වෘත්තීය සමිති පිළිබඳ හඳුන්වාදීමක්
වෘත්තීය සමිති යනු මොනවාද, ඒවායේ වගකීම කුමක්ද, වෘත්තීය සමිති සහ සේවක සබඳතා ගොඩනඟාගන්නේ කෙසේද යන්න පිළිබඳව අන්තර් සමාගම් සේවක සංගමයේ ජ්‍යෙෂ්ඨ නියෝජ්‍ය ල???? ේකම් හෙට්ටිආරච්චිගේ පියසේන මහතා සමඟ සිදුකළ සාකච්ඡාවක් ඇසුරින් මෙම ලිපිය සැකසුණි.
රටෙහි මූලික ව්‍යවස්ථාවට අනුව වැඩ කරන ජනතාවගේ අයිතිවාසිකම් ආරක්ෂා කිරීමට වෘත්තීය සමිති සංගමය පිහිටුවා ඇත. එහිදී ඕනෑම සේවකයකුට තමාගේ වෘත්තීමය අයිතිය සුරැකීමට වෘත්තීය සමිති සඳහා බැඳීමේ අයිතිය ඇත.එලෙසම ජාත්‍යන්තර නීතිය තුළ ද මෙම කම්කරු නීතිය ස්ථාපිත කර ඇත. එහිදී සේවක අයිතිය සුරැකීමට වෘත්තීය සමිතියකට බැඳීමට ඇති අයිතිය ජාත්‍යන්තර මට්ටමින් ද තහවුරු වී ඇති බව පැහැදිලිය. මෙලෙස ලංකාව තුළ මෙන්ම ලෝකය තුළ ද වෘත්තීය සමිති පිළිගැනීමට ලක්වේ. ලංකාව තුළ වෘත්තීය සමිති ආඥා පනත ආදී ලෙස මේ සම්බන්ධ බොහෝ අණපනත් පවතියි. එලෙසම වෘත්තීය සමිතියක් ගොඩනැඟීමේ දී ව්‍යවස්ථාවක්, නිලධාරි මණ්ඩලයක්, ප්‍රතිපත්තියක් සේම එමඟින් සිදුවන කාර්යභාරය පිළිබඳව ද කම්කරු දෙපාර්තමේන්තුවට හෙවත් කම්කරු අමාත්‍යාංශයට දැනුම් දිය යුතුය. එලෙසම කම්කරු දෙපාර්තමේන්තුව තුළ ලියාපදිංචි වී ලියාපදිංචි අංකයක් ලබාගත යුතුය. එයට හේතුව වන්නේ වෘත්තීය සමිති සම්බන්ධයෙන් මූලික වගකීම ඇත්තේ කම්කරු දෙපාර්තමේන්තුවට නිසාය. මේ ආකාරයෙන් ලංකාවේ දැනට වැඩ කරන ජනතාව වෙනුවෙන් වෘත්තීය සමිති 7000කට වැඩි සංඛ්‍යාවක් ලියාපදිංචි කර ඇත. මෙලෙස ලංකාව තුළ වෘත්තීය සමිති ආරම්භවීමට ප්‍රධාන හේතුව වන්නේ වැඩ කරන ජනතාවගේ අයිතිවාසිකම් සුරැකීම අවම වීම නිසාය. එලෙස පිහිටවූ ලංකාවේ ප්‍රථම වෘත්තීය සමිතිය 1935 වර්ෂයේ ආරම්භ කරන ලදී. නමුත් මෙය ආරම්භ කරන ලද්දේ වැඩ කරන ජනතාව නොව හාම්පුතුන් විසින්ය. වෘත්තීය සමිති වූ කලී සුගතශීලීය. එනම් ඕනෑම දෙයක් සිදුකිරීමට හැකිය. එහිදී පවතින රජයක් පවත්වාගෙන යෑමට මෙන්ම බිද දැමීමට ද මෙම වෘත්තීය සමිති මඟින් හැකියාව ඇත. එලෙසම වෘත්තීය සමිති නොසලකා හැරීමකට ද කිසිදු රජයකට හැකියාවක් නොමැත. මේ ආකාරයෙන් වෘත්තීය සමිති මඟින් ප්‍රධානව සමාජය ආරක්‍ෂාවේ. එලෙසම වෘත්තීය සමිති හොඳ පැතිකඩකට ගමන් කළහොත් රටේ නිෂ්පාදන ආර්ථිකය ද වැඩිදියුණු කරගැනීමට හැකියාව ඇත.
