතිවරියන් හා එම අයගේ අඹුවන් හා දරුවන් ද ඔවුනට ලබා දී ඇති විශ්‍රාම වැටුප්, රජයේ නිවාස, වරප්‍රසාද සියල්ල අහෝසි කිරීම, කඩිනමින් සිදු කළ යුතුමය. ලක්ෂ දෙසිය විස්සක් වූ අප ජනතාව මෙම පොරොන්දුව ඉටු වනු දැකීමට දෑස් දල්වාගෙන සිටියි.
දැනට සිදු වන මෙකී කතිකාවන් නිසා මේ වන විට ගෝඨාභය රාජපක්ෂ හිටපු ජනාධිපතිවරයා සහ හේමා ප්‍රේමදාස ජනාධිපති බිරිඳ තම රජයේ නිවාස භාරදී තිබීම අගය කළ යුතුය. නමුත් මහින්ද රාජපක්ෂ, මෛත්‍රීපාල සිරිසේන හිටපු ජනාධිපතිවරු දෙදෙනා සහ චන්ද්‍රිකා බණ්ඩාරනායක හිටපු ජනාධිපතිනිය මෙතෙක් එම නිවාස භාර දී නැත.
මාගේ මතකයේ හැටියට පසුගිය මැතිවරණවලදී ජාතික ජන බලවේගයේ වේදිකාවල මෙම හිටපු ජනාධිපතිවරු හා ජනාධිපතිවරි‍යගේ වරප්‍රසාද අහෝසි කරන බව ප්‍රකාශ වෙද්දී හිටපු ජනාධිපති චන්ද්‍රිකා බණ්ඩාරනායක මාධ්‍යවේදියකුගේ ප්‍රශ්නයකට පිළිතුරු වශයෙන් කීවේ එම යෝජනාව ඉතාම හොඳ කාලෝචිත වැඩක් බවය. එතුමිය ඒ ප්‍රකාශය කරන අවධියේදීම රජයේ නිවාස භාර දී ඉවත් වූවා නම්, බණ්ඩාරනායක නාමයට ද ගෞරවයකි. නමුත් එතුමිය ලක්ෂ විස්සක් ද, මහින්ද රාජපක්ෂ ලක්ෂ හතළිස් හයක් ද, මෛත්‍රීපාල සිරිසේන ලක්ෂ නවයක් ද ජනතා බදු මුදල් වැය කරමින්, එකී නිවාසවල රැඳී සිටීම හාස්‍යජනකය. හිටපු ජනාධිපති වරප්‍රසාද පනතක් නොපමාව පාර්ලිමේන්තුවට ඉදිරිපත් කර නීත්‍යනුකූලව ඉවත් කරන තුරු බලා නොසිට, ඉවත්වුවහොත් එම අයගේ සෞඛ්‍යයට ගුණදායකය. ජනාධිපතිවරු, අගමැතිවරු, මැති ඇමැතිවරු එන්නේ ස්වේච්ඡාවෙන් මේ රටේ ජනතාවට සේවය කිරීමට මිස, මේ ආකාරයට මහජන මුදලින් ජීවත් වීමට නොවන බව, තේරුම් ගන්නට බැරිවීම ඉතාම කනගාටුදායකය.
1948 නිදහස ලැබූවායින් පසුව, අප රටේ බිහි වූ ඩී.එස්.සේනානායක, ඩඩ්ලි සේනානායක, සර් ජෝන් කොතලාවල, එස්.ඩබ්ලිව්.ආර්.ඩී. බණ්ඩාරනායක, විජයානන්ද දහනායක, සිරිමාවෝ බණ්ඩාරනායක, ජේ.ආර්. ජයවර්ධන, ආර්.ප්‍රේමදාස, ඩී.බී. විජේතුංග වැනි ගෞරවනීය නායක, නායිකාවන් ගැනවත් සිතා බලා ඒ අනුව, හිටපු අගමැති ජනාධිපතිවරු හා ජනාධිපතිවරියන් ද ආදර්ශයට ගෙන මහින්ද, චන්ද්‍රිකා, මෛත්‍රීපාල තමන් දැනට ලබන වරප්‍රසාද අත්හැර, දැනට ඔවුන් පදිංචිව සිටින රජයේ නිවාසවලින් ඉවත්වීම හැර වෙනත් විකල්පයක් මේ අයට නොමැත. එසේ කළොත්, අප රට වැටී ඇති ආර්ථික අර්බුදයට ද සෑහෙන පිළියමක් වනු ඇත. එසේ නොවන්නට මේ රටේ බහුතර ජනතාවගේ සාපය ඔවුන් කරා එනු ඇත.
