ගම්මානවලට කඩාවැදී ඇති වනඅලි රංචු නැවත වනාන්තර වෙත පලවා හැරීමේ පුත්තලම දිස්ත්‍රික්කයේ මෙහෙයුම ආඩිගම විල්පොත ප්‍රදේශයෙන් ආරම්භ කළ බව වනජීවි සංරක්ෂණ දෙපාර්තමේන්තුවේ පුත්තලම දිස්ත්‍රික් සහකාර අධ්‍යක්ෂ එරන්ද ගමගේ මහතා පැවසීය.
ඒ අනුව වනජීවි නිලධාරින් සමඟ ගුවන් හමුදාවේ ඩ්‍රෝන යානා තාක්ෂණය ද යොදා ගනිමින් නාවික හමුදාව,සිවිල් ආරක්ෂක දෙපාර්තමේන්තුවේ භට කණ්ඩායම් සමඟ ජනතාවගේ සහාය ලබා ගනිමින් මේ මෙහෙයුම් ආරම්භ කර ඇත.මේ මෙහෙයුම්වලට වනජීවි නිලධාරින් ඇතුළු ආරක්ෂක අංශ නිලධාරිහු 150කට අධික පිරිසක් එක්ව සිටියහ.
අලි මෙහෙයුමේ ආරම්භක අවස්ථාවට රාජ්‍ය පරිපාලන හා පළාත් පාලන හා පළාත් සභා අමාත්‍ය ආචාර්ය චන්දන අබේරත්න මහතා සමඟ පුත්තලම දිස්ත්‍රික් ලේකම් එච්.එම්.එස්.පී.හේරත් මහතා සමඟ අතිරේක දිස්ත්‍රික් ලේකම් චතුරක ජයසිංහ ඇතුළු මහත්වරු එක්වූහ.
ගම්මානවලට කඩාවැදුණු අලි රංචු නැවත තබ්බෝව අභයභුමිය හරහා විල්පත්තුව ජාතික වන උද්‍යානයට නැවත පලවා හැරීම අප්‍රේල් 10 වැනි දින දක්වා ක්‍රියාත්මක කිරීමට සැලසුම් කර ඇති බව වනජීවි සහකාර අධ්‍යක්ෂවරයා පැවසීය.
ගම්වැදුණ වනඅලි පලවා හැරීමට එක්වු නිලධාරීන් කණ්ඩායම් කිහිපයකට බෙදා ඒ අනුව අදාළ කලාපවල සිටින වනඅලි ක්‍රමානුකුලව පන්නා දැමීමට නියමිත බව පැවසීය.