නිසංසලා
කොට්ටගස්වත්ත
වැටුප් විෂමතා විසඳන්න
ජ්‍යෙෂ්ඨ අධ්‍යාපන විද්වතුන්ගේ සංගම‍ෙය් ඉල්ලීමක්
යල්පැනගිය පැරණි දේශපාලනය නිමා කොට නව පරපුරක, නව මාවතකට ගෙනයන ජාතික ජනබලවේගය මඟින් සිය වැටුප් විෂමතාවන් නිවැරැදි කරනු ඇතැයි තමන් බලාපොරොත්තු වන බව ජ්‍යෙෂ්ඨ අධ්‍යාපන විද්වතුන්ගේ සංගමය පවසයි.
1977න් පසු පත්වුණු සෑම ආණ්ඩුවකදීම සිය ගැටලු ඉදිරිපත් කළත් ඒ කිසිදු අවස්ථාවකදී සිය වැටුප් විෂමතාවන්ට කිසිදු සාධාරණයක් ඉටු නොකළ බැවින් ජාතික ජන බලවේගයේ පිහිට පැතූ බවත් එම ප්‍රතිපත්ති ප්‍රකාශය හා අධ්‍යාපන උප ග්‍රන්ථයක් අධ්‍යයන කිරීමේදී වැටුප් විෂමතා හොඳින් හඳුනාගෙන, ඒවාට විසඳුම් ලබාදීමට සපථ කළ බවත් එම සංගමය පවසයි.
ඒ අනුව ජනාධිපතිවරණයේදී මෙන්ම මහමැතිවරණයේදී සිය සාමාජිකයන් ප්‍රාදේශීය සංවිධායක තනතුරු දරමින් ජාතික ජන බලවේග‍ෙය් ජයග්‍රහණය උදෙසා විශාල කාර්යභාරයක් කළේ යැයි ද එම සංගමය දැනුම් දෙයි.
1977දී මහමැතිවරණයෙන් ආරම්භ කර, ආණ්ඩු මාරුවත් සමඟ විවිධ වූ තාඩන පීඩනවලට මුහුණදෙමින් ආ ගමනේදී 1994 පැවති ආණ්ඩුව පත් කරනු ලැබූ කොමිෂන් සභාව සිය ගැටලු සාධාරණව සොයා බලා, තනතුරු නිර්දේශ කළ බවත් එහි ප්‍රතිඵලයක් ලෙස කොටසකට පමණක් සාධාරණය ඉටු කළ බවත් එම සංගමය පවසයි.
ඒ අනුව අතපසු වූ අනෙක් පිරිස අධිකරණ ක්‍රියාමාර්ග ගත් අතර, එහිදී ලද අධිකරණ තීන්දුව එවකට සිටි අධ්‍යාපන අමාත්‍යාංශය ක්‍රියාත්මක නොකළ බවත් එම අධ්‍යාපන ඇමැතිවරයා කැබිනට් පත්‍රිකාවක් ඉදිරිපත් කරමින් සාධාරණය ඉටු කරන්නේ යැයි තමන් රැවැටූ බවත් එම සංගමය චෝදනා කරයි.
2001දී අධ්‍යාපන ඇමැතිවරයා වෙත ද ඉල්ලීම් කළ බවත් එදා සිට මෙතෙක් පත්වූ සෑම අධ්‍යාපන ඇමැතිවරයෙක්ම තමන්ව මුළාවට පත්කිරීම හැර සිය ඉල්ලීම්වලට කිසිදු සාධාරණයක් ඉටු කර නොමැති බවත් එම සංගමය පවසයි.