ඩී.කුරුප්පු
ශ්‍රී ජයවර්ධනපුර
ඇල්පිටිය කොළඹ සාමාන්‍ය බස් හිඟයක්
ඇල්පිටිය සිට කොළඹ දක්වා මාර්ග අංක 401 සාමාන්‍ය බස් රථ ප්‍රමාණවත් ලෙස නොමැති නිසා මගීහු අපහසුතාවයට පත් වෙති. සුඛෝපභෝගී බස් රථ පමණක් වෙලාවට තිබුණද සමාන්‍ය බස් රථ නොමැති නිසා ඔවුහු දැඩි ලෙස දුෂ්කරතාවයට පත් වෙති. සමහර වෙලාවට 12.30ට ගමන් ආරම්භ කිරීමට නියමිත ලංගම බස් රථය රියැදුරු මහතා බස් රථයේ රැගෙන යෑමට නොපැමිණෙයි. මෙය මගීන්ට විශාල ලෙස පාඩුවකි, අපහසුතාවයකි. දකුණු පළාත් මගී ප්‍රවාහන බලධාරීන්ගේ අවධානය මේ ගැන යොමු විය යුතුය.
ඩී. එම්. ලක්ෂාන්
ඇල්පිටිය
පහසුකම් වෙනුවට අපහසුකම් ගොඩගැසුණ රංගල වතු නගරය
තෙල්දෙණිය මැතිවරණ කොට්ඨාසයේ පිහිටි එකම වතු නගරය වන රංගල වතු නගරය දිගු කාලයක සිට දැවෙන අඩුපාඩු රැසකින් පිරී පවතින පැරණි වතු නගරයක් බව නගර වැසියෝ හා වතු ජනතාව මෙන්ම වතු වෘත්තීය සමිති නියෝජිතයෝ ද පවසති. මෙම වතු නගරය බ්‍රිතන්‍ය පාලන සමයේදී වතු ජනතාවට අත්‍යවශ්‍ය ආහාර ද්‍රව්‍ය බෙදාදීම සඳහා කුඩා පෙට්ටි කඩ කිහිපයකින් ආරම්භ වූ කුඩා පටු වතු නගරයක් විය.
එදා පටන් මෙම වතු නගරය වටා වතු ජනතාව හා ඒ අවට පිහිටි පාරම්පරික ගම්මානවල ජනතාව තමන්ට එදිනෙදා අත්‍යවශ්‍ය ආහාර ද්‍රව්‍ය එළවළු, පලතුරු වැනි දෑ මිලදී ගැනීම සඳහා මෙම නගරයට ඒකරාශී විය. එතැන් පටන් මෙම වතු නගර‍ෙය් කෙමෙන් කෙමෙන් කඩ ඉදිවෙමින් මේ වන විට කඩ සාප්පු සියයකට ආසන්නව ඇති නගරයක් බවට පත්ව ඇත.
මෙම නගරයට විශාල ජනතාවක් එදිනෙදා අත්‍යවශ්‍ය දෑ මිලදී ගැනීමට පැමිණෙති. මෙම නගරයට පැමිණ බස් රථවලින් දුර බැහැර පළාත්වලට යාමට ද වතු ජනතාව හා අවට ගම්මානවල ජනතාව දිනපතා පැමිණෙති.
