එකම පාසලේ එකම පන්තියේ, එකම විශ්වවිද්‍යාලයේ එකම කණ්ඩායමේ, එකම ගමේ පදිංචි සමීපතම මිතුරන් දෙදෙනකුට, එකම දවසක යාබද දිස්ත්‍රික්ක දෙකෙහි දිස්ත්‍රික් ලේකම්වරුන් ලෙස පත්වීම් ලැබීමේ අපූරු පුවතක් වාර්තා වේ.
මෙවන් අපූරු භාග්‍යය ලැබූ කල්‍යාණ මිතුරන් දෙදෙනා වන්නේ කුරුණෑගල සහ කෑගල්ල නව දිස්ත්‍රික් ලේකම්වරු වශයෙන් පත්වීම් ලද චන්දන දිසානායක සහ එච්.එම්. හේරත් යන දෙදෙනායි.
දෙදෙනාම කුරුණෑගල ශාන්ත ආනා විදුහලේ එකට අධ්‍යාපනය ලැබූවන්ය. චන්දන දිසානායක මහතා පළමුවැනි වසරේ සිටම ශාන්ත ආනා විදුහලේ අධ්‍යාපනය ලබා තිබූ අතර එච්.එම්. හේරත් මහතා නාරම්මල මයුරපාද මධ්‍ය මහා විද්‍යාලයෙන් මූලික අධ්‍යාපනය ලබා සාමාන්‍ය පෙළ සමත්ව පසුව උසස් පෙළ අධ්‍යාපනය සඳහා ශාන්ත ආනා විදුහලට ඇතළත්ව ඇත.
ඉන් අනතුරුව දෙදෙනාම උසස් පෙළ ජීව විද්‍යා විෂයයන් හැදෑරීම සඳහා පාසලේ එකම පන්තියක අධ්‍යාපනය ලැබීම හේතුවෙන් සමීපතම මිතුරන් බවට පත්ව තිබේ. පළමු වාරයෙන්ම උසස් පෙළද හොඳින් සමත් වූ මේ මිතුරන් දෙදෙනා ඉන් පසුව ජයවර්ධනපුර විශ්වවිද්‍යාලයට එකට ඇතුළත්ව එකම කණ්ඩායමේ විද්‍යා අංශයෙන් අධ්‍යාපනය හදාරා විද්‍යාවේදී උපාධිය හිමි කරගෙන තිබේ.
විශ්වවිද්‍යාල අධ්‍යාපනය නිම කළ දෙදෙනා ඉන් පසුව පරිපාලන තරග විභාගයෙන් සමත්ව ශ්‍රී ලංකා පරිපාලන සේවයට ඇතුළත් වූහ. චන්දන දිසානායක මහතා 2000 වසරේදී පරිපාලන සේවයට පිවිස කන්තලේ, දඹුල්ල, ගලේවෙල සහකාර ප්‍රාදේශීය ලේකම් වශයෙන්ද වසර කිහිපයක්ම කටයුතු කර ඉන් පසුව පළාත් සභා රාජ්‍ය සේවයට ඇතුළත් විය. ඒ අනුව වයඹ පළාත් සභාවේ පළාත් පාලන කොමසාරිස්, සමාජ සේවා අධ්‍යක්ෂ, කෘෂිකර්ම අමාත්‍යාංශයේ අතිරේක ලේකම් සහ ලේකම් තනතුරුද දරා පසුව වයඹ පළාත් සභාවේ ප්‍රධාන අමාත්‍යාංශයේ ලේකම් යන තනතුරද දැරීය. ඒ වනවිටද වයඹ පළාත් සභාවේ ජ්‍යෙෂ්ඨතම නිලධාරියාව සිටි ඔහු ශ්‍රී ලංකා පරිපාලන සේවයේ විශේෂ ශ්‍රේණියේ සිටින නිලධාරියෙකි.
විශ්වවිද්‍යාලයෙන් පිටවූ එච්.එම්. හේරත් මහතා 2003 වසරේදී ශ්‍රී ලංකා පරිපාලන සේවයට එක්ව ඇත. තිරප්පනේ, එප්පාවල, කැබිතිගොල්ලෑව වැනි ප්‍රදේශවල ප්‍රාදේශීය ලේකම්වරයා ලෙස සේවය කළ ඔහු පසුව කුරුණෑගල මහව ප්‍රාදේශීය ලේකම්වරයා ලෙසද සේවය කර ඇත. ඉන් අනතුරුව මධ්‍යම රජයේ තවත් උසස් තනතුරු කිහිපයක්ම දරා අවසානයේදී කෑගල්ල දිස්ත්‍රික් ලේකම් තනතුරට පත් කරන තෙක් රාජ්‍ය පරිපාලන අමාත්‍යාංශයේ අතිරේක ලේකම්වරයකු ලෙස කටයුතු කරමින් සිටියේය. ඔහුද ශ්‍රී ලංකා පරිපාලන සේවයේ විශේෂ ශ්‍රේණියේ නිලධරයෙකි.
ඒ අනුව පාසල් වියෙහි සිටම එකට සිටි, එකම වයසේ පසුවන මේ අපූරු මිතුරන් දෙදෙනාම පසුගියදා කුරුණෑගල සහ කෑගල්ල නව දිස්ත්‍රික් ලේකම්වරුන් වශයෙන් පත්වීම් ලැබූ අතර දෙදෙනා නව තනතුරුවල රාජකාරි ආරම්භ කිරීමට නියමිතව තිබුණි.