ඉරෝෂා දීපානි
පැල්වත්ත සමාගමටත් අන්තර් සමාගම් සේවක සමිතියක්
වසර ගණනාවක් තිස්සේ කළ අඛණ්ඩ අරගලයක් තුළ පැල්වත්ත කිරි සමාගම තුළ අන්තර් සමාගම් සේවක සංගමය වෘත්තිය සමිතිය පිහිටුවන ලැබිණි. එහි ජයග්‍රාහී මංගල මහ සභාව ඉකුත් පෙබරවාරි 27 දින පැවැත්විණ. ඒ සඳහා අන්තර් සමාගම් සේවක සංගමයේ ප්‍රධාන ලේකම් නීතිඥ ජානක අධිකාරි, උපසභාපති කණිෂ්ක නිරෝෂන් යන මහත්වරු එක්වූහ.
වතු සටනේ පළමු බිල්ල ගෝවින්දන්
1940 ජනවාරි 12 වැනිදා වතු කම්කරුවකු බිලි ගත් මුල්ඔය වතු කම්කරු සටන ද මෙරට කම්කරු සටන් ඉතිහාසයේ තේ දල්ලේ ලේ ගෑවුණු සටනකි.
හේවාහැට ආසනයට අයත් මුල්ඔය වත්තේ කම්කරුවෝ 1940 ජනවාරි මස 01 වැනිදා වැඩවර්ජනයක් ආරම්භ කළහ. මෙම වර්ජනයට නායකත්වය දුන්නේ සමසමාජ පක්ෂයේ ජ්‍යෙෂ්ඨයකු වූ ආචාර්ය කෝල්වින් ආර්.ද. සිල්වා මහතා සභාපතීත්වය දැරූ සමස්ත ලංකා වතු කම්කරු සංගමයයි. මුල්ඔය වත්තේ මුළු කම්කරුවන් 200න් 800ක්ම කොල්වින්ගේ සංගමයේ සාමාජිකයෝ වූහ. වත්තේ සේවක ප්‍රජාව අතර ජනප‍්‍රිය පුද්ගලයකු හා ගුරුවරයකු වූ ජෙගනාදන් නමැත්තා අසාධාරණ ලෙස ස්ථාන මාරු කිරීමට එරෙහිව ආරම්භ කළ වර්ජනය උග්‍රවීමත් සමඟ මර්දනය නැඟී ආවේය. වතු කම්කරු නායකයකු වන වේළුසාමි නමැත්තා අත්අඩංගුවට ගෙන සිරගත කෙරිණි. දිනෙන් දින තත්ත්වය උග්‍රවෙද්දී කම්කරුවන්ගේ ඉවසීම ඉක්මවා ගියේය. බ්‍රිතාන්‍ය පාලක පක්‍ෂය ඔවුනට නයාට අඳුකොළ මෙන් විය. මුල්ඔය සටන අනෙක් වතුවලටත් පැතිරෙනු ඇතැයි බියවූ සුද්දෝ, තත්ත්වය පාලනය කිරීමට කම්කරුවන්ට වෙඩි තබන්නට පොලීසියට අණ කළෝය.
මුල්ඔය වැඩ වර්ජිත කම්කරුවන් කර්මාන්ත ශාලාව අසලට රැස්වී සටන් පාඨ කියමින් මාර්ගය දිගේ ඉදිරියට ගමන් කරද්දි, එල්ල කරන ලද පොලිස් වෙඩි පහරින් ගෝවින්දන්ට සිය ජිවිතය අහිමි විය. කම්කරු සටනක දී පොලිස් වෙඩි පහරින් ඝාතනයට ලක්වූ ශ්‍රී ලංකා කම්කරු සටන් ඉතිහාසයේ ප්‍රථම වතු කම්කරුවා වන්නේ ගෝවින්දන් ය.
