සෞඛ්‍ය වෘත්තීයවේදීන්ගේ සංගමය ක්‍රියාත්මක කරන පැය 24 වැඩවර්ජනය අද (18) උදේ 7 සිට ආරම්භ කරන බව එම සංගමයේ කැඳවුම්කරු රවී කුමුදේශ් මහතා පැවැසීය.
මෙවර අය-වැය යෝජනාවලින් සෞඛ්‍ය ක්ෂේත්‍රයේ දීමනා කප්පාදුවක් සහ වැටුප් තලයන්හී ගැටලුකාරී තත්ත්වයක් ඇති වූ බවත් ඒ සම්බන්ධයෙන් බලධාරීන් සමඟ පැවැති සාකච්ඡා අසාර්ථක වූ හෙයින් මෙම වැඩවර්ජනය ක්‍රියාත්මක කරන බවත් කුමුදේශ් මහතා කීවේය.
ඒ මහතා මෙසේ පැවසුවේ මුදල් අමාත්‍යාංශය සමඟ පැවැති සාකච්ඡාවලින් අනතුරුව මාධ්‍ය වෙත ඊයේ (17) අදහස් දක්වමිනි.
මුදල් අමාත්‍යාංශය සමඟ පැවැති සාකච්ඡාව අසාර්ථකයි. සෞඛ්‍ය වෘත්තියවේදින්ගේ සංගමය විදිහට මේ ප්‍රශ්නය තාක්ෂණිකව විසඳගන්න අපි උත්සාහ කළා. නමුත් මුදල් අමාත්‍යාංශය මහපු ඇඳුමක් අමාරුවෙන් අපිට අන්දන්න යනවා. ඒ ක්‍රියාමාර්ගය අපි පැය 24ක් ඇතුළත අවසන් කරනවා. මේ කාලය ඇතුළත සියලු හදිසි සහ අත්‍යාවශ්‍ය සේවාවන් සපයනවා. ළමා රෝහල්, මාතෘ රෝහල්, පිළිකා රෝහල්, වකුගඩු රෝහල්වල මේ වර්ජන ක්‍රියාත්මක වෙන්නේ නැහැ. මානසික සෞඛ්‍ය විද්‍යායතනයේ වර්ජනය ක්‍රියාත්මක වෙන්නෙත් නැහැ. අපි රජයට කියනවා, මේ වෙලාවේ මුදල් අමාත්‍යාංශයටත්, සෞඛ්‍ය අමාත්‍යාංශයටත් දේශපාලනිකව උපදේශයක් අවශ්‍යයි. මේ ෆෝමැට් එක ඇතුළේ ප්‍රශ්නය විසඳන්න බැහැ. ප්‍රශ්නය විසඳනවා නම්, මුදල් කළමනාකරණය කරමින් ප්‍රශ්නය විසඳිය යුතු ක්‍රමවේදය සම්බන්ධයෙන් අවශ්‍ය තාක්ෂණික කාරණා අපි මුදල් අමාත්‍යාංශයට පෙන්වාදී තිබෙනවා යැයිද හෙතෙම වැඩිදුරටත් කීවේය.
