කොස්ටාරිකාවට එරෙහිව ගුවාසිමා නගරයේ පැවති විස්සයි20 ජාත්‍යන්තර ක්‍රිකට් තරගයකදී, ෆෝක්ලන්ත දූපත් කණ්ඩායමේ ඇන්ඩෲ බ්‍රවුන්ලී ජාත්‍යන්තර ක්‍රිකට් පිටියට පිවිසි වයස්ගතම මිනිසා බවට පත්විය.
වයස අවුරුදු 62යි දින 145 දී ජාත්‍යන්තර ක්‍රිකට් තරගයකට පිවිසි ඇන්ඩෲ බ්‍රවුන්ලී දකුණත් මඳවේග පන්දු යවන්නකු සහ පසුපෙළ පිතිකරුවකු ලෙස ෆෝක්ලන්ත දූපත් ක්‍රිකට් කණ්ඩායම නියෝජනය කළේය. වයස අවුරුදු 60න් පසු ජාත්‍යන්තර ක්‍රිකට් ක්‍රීඩා කළ පළමු ක්‍රිකට් ක්‍රීඩකයා බවට ඇන්ඩෲ බ්‍රවුන්ලී පත්විය.
මෙයට පෙර වයස්ගතම ජගත් ටෙස්ට් ක්‍රිකට් ක්‍රීඩකයාගේ වාර්තාව තබා ඇත්තේ ඉංග්‍රීසි ජාතික විල්ෆ්‍රඩ් රෝඩ්ස් (අවුරුදු 52යි දින 156) විසිනි. තුර්කියේ ඔස්මාන් ගෝකර් 2019 දී රුමේනියාවට එරෙහිව ජාත්‍යන්තර විස්සයි20 තරගයකට ක්‍රීඩා කරන විට ඔහුගේ වයස අවුරුදු 59යි දින 181ක් විය.
ජාත්‍යන්තර තරගයකට ක්‍රීඩා කරන 106 වන කණ්ඩායම වූ ෆෝක්ලන්ඩ් පිලේ ළාබාලතම ක්‍රීඩකයාගේ වයස අවුරුදු 31කි. කණ්ඩායමේ නව දෙනෙක් අවුරුදු 40ට වැඩි අය වූහ. ඒ නව දෙනාගෙන් තිදෙනෙක් අවුරුදු 56ට වැඩි ක්‍රීඩකයන් වේ. මේ තරග‍යේදී බ්‍රවුන්ලීගේ ෆෝක්ලන්ඩ් කණ්ඩායම කොස්ටාරිකාව ඉදිරියේ ලකුණු 66කින් පරාජයට පත් විය. බ්‍රවුන්ලී එක ලකුණකට දැවී ගියේය.