ගෝවින්දන්ගේ මරණයත් සමඟ මහා වියවුලක් හටගැනිණ. අවසානයේ බ්‍රිතාන්‍ය ආණ්ඩුකාරවරයාට ගෝවින්දන්ගේ මරණය ගැන සොයා බලන්නට රාජකීය කොමිසමක් පත්කරන්නට ද සිදුවිය. මෙම මුල්ඔය රාජකීය කොමිසම දීර්ඝ කාලයක් මහනුවරදී සිද්ධිය ගැන සාක්ෂි විමසීය. ආචාර්ය කොල්වින් දින 27ක් කම්කරුවන් වෙනුවෙන් කොමිසම හමුවේ කරුණු දැක්වීය. මේ නිසා ජාතික දේශපාලනයේ මහා සසල වීමක් ද වාර්තා විය. ඒ අනුව මෙම අර්බුදය ගැන රාජ්‍ය මන්ත්‍රණ සභාවේ හටගත් මත ගැටුම් ආණ්ඩුකාරවරයා සමඟ හටගත් අර්බුදයක් බවට පත්වී, පැවති ආණ්ඩුවේ අමාත්‍ය මණ්ඩලයම එකවර ඉල්ලා අස්විය. එහිදී හටගත් රාජ්‍යතාන්ත්‍රික අවුල සමථයකට පත්කරන්නට ආණ්ඩුකාරවරයාට මහත් වෙහෙසක් දරන්නට සිදුවිය. ගෝවින්දන්ගේ මරණය විසින් තත්ත්වය තවදුරටත් බැරෑරුම් කළේය. එවකට රාජ්‍ය මන්ත්‍රණ සභාවේ ස්වදේශ කටයුතු භාර ඇමැතිවරයා වූ සර් ඩී.බී. ජයතිලක සිය අමාත්‍යාංශ කමිටුව හරහා මුල්ඔය වෙඩි තැබීම ගැන විභාගයක් පවත්වන්නට තීරණය කළේ ඒ නිසා ය. එහිදී පොලීසිය කරුණු දක්වමින් කියා සිටියේ ගෝවින්දන් විසින් කම්කරුවන් සිරකොට තබාගෙන ගැටුම් ඇති කිරීමට කටයුතු කළ බව ය. ඔහු ආයුධ රැගත් කම්කරු කණ්ඩායමේ නායකයකු බව අභූත චෝදනාවක් කරන්නට ද පොලීසිය අමතක නොකළේය.
1940 වසරේ මුල් භාගය පුරාම මුල්ඔයෙන් ඇරඹි වතු කම්කරු වර්ජන රැල්ල මධ්‍යම හා ඌව පළාත් වතු කරා ද පැතිර යන්නට වූයේය. එස්.කේ. නඩේසෙඅයියර්ගේ සමස්ත ලංකා ඉන්දීය කම්කරු සම්මේලනයත්, ලංකා සමසමාජ පක්ෂයේ සමස්ත ලංකා වතු කම්කරු සංගමයත් මේ වතු කම්කරු අරගලයන්ට නායකත්වය ලබා දුන්හ. සමසමාජ නායකයන් වඩාත් සටන්කාමි බවක් පෙන්වමින් කටයුතු කරන්නට ද විය.
ගෝවින්දන්ගේ ජීවිත පූජාව නිසා වතු කම්කරුවන්ට ජයග්‍රහණ ගණනාවක් හිමිවිය. ඉන් පළමුවැන්න ශත 40ක් වූ වතු කම්කරුවන්ගේ දෛනික වැටුප ශත 56 දක්වා ශත 16 කින් ඉහළ දැමීමයි. ඊට අමතරව වතුවල වෘත්තීය සංගම්වලට ඉහළ පිළිගැනීමක් ද ලැබිණි. ගෝවින්දන්ගේ මරණය ගැන හොයන්නට පත්කළ කොමිසම මඟින් මරණය අසාධාරණ යැයි තීන්දු කළේය. එහෙත් වෙඩි තැබීම ක්‍ෂණික තීරණයක වරදක් නිසා වූ බව ද නිගමනය කෙරිණි. කෙසේ වුවද, මුල්ඔය වත්තේ මහ සටන හා මෙරට කම්කරු සටන් ඉතිහාස පොතේ ගෞරවනීය පරිච්ඡේදයක් සටහන් විය. එදා ඒ මහ සටන පැවති මුල්ඔය වත්ත අද ඉතා සාමකාමී සන්සුන්, සුන්දර වතුයායකි. අද වන විට එහි කම්කරු සටනේදී දිවි පිදූ ගෝවින්දන් සිහිවීම පිණිස කුඩා ස්මාරකයක් තනා තිබේ. එය වතු කම්කරු සටන් ඉතිහාසයක මතකය යළි යළිත් අවදි කරන සංකේතයක් බඳුය.