මෙම වතු නගරය කුඩා පටු නගරයක් වුවත්, දිනකට දෙදහසක් පමණ වතු ජනතාවක් හා අවට පැරණි ගම්මානවල ජනතාව පැමිණෙන නගරයකි. එහෙත් මෙම වතු නගරයේ වැසිකිළි කැසිකිළි පහසුකම් නොමැත. තෙල්දෙණිය නගරයේ සිට මෙම නගරයට විවිධ පළාත්වලට ධාවනය වන බස් රථ විශාල සංඛ්‍යාවක් පැමිණියත් මෙම වතු නගරයේ බස් රථ නැවතුම්පළක් හෝ බස් රථ නවතා තැබීමට සුදුසු ස්ථානයක් නොමැත. බස් රථයක් හැරවීමට ස්ථානයක් නොමැත. නගරයේ ත්‍රීවීල් රථ විශාල ප්‍රමාණයක් තිබුණත් එවා නැවැත්වීමට සුදුසු ස්ථානයක් නොමැත. මෙම නගරය හරහා දෙස් විදෙස් සංචාරක පිරිස් දිනපතා නක්ලස් රක්ෂිතය නැරඹීමට හා පුංචි නුවරඑළිය නගරයේ (තංගප්පුව) විසිතුරු බැලීමට ගියත් මෙම නගරයේ පහසුකම් නොමැති නිසා සංචාරක පිරිස් මෙම නගරය අමතක කර පිට පාරෙන් ගමන් කරන බව නගරවාසීහු හා වතු වෘත්තීය සමිති නියෝජිතයෝ පවසති.
රංගල වතු නගරයේ තිබුණ දැවැන්ත රංගල තැපැල්හල එවකට ගිනි තබා විනාශ කර ඇතත් එය තවම යථා තත්ත්වයට පත්කර නැතැයි වතු වෘත්තීය සමිති නියෝජිතයෝ හා රංගල නගරයේ වෙළෙඳ සංගම් නියෝජිතයෝ පවසති.
රංගල වතු වෘත්තීය සමිති නියෝජිත කේ.එස්. මාදවන් මහතා මෙසේ පැවසීය.
මෙම වතු නගරයට දිනපතා අතිවිශාල ජනතාවක් පැමිණෙනවා. එහෙත් නගරයට එන මහජනතාවට පොදු පහසුකම් නැහැ.
වැසිකිළියක්, කැසිකිළියක් නැහැ. බස් රථ නැවතුම්පළක් නැහැ. සනීපාරක්ෂක කටයුතු දුර්වලයි. රංගල වතු නගරයට ආසන්නව තිබෙන බ්‍රිතන්‍ය පාලන සමයේදී ආරම්භ කළ රංගල තැපැල්හල තවමත් නිසි පරිදි සකස් කරලා නැහැ. එහි කාර්ය මණ්ඩලයේ විශාල පිරිසක් සේවය කරනවා. එහි පහසුකම් නැහැ. අවට වතු තිබෙන රාජ්‍ය වතුවලින් ඉඩම් කොටසක් ලබා ගෙන මෙම පැරණි රංගල වතු නගරය සංවර්ධනය කළ යුතුයි.”
කේ. විජේසිරි නිශ්ශංක
කරල්ලියැද්ද
දියවන්නාවට ඉල්ලීමක්
දැනට අපේ ලංකාවේ පවතින්නේ රටේ මහජනතාවගෙන් තුනෙන් දෙකකට වඩා ඡන්දය ලබා ගත් ආණ්ඩුවකි. මේ පත්වූ මන්ත්‍රීන් 159 ම ජනපතිගේ අණසකට යටත් වැදගත්, උගත්, නම්බුකාර, කාර්යශූර රටට ආදරය කරන පිරිසක් බව අපි පිළිගනිමු. එය පාර්ලිමේන්තුවක අවශ්‍යතාවයකි. දැනට විපක්ෂයේ පක්ෂ කිහිපය තුළ සිටින අයගෙන් ටික දෙනෙක් හැර වැඩි දෙනෙක් වැදගත්, උගත්, නම්බුකාර, කාර්යශූර රටට ආදරය කරන පිරිසක් ලෙස මා සිතන්නේ ඉස්සර කාලයේ මෙන් අශිෂ්ට වචන භාවිත කරන, ගිරිය පුප්පාගෙන කෑගසන, ගහමරා ගන්නා අය ඉතාමත් අඩු හෙයිනි. පාර්ලිමේන්තුව තිබෙන්නේ එකිනෙකාගේ අඩුපාඩු, පාවිච්චි කරන වාහනය, පවුල්වල තොරතුරු, කාපු හැටි, අත හෝදපු හැටි, අඳින හැටි ආදී පෞද්ගලික දේවල් කතා කිරීමට නොවන බව මෙම මන්ත්‍රීතුමන්ලා නිතරම මතක තබාගත යුතුය. පාර්ලිමේන්තුවේ කතා කරන විට සුහද සාකච්ඡා මිස ගහ බැණ ගැනීම් කිසිසේත්ම අවශ්‍ය නැත. අපට අවශ්‍ය වන්නේ සාමූහිකව රජය සහ විපක්ෂය එක්ව සුහදව දියුණු රටවල මෙන් රට නඟා සිටුවීමට අවශ්‍ය යෝජනාවලට සහාය දෙමින් වෙනත් සුදුසු යෝජනා ඉදිරිපත් කරමින් රටේ සංවර්ධනය සඳහා සෑම දෙනාම ක්‍රියාත්මක වීමයි.
