ජාතීන් අතර මිතුදම විදහාපාන සහජීවන සර්වාගමික ඉෆ්තාර් වැඩසටහනක් මහා සංඝරත්නය වැඩම කරවමින් සිංහල බෞද්ධ, කිතුනු දහම් පාසල් දරුවන්ගේ සහභාගිත්වයෙන් බේරුවල කිච්චිමලේ මුස්ලිම් දේවස්ථානයේදී පෙරේදා (16) පස්වරුවේ පැවැත්විණි.
මෙහිදී බේරුවල බෞද්ධ, කිතුනු හා ඉස්ලාම් දහම් පාසල්වල ඉගෙනුම ලබන සිසු දරු දැරියන් මෙන්ම ගුරුවරුන් පන්සිය දෙනකු පමණ එකට වාඩිවී ඉස්ලාම් භක්තිකයන්ගේ නෝම්බි උපවාසය අත්හැරීමේ චාරිත්‍රයට එක්වූ අතර, බේරුවල අභිනවාරාම විහාරාධිකාරී දර්ශනපති හැඩිගල්ලේ විමලසාර නාහිමියන් ප්‍රමුඛ මහා සංඝරත්නය මෙම අවස්ථාවට වැඩම කර සිටියහ. විමලසාර හිමියන් ඇතුළු ආරාධිත දේශකයන් රැසක් මෙහිදී කෙටි දෙසුම් පැවැත්වූහ.
මහනුවර කටුකැලේ ජුම්මා මුස්ලිම් දේවස්ථානයේ කළමනාකාර ඒ.ඒ.එම්. අස්ලාම් මව්ලවිතුමන් බෞද්ධ දර්ශනය හා ඉස්ලාම් ආගම පිළිබඳ දැනුම්වත් කිරීමක් සිදු කළහ. එදින පස්වරු 4.00ට ආරම්භ වූ වැඩසටහන පස්වරු 6.22 වන විට මහා සංඝරත්නය හැර සෙසු ආගම් නියෝජනය කරමින් මෙහි පැමිණ සිටි සියලු දෙනා එකතුව ආහාර අනුභව කරමින් නෝම්බි උපවාසය අත්හැරීම සිදු කළහ.
බේරුවල ප්‍රාදේශීය ලේකම් රන්ජන් පෙරේරා, බේරුවල පොලිස් ස්ථානාධිපති එම්.ආර්. නවරත්න, බේරුවල මුස්ලිම් හදිසි මරණ පරීක්ෂක එම්.එම්. නස්රීන් කිච්චිමලේ දේවස්ථාන භාරකාර මවුලවි සකි, බේරුවල හිටපු නාගරික මන්ත්‍රී අරුස් අසාද්, සමාජ ක්‍රියාකාරීන් වන චන්න දයාප්‍රිය, මොහොමඩ් හිතාම් අලි යන මහත්වරු ඇතුළු පිරිසක් මෙම අවස්ථාවට එක්ව සිටියහ.