එම්. තාරික්
ධීවර ප්‍රජාව නංවන්න නව වැඩපිළිවෙළක් ඕනෑ
ධීවර ජාතික වෘත්තීය සමිතියෙන් ඉල්ලීමක්
ධීවර ජනතාව රටේ සංවර්ධනය සඳහා දායක වන තවත් වෘත්තීය සම්පතකි. රට වටේ ඇති මහා සාගරයේ ඵල තවමත් නෙළාගෙන නැති බව නොරහසකි. ධීවර ප්‍රජාව වෙනුවෙන් ස්ථාපිත මීගමුව ප්‍රධාන සංධිස්ථානයක් කරගත් ජාතික ධීවර වෘත්තීය සමිතියේ කැඳවුම්කරු හේවන් කුමාර එම සංගමය පිළිබඳ දැක්වූ අදහස් ඇසුරිනි.ධීවර අයිතිවාසිකම් පිළිබඳ පෙනී සිටීමට වෘත්තීය සංගමයක් නොමැතිවීම විශාල අඩුපාඩුවක් ලෙසින් අපි හඳුනාගත්තා. මේ නිසා ධීවරයන්ගේත් සහයෝගය ඇතිව 2009 වසරේදී පමණ ජාතික ධීවර වෘත්තීය සංගමය පිහිටුවූවා.
දිස්ත්‍රික් සහ පළාත් මට්ටමින් ධීවර ඒකක ස්ථාපිත කර, ඒ හරහා ධීවර ප්‍රජාවගේ අයිතිවාසිකම් වෙනුවෙන් ක්‍රියාත්මක විය හැකි ක්‍රමයක් ස්ථාපිත කළා. ඒ අනුව ගාල්ල, ත්‍රිකුණාමලය, මඩකලපුව, අම්පාර (පොතුවිල්), මීගමුව, පුත්තලම සහ උතුරේ දිස්ත්‍රික්ක හතරක් වන මන්නාරම, කිළිනොච්චිය, යාපනය සහ මුලිතිව් එකතු කර උතුරු පළාතටත්, මඩකලපුව, අම්පාර සහ ත්‍රිකුණාමලය එක්කර නැඟෙනහිර පළාතටත්, මාතර සහ ගාල්ල එක්කර දකුණු පළාත්, මීගමුව සහ පුත්තලම එකතු කර වයඹ පළාතට වශයෙනුත් ඒකාබද්ධ කර ජාතික මට්ටමින් ක්‍රියාත්මක වන ජාතික ධීවර සංගමය පිහිටුවා තිබෙනවා.
සංගමය පිහිටුවීම සඳහා ධීවරයන්ගේ වෘත්තීය අයිතිවාසිකම් වෙනුවෙන් ධීවර නායකත්වය බිහිකිරීම ප්‍රධාන අරමුණ වුණා. එහිදී ධීවරයන්ගේ අයිතිවාසිකම් ගොඩනැඟීම සඳහා වන ජාතික ධීවර ප්‍රතිපත්තියක් හරහා ක්‍රියාත්මක වීමට රජය යොමුකරවීම සහ ඒ වෙනුවෙන් රජයන්ට බලපෑම් කිරීම, ධීවර කම්කරු සහ ධීවර කාන්තාවගේ ලෙස කම්කරුවන්ගේ නායකත්වය ගොඩනැඟීම මූලික අරමුණු වෙනවා.
ධීවර ජනතාවගේ වෘත්තීය අයිතිවාසිකම් සහ ධීවර ජනතාවගේ ජීවත්වීමේ අයිතිය වෙනුවෙන් ක්‍රියාකරන වෘත්තීය සංගමයක් ලෙස ජාතික ධීවර වෘත්තීය සංගමය හඳුන්වා දිය හැකියි.
මහ මුහුදේ ආරක්ෂාව සහ ජීවිත රක්ෂණය සහ විශ්‍රාම වැටුපක් වෙනුවෙන් සංගමය පෙනී සිටිනවා. සහනාධාර ලබා ගැනීම සහ ඒවා බෙදාදීමේදී සහන ක්‍රමයක් යටතේ බෙදීම වෙනුවෙනුත්, ධීවර කාන්තාවන්ට ධීවර සංගමයත් සමුපකාර සංගමයත් නියෝජනය කිරීමේ අයිතිවාසිකම් වෙනුවෙන් සංගමය පෙනී සිටිනවා.
