ග්‍රෑන්ඩ්පාස්හි ජබොස්ලේන්, කැලණිතිස්සගම දුම්රිය මාර්ගය අසලදී පසුගියදා (15) ඥාති සහෝදරයන් දෙදෙනක් තියුණු ආයුධවලින් කපාකොටා ඝාතනය කිරීමට සම්බන්ධ සැකකරුවන් 8 දෙනෙක් පෙරේදා (16) රාත්‍රී කාලය වන විට අත්අඩංගුවට පත්ව තිබේ.
එම සැකකරුවන් සමඟ ඝාතනයට යොදාගත් මන්නා පිහි දෙකක් මෙන්ම ජංගම දුරකතනයක් ද පොලිස් භාරයට ගෙන ඇත. සිද්ධියෙන් තවත් පුද්ගලයන් දෙදෙනකු තුවාල ලබා රෝහල්ගත කර තිබිණි. ඝාතනයට ලක්වූයේ සේදවත්ත, නවලෝකපුර පදිංචිව සිටි ත්‍රිරෝද රථ රියැදුරකු වූ මොහොමඩ් යාසිර් (21) හා කුලී වැඩවල නිරත වූ සිංගප්පුලිගේ මදුසංක (22) යන අයවලුන්ය. සේදවත්ත ප්‍රදේශයේදී ත්‍රිරෝද රථයක් ඇඟට කැපීමේ සිද්ධියක් මුල් කරගෙන ඝාතනයට ලක් වූ පුද්ගලයන් දෙදෙනා ඇතුළු පස් දෙනකු කැලණිතිස්සගම ප්‍රදේශයේ පුද්ගලයන් දෙදෙනකුට පහර දීම සඳහා ඉකුත්(15) අලුයම ත්‍රිරෝද රථයකින් පැමිණි අවස්ථාවේදී එම පුද්ගලයන්ගේ පාර්ශ්වයේ අය පැමිණි පිරිසට දුම්රිය මාර්ගය පසුපස එළවමින් තියුණු ආයුධවලින් ප්‍රතිප්‍රහාර එල්ල කර මෙම ඝාතනය සිදු කර ඇති බව පොලිස් විමර්ශනවලදී අනාවරණය වී ඇත.
අත්අඩංගුවට ගත් සැකකරුවන් වයස අවුරුදු 16ත් 44ත් අතර පසුවන්නන් බවත්, ඔවුන් වැල්ලම්පිටියේ පදිංචිකරුවන් බවත් ග්‍රෑන්ඩ්පාස් පොලීසිය සඳහන් කළේය. සැකකරුවන් අධිකරණයට ඉදිරිපත් කිරීමට නියමිතව තිබුණි.