විපක්ෂයේ අයට අවශ්‍යම නම් ඉදිරි අවුරුදු පහෙන් තුනක්වත් රජය සමඟ එක්ව වැඩ කර එයින් යහපතක් නොවන්නේ නම්, ඉන් පසුව රජයට විරුද්ධව කතා කිරීම වරදක් නැත. මුහුදු පත්ලේ සැඟව ඇති දෙයක් මෙන් සෑම අතින්ම කඩාවැටී ඇති අපේ ආර්ථිකය මේ දවස් 100කටත් අඩු කාලෙකින් ගොඩගත නොහැකිය. එනිසා මා කරුණාවෙන් ආයාචනා කරන්නේ අඩුම වශයෙන් කකුලෙන් නොඇද රජයේ ප්‍රධාන යෝජනා වන දුප්පත්කම නැති කිරීම, ආර්ථිකය ගොඩනැඟීම, කෘෂිකර්මය දියුණු කිරීම වැනි වැදගත් යෝජනා ක්‍රියාත්මක කිරීමට හැකිතාක් උදවු කරන ලෙසයි.
ජාති, ආගම්, පක්ෂ භේදයකින් තොරව ත්‍රිවිධ හමුදාව, පොලීසිය ඇතුළු සියලුම රාජ්‍ය සේවකයින්, සියලුම ජනමාධ්‍ය සහ සියලුම ජනතාව මේ අපේ පුංචි වටිනා රට ගොඩගැනීමට හැකි සෑම උපකාරයක්ම රජයට කළ යුතුය. අඩුපාඩු සිදු වුවත් ඒවා විඳගෙන රජයට දොස් නොකියා ඔබ සැමගේ සහාය ලබාදී අපේ රට බේරා ගන්නට එකතු වන්න. අවසාන වශයෙන් ලංකාවේ සියලුම ජනතාවගෙන් ඉල්ලා සිටින්නේ ඔබ ගන්නා වැටුපට, වරප්‍රසාදවලට සමානවවත් රජය සමඟ එක්ව වැඩ කරන්න. ඔවුන්ගේ වැරදි සෙවීමෙන් රටට කිසිම දියුණුවක් වන්නේ නැත. හොඳක් වන්නේ ඔබත් වැඩ කළොත් පමණි. ඔවුන්ගේ වැරදි සුහදව පෙන්වා දී ඔවුන් සමඟ එක්ව අපේ රට ලස්සන, ආදර්ශවත් රටක් කිරීමට සහයෝගය දිය යුතුය.
ශ්‍රී ලංකා මාතාව ලෝකයේ දිදුලන සශ්‍රීක, යහපත් ප්‍රීතිමත් ජනතාවක් වෙසෙන රටක් වේවායි මා ප්‍රර්ථනා කරමි.
එන්. රාමනායක
රත්මලාන.
දින දින කල් යන අපේක්ෂාව
මහරගම අපේක්ෂා රෝහලේ පසුගිය මාසවල සැත්කම් කළ රෝගීන්ගේ ඇතැම් වෛද්‍ය වාර්තා තවමත් ලැබී නැත. වෛද්‍ය වාර්තා ලබා ගැනීම සඳහා දුරබැහැර ප්‍රදේශවල රෝගීහු දින දෙක තුන පැමිණීම නිසා දැඩි අපහසුතාවට පත් වෙති.
ලලිත් රන්දෙණිය