ඒවගේම ධීවරයාටත් ඔවුන්ගේ මත්ස්‍ය නිෂ්පාදනයටත් මහ මුහුදේ ආරක්ෂාව වෙනුවෙන් ආරක්ෂණ ක්‍රියාමාර්ග ගන්නා ලෙස සංගමය කතා කරනවා. සහන සහ සහනාධාර බෙදාදීමේදී සාධාරණ ක්‍රමයක් ක්‍රියාත්මක කිරීමට ඉල්ලීමටත් පෙනී සිටිනවා.
පොලොන්නරුව, කුරුණෑගල, මොනරාගල සහ පුත්තලම යන දිස්ත්‍රික්කවල සිටින කුඩා මිරිදිය ධීවර ජනතාවක් සිටිනවා. ඒත් ඒ කණ්ඩායම් වෘත්තීය සංගම්වලට දායක වෙන්නේ නැහැ. මිරිදිය ධීවර කර්මාන්තකරුවන් අඩුවෙන්ම අවධානයට ලක් වූ පිරිසක්. ඔවුන්ගේ දායකත්වය ගැනත් එතරම් සලකා බැලීමක් කිසිදු ආණ්ඩුවකින් සිදුවෙලා නැහැ. අපේ සංගමය යටතේ මිරිදිය ධීවර කර්මාන්තයේ යෙදෙන ගොවි ජනතාව වෙනුවෙනුත් සුබසාධන සේවා ක්‍රියාත්මක කෙරෙනවා. මිරිදිය ධීවර සහ කෘෂි කර්මාන්තයේ යෙදෙන එම ජනතාවගේ ආදායම් උත්පාදනය සඳහා අපි විවිධ වැඩපිළිවෙළ ක්‍රියාත්මක කරනු ලැබුවා. එම ජනතාවට ඉතිරිකිරීම්වල වැදගත්කම පැහැදිලි කරදීමත්, කොම්පෝස්ට් පොහොර නිෂ්පාදනයත් ගෙවතු වගාව සම්බන්ධයෙන් පුහුණුවකුත් ලබාදී තිබෙනවා. මිරිදිය ධීවර කර්මාන්තය ගොඩගන්න තවමත් කිසිදු වැඩපිළිවෙළක් නැහැ. මේ කර්මාන්තය විශාල ආදායම් උත්පාදනයක් තිබෙන්නක්. වැව් විශාල සංඛ්‍යාවකුත්, මහවැලියේත් ජලාශ බොහොමයකුත් තිබෙනවා. මේවා වැඩක් ගෙන නැති බව කිව යුතුයි. ඒවගේම මන්දපෝෂණය වැඩිවෙමින් පවතිනවා. ග්‍රාමීය මන්දපෝෂණයට මිරිදිය මත්ස්‍ය නිෂ්පාදනය හොඳ පිළිතුරක් ලෙස හඳුන්වා දෙන්න පුළුවන්.
ඉරෝෂා දීපානි
මෑන්පවර් ජීවිත
එකම කම්හල, එකම වැඩමුරය, එකම රාජකාරිය. ඒ වුණාට කෝණේෂ්වරීට එකක්. අනෙක් මෑන්පවර් නොවෙන සේවිකාවන්ට වෙන එකක්. ඒ අයට වැටුප, දීමනා, අතිකාල සාපේක්ෂව කෝණේෂ්වරීට වඩා වැඩියි. ඒ එකම තනතුරේ එකම මූලික වැටුපක් යටතේ මේ දෙපිරිසම වැඩ කරද්දීයි. කෝණේෂ්වරී යාපනේ. එයා ඉන්නේ කොළඹ බෝඩිමේ එකම කාමරේ තවත් ගෑනු ළමයි දෙන්නෙක් එක්ක. පාන්දරට එතැන වොෂ් රූම් එකටත් පෝලිම.
