වයස අවුරුදු 70ට වැඩි අඩු ආදායම්ලාභීන්ගේ රුපියල් 3,000 දීමනාව මේ 20 දා තැපැල් කාර්යාල ඔස්සේ ගෙවීමට කටයුතු යොදා තිබේ.
2024 වසරේ නොවැම්බර් මස සිට හිඟ දීමනා සහිතව මෙම ගෙවීම් කටයුතු සිදු කරන බව වැඩිහිටි මහලේකම් කාර්යාලයේ අධ්‍යක්ෂ චතුර මිහිදුම් මහතා පැවැසීය.
අස්වැසුම්ලාභී වැඩිහිටියන්ට එම දීමනාව සුබසාධක ප්‍රතිලාභ මණ්ඩලය විසින් ස්ලිප් ක්‍රමය මඟින් සෘජුවම අස්වැසුම් ගිණුම්වලට ගිණුම්ගත කිරීමට පියවර ගන්නා බව ද ඒ මහතා කියා සිටියේය.
ඒ අනුව මෙතෙක් දීමනාව ලබමින් සිටි අස්වැසුම නොලබන පවුල්හි වැඩිහිටියන්ට පමණක් තැපැල්, උප තැපැල් කාර්යාල මඟින් හිඟ දීමනා සහිතව මුදල් ලබා ගැනීමට හැකියාව ලැබෙන බව ද හෙතෙම කීවේය.
මේ මඟින් දුෂ්කර ප්‍රදේශයන්හි ප්‍රතිලාභීන්ට අපහසුතාවකින් තොරව මුදල් ලබාගැනීමට හැකි බව ද චතුර මිහිදුම් මහතා සඳහන් කළේය.
