පහරදුන් අය අත්අඩංගුවට ගන්නැයි එළියේත් විරෝධයේ
පහරකෑමකට ලක්ව හලාවත රෝහලේ වාට්ටු අංක 4හි ප්‍රතිකාර ලබමින් සිටි තුවාලකරුවකු රෝහල තුළ කලහකාරී ලෙස හැසිරීම හේතුවෙන් රෝහලින් එළියට දැමීමට රෝහල් කාර්ය මණ්ඩලය පෙරේදා (16) පියවර ගෙන ඇත.
හලාවත, දැසුරුඔය පදිංචිකරුවකු වන 22 හැවිරිදි මෙම රෝගියා තවත් පුද්ගලයකු සහ කාන්තාවන් තිදෙනකු සමඟ එක්ව රෝහල ඉදිරිපිට මාර්ගයේ කොළඹ – හලාවත මාර්ගය අවහිර කරමින් තමාට පහරදුන් අය අත්අඩංගුවට ගන්නා ලෙස ඉල්ලමින් කලහකාරී ලෙස හැසිරී තිබෙන බව පොලීසිය සඳහන් කළේය. මෙහිදී හලාවත මූලස්ථාන පොලිස් ස්ථානාධිපතිවරයා ඇතුළු පොලිස් කණ්ඩායමක් එම ස්ථානයට පැමිණ මාර්ගය අවහිර වන සේ රැඳී සිටි පිරිසට මාර්ගයෙන් ඉවත්වන ලෙස දැනුම්දෙමින් පහරදීමට සම්බන්ධ සැකකරුවන් අත්අඩංගුවට ගැනීමට කටයුතු කරන බව පවසා තිබේ.
කෙසේ වෙතත් පිරිස ඊට ඇහුම්කන් නොදී පොලිස් නිලධාරීන්ට දොස් පවරමින් මාර්ගය අවහිර වන සේ තවදුරටත් රැඳී සිට ඇත. එහිදී පොලිස් නිලධාරීන් ක්‍රියාත්මක වෙමින් මාර්ගය අවහිර වන සේ රැඳී සිටි සැකකරුවන් පස් දෙනකු අත්අඩංගුවට ගෙන ඇත. ඒ අතර සිටි සැකකාර කාන්තාවක් පොලිස් නිලධාරිනියගේ අත සපා කා ජංගම දුරකතනයකින් නිලධාරිනියට පහර දී ඇති බවද පොලීසිය පැවසීය. මේ සම්බන්ධයෙන් අත්අඩංගුවට ගත් සැකකරුවන් අතර කාන්තාවන් තිදෙනකු සිටින බවත්, සැකකරුවන් අවුරුදු 22, 17, 48 සහ 55 යන වයස්වල පසුවන්නන් බවත් පොලීසිය කීය.
අත්අඩංගුවට ගත් සැකකරුවන් අතර රෝහලින් එළියට දැමූ පුද්ගලයා ද සිටියි. ඔහුට පහරදුන් අවුරුදු 22ක් වයසැති සැකකරු ද පොලීසිය පෙරේදා (16) රාත්‍රී කාලයේදී අත්අඩංගුවට ගෙන තිබේ. සැකකරුවන් සියලු දෙනාම අධිකරණයට ඉදිරිපත් කිරීමට නියමිතය.