මෙයාලා භූමිතෙල් ළිපට තෙල් ටිකක් ගන්නත් බූලියත් උස්සන් රෑ පානේ හැතැප්ම ගාණක් ඇවිදින්න ඕනි. එහෙම අවුළුවා ගන්නා ළිපෙන් වෑංජන දෙකක් උයාගෙන, බත් ගෙඩියක් බැඳගෙන කෝණේෂ්වරී අඩියට දෙකට වැඩපළට දුවන්නේ, පරක්කුවේ රතු ඉරෙන් ගැලවෙන්න බලාගෙන. රෑ වැඩ මුරය ඉවර වෙද්දී හරියට වෙලාවට ෆැක්ටරිය ඉදිරිපිට නවත්වන කොම්පැනියේම අයට විතරක් විවෘත බස්වලට ගොඩවදින්න මෑන් පවර් කෝණේෂ්වරීලාට අවසරයක් නැහැ. ඉඳහිට පව් කියලා දමාගෙන ගියොතින් මිසෙක එහෙම අවසරයක් මෑන්පවර් අයට නැහැ.
ඒ වෙනුවට ලොකු වටයක් ගහගෙන, කොම්පැනි ගණනාවක තවත් මෑන්පවර් සේවක සේවිකාවන් පුරෝගෙන ඇලවීගෙන එන පොඩි බස් එක තමයි කෝණේෂ්වරීලාට හුඟක් දවසට වැඩ ඉවර වෙලා යන්න තියෙන්නේත්. ඒ ඇතුළත යන්නේ වැඩිමනක් පිරිමි. පිරිමි ගොඩේ හිරවීගෙන, එහෙමත් නැතිනම් පිරිමි හිර කරගෙන යන එකත් ඉවසාගෙනයි කෝණේෂ්වරී ඇතුළු හුඟක් කාන්තාවන් මෑන්පවර් බස් එකෙන් බැහැගන්නේ. එහෙම වේලාවක පිරිමින්ට ආඩපාලි කිවුවොතින් බහුතරයක් පිරිමි ඉදිරියේ හෑල්ලුවට ලක්වෙන්නේත් කෝණේෂ්වරීමයි. අනෙක, පිම්මේ දුවන ඒ බස් එකත් සමහරදාට නවත්වන්නේ බෝඩිම පහුකරගෙන දුරක් ගිහින්. මේ පීඩාවෙන් ගැලවෙන්න නම් බස් වැඩ නැති, ලයිට් නැති පාරේ 500mක් විතර රස්තියාදුකාරයන්ගේ හයිකාරකම් බල බලා යන්න වෙනවා. ඔය ගමනේදී සර්පයන්ට ගොදුරු වුණු අයත් ඉන්නවා.
මේ සියල්ලත් දරාගෙන උදෙන්ම වැඩට ආවත් කම්හල ඇතුළත අත්දකින්නට වෙන තත්ත්වය තවත් වෙනස්. කෝණේෂ්වරී හැඩකාරි. මනමාල මැනේජර්ලාගේ, සුපවයිසර්ලාගේ ලොකු උනන්දුවක් මුලදී නම් ඇයට තිබුණා. ඒත්, ඇයගේ ලැජ්ජා බය, හැදියාව ඒකට හරස් වුණා. එතැනිනුයි වාතාවරණය තවත් වෙනස් වෙන්න ගත්තේ. කළමනාකාරීත්වයේ හුඟ දෙනකුට දෙමළ බැහැනේ. කෝණේෂ්වරීටත් යන්තමටයි සිංහල පුළුවන්. මේ නොගැළපීම් ආරෝවකට හැරෙන්න ගත්තේ ෆැක්ටේරියේදී ඇඟට බරවෙන්න එන පිරිමි සුපවයිසර්ලාගෙන් කෝණේෂ්වරී ඈත්වෙන්න ගත්තාමයි.
