“හෙට ලොවට සැබෑ මිනිසුන් තනන විශිෂ්ට පාසලක් දඹුලු පුරවරයට” යන්න පෙරදැරිව රංගිරි දඹුලු විද්‍යාලයීය “රංගිරි ශිල්ප යාත්‍රා” නමින් නවමු වැඩසටහනක් ආරම්භ කර ඇත.
මෙම වැඩසටහන මඟින් ගලේවෙල කලාපයේ දුෂ්කර පාසල් සංවර්ධනයට අතහිත දීමත් සිදු කෙරේ. එකී වැඩසටහනේ නවමු අදියරක් වශයෙන් ගලේවෙල කලාපයේ අතිශය දුෂ්කර ප්‍රදේශයක පිහිටා ඇති උඩවෙලයාගම කනිෂ්ට විද්‍යාලය සංවර්ධනය කිරීම ආරම්භ කර ඇත. මෙම සංවර්ධනය තුළින් විද්‍යාලයේ භෞතික සම්පත් වගේම දරුවන්ගේ අධ්‍යාපන මට්ටම වැඩිදියුණු කිරීමට ද සැලසුම් කර ඇත.
ඒ අනුව මෙවර 2025 සාමාන්‍ය පෙළ විභාගය සඳහා පෙනී සිටීමට සිසුන් 12 දෙනකු සුදුසුකම් ලබා ඇති අතර, ඔවුන්ගේ අධ්‍යාපන මට්ටම ඉහළ නැංවීම අරමුණු කර ගනිමින් විශේෂ සම්මන්ත්‍රණ මාලාවක් ආරම්භ කර ඇත. එයට සමගාමිව අවශ්‍ය පාසල් උපකරණ ද සපයා දෙමින් ඔවුන්ගේ සාමාන්‍ය පෙළ ප්‍රතිඵල ඉහළ නැංවීම මෙම වැඩසටහනේ ප්‍රධාන අරමුණයි. මෙම වැඩසටහන මඟින් මේ වන විට උඩවෙලයාගම කනිෂ්ඨ විද්‍යාලයට අංගසම්පූර්ණ පන්ති කාමරයක් සකස් කිරීමට කටයුතු ආරම්භ කර ඇත. එම පන්ති කාමරය සඳහා අවශ්‍ය ඩෙස් පුටු රංගිරි දඹුලු විද්‍යාලයීය විද්‍යාර්ථයින් විසින්ම නිර්මාණය කිරීම තවත් සුවිශේෂී කාරණයකි.