‘කොච්චරවත්, ඩැමේජ්. කරෙක්ෂන්, රිජෙක්ට් වෙනවාත් වැඩියි. කියන දෙයක් තේරුම් අරන් වැඩ කරන්න බැහැ’ සිංහලෙන් හැදුණු එහෙම චෝදනා පත්‍රයකට වතාවක් කෝණේෂ්වරී අත්සන් කළෙත් දෙමළෙන්. වැටුප් වර්ධක, දීමනා කැපෙන්න ඒකත් කාරණාවක්. එහෙම වෙද්දී කට්ටිය අඩු දවස්වලට අත් උදව්කරු මට්ටමේ වැඩවලට ඇයව යොදවා ගැනීමට වැඩ පරික්ෂකවරුන් කටයුතු කළේ කලින් ආරෝවත් හිතේ තියාගෙන. මෙහෙම දේවල් පොල් අහුලන්න එනවා වගේ කලාතුරකින් එන කම්කරු නිලධාරීන්ගේ අවධානයටත් එතරම් යොමු නොවෙන තරම්. එහෙම වුණත් ඒ අය ඉදිරියේ කරුණු දක්වන්න තරම් සාධාරණ කාලයකට ‘ලයින්’ එකෙන් කෝණේෂ්වරීව නිදහස් කරන්න පුළුවන් තරම් වටපිටාවක් එක පිට එක ඕඩර් පස්සේ දුවන ෆැක්ටේරියේ නැහැ.
අනෙක මෑන්පවර් සේවකයන් කියන්නේ එක කෝල් එකකින් ‘මෙයා එපා’ කිවුවාම පහුවදා රස්සාව නැති වෙලා මහ පාරට වැටෙන තැනට වැඩ සැලසෙන තත්ත්වයක් කියලා, සිංහලෙන්ම වැඩේ යන දකුණේ හුඟක් ෆැක්ටරිවල වැඩ කරන කෝණේෂ්වරීලාට නොතේරෙනවා නෙවෙයි.
එක්කෝ, මෑන්පවර් එකෙන් අයින්වෙලා එන්න කියලා ඒ ඒ ෆැක්ටරිවලින් අඬගහන්න ඕනෑ. එහෙම කියන්නේත් ඉතින් මැනේජර්ලා, සුපවයිසර්ලා ඉහළට දෙන වාර්තා අනුවනේ. ඒත්, වැඩේ ඇරෙන්න වෙන දේවලුත් ගාවගෙන ඒවාත් හදනවා නම් එතැනින් එහාට ඒ මෑන්පවර් අයට අබ සරණම තමයි. සදාකල්ම මෑන්පවර් විතරයි.
කෝණේෂ්වරී මෑන් පවර් සේවිකාවක්. බියගම විතරක් ගත්තත් එහෙම දහස් ගණනක් ඉන්නවා. බැලූ බැල්මට ඒ කට්ටියව කලාප ඇතුළත විවිධ ෆැක්ටරිවලදී හඳුනා ගන්න පුළුවන්. ඒ ඒ මෑන්පවර් කොම්පැනියෙන් ඒ අයට වෙනම ටී. ෂර්ට් එකක් දීලා තියෙනවානේ. ඒත් ශ්‍යාමලී මෑන්පවර් නෙවෙයි, එයා ගාමන්ට් එකේ ස්ථිර සේවිකාවක්. හැබැයි මේ දෙදෙනාම වැඩ කරන්නේ මාසේ පඩියට. කොම්පැනියෙන් කෝණේෂ්වරීගේ පඩිය මෑන්පවර් එකට. එතැනින් ගතමනාව කපාගෙනයි මෑන්පවර් එකෙන් ආපහු කෝණේෂ්වරීගේ බැංකු පොතට පඩිය යන්නේ. ඒ පඩිපතින් ලැයිමේ නංගිලා, මල්ලිලා එක්ක වයසක මවුපියන් රැකෙන්නත් ඕනි. ඉතින්, කොච්චර වුණත් දත විකාගෙන කෝණේෂ්වරී වැඩ. එහෙව් කෝණේෂවරීලා දහස් ගණනක ජීවිත දැනුත් දකුණේ ෆැක්ටරි ඇතුළත දියවෙනවා.
නුවන් ජයවික්‍රම
වරාය ලොරි රියැදුරු සංගමය බිහිවේ
වරාය ලොරි රථ රියැදුරන්ගේ සහ සහායකයන්ගේ සාමූහිකය පසුගිය 27 වැනි දින පෑලියගොඩ ප්‍රජා ශාලාවේදී අන්තර් සමාගම් සේවක සංගම‍ෙය් මැදිහත්වීමෙන් පිහිටුවා ගන්නා ලදි. මෙය වරාය ඉතිහාසයේ සුවිශේෂී සිදුවීමකි.
දීපානි
