මහජන මුදල් නාස්ති කරන, පගා ගහන මන්ත්‍රීවරු වෙනුවට, ජනතාව වෙනුවෙන් ස්වේච්ඡාවෙන් වැඩ කරන, රට හදන ක්‍රියාවලියට දායක වන ජාතික ජන බලවේගයේ නියෝජිතයන්ගෙන් සමන්විත නගර සභා, ප්‍රාදේශීය සභා සෑදිය යුතු බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පැවසීය.
ජාතික ජන බලවේගය නියෝජනය කරමින් එළඹෙන පළාත් පාලන මැතිවරණය සඳහා තරග වදින කණ්ඩායම්වල නාම යෝජනාපත්‍ර අත්සන් තැබීම බත්තරමුල්ල, පැලවත්ත ජනතා විමුක්ති පෙරමුණු ප්‍රධාන කාර්යාලයේදී ඊයේ (17) සිදු කෙරුණු අතර එහිදී ඒ මහතා මේ බව කීවේය.
වැඩිදුරටත් අදහස් දැක්වූ ටිල්වින් සිල්වා මහතා-
“මීට පෙර තමයි මේ පළාත් පාලන මැතිවරණය පැවැත්වීමට තිබුණේ. මේ වනවිට මහින්ද රාජපක්ෂලා, රනිල් වික්‍රමසිංහලා ජනතාව විසින් ප්‍රතික්ෂේප කර තිබෙනවා. මෙම මැතිවරණයෙන් අපට විශාල ජයග්‍රහණයක් ලබා ගන්න පුළුවන්.
පළාත් පාලන මැතිවරණයේදී බිම් මට්ටමේ මහජන නියෝජිතයන් පත්කර ගන්නවා. ජාතික ජන බලවේගයේ ආණ්ඩුවක් යටතේ ඡන්දයක් තියෙන පළමු අවස්ථාව මෙයයි. ආණ්ඩුවේ සංවර්ධන කටයුතු සිදු කිරීමේදී බිම් මට්ටමේ නියෝජිතයන් ඉතා වැදගත්.
පළාත් පාලන ආයතනවල ආණ්ඩුවේ සංවර්ධන කටයුතු කරගෙන යෑමේදී අපේ කණ්ඩායමක් සිටීම ඉතා වැදගත්. මේ වන විට ආරම්භකර තිබෙන සංවර්ධන කටයුතු, රට හැදීමේ කටයුතු, රටේ දුප්පත්කම තුරන් කිරීමේ කටයුතු, සාර්ථකව කරගෙන යෑමට සියලුම පළාත් පාලන ආයතන ජාතික ජන බලවේගය ජයග්‍රහණය කරවීම වැදගත්. මේ වනවිට රටේ ජනතාව අපට විශාල බලයක් ලබාදී තිබෙනවා. ඔවුන් අපත් සමඟ සිටිනවා.
වංචා දූෂණ නැති, කොන්ත්‍රාත් ගන්නේ නැති, බිම් මට්ටමේ ජනතාව සමඟ ජීවත් වන,ස්වේච්ඡාවෙන් අවංකව වැඩ කළ හැකි ප්‍රබල කණ්ඩායමක් අප මෙම පළාත් පාලන මැතිවරණයට ඉදිරිපත් කර තිබෙනවා. පසුගිය කාලවල සිටි මන්ත්‍රීවරු කොන්ත්‍රාත් මත ජීවත් වුණා. ඔවුන් මහජන මුදල් නාස්ති කළ අය. ඒ නිසා අප ජනතාවගෙන් ඉල්ලන්නෙ මාලිමාව ජයග්‍රහණය කරවන ලෙස. පාර්ලිමේන්තුවෙන් අප ආරම්භ කළ දේශපාලන සංස්කෘතිය බිම් මට්ටම දක්වා ගෙන යෑමට මේ පළාත් පාලන ඡන්දය ඉතා වැදගත්.”
ජාතික ජන බලවේගයේ ලේකම්, පාර්ලිමේන්තු මන්ත්‍රී නිහාල් අබේසිංහ මහතා-
“මෙවර පළාත් පාලන මැතිවරණය සඳහා ජාතික ජන බලවේගය අද දිස්ත්‍රික්ක සියල්ලටම නාම යෝජනාපත්‍ර අත්සන් කිරීම ආරම්භ කළා. මෙම මැතිවරණය අපට ඉතා තීරණාත්මකයි. අපේ ප්‍රතිපත්ති ප්‍රකාශනය මඟින් අප ඉදිරිපත් කළ ප්‍රතිපත්ති සෑහෙන ප්‍රමාණයක් ක්‍රියාත්මක කරමින් සිටිනවා.
ජනතාවගේ දැවෙන ප්‍රශ්නවලට පිළිතුරු සපයමින් සිටිනවා. ඒ පිළිබඳව ඇතැමුන් විවිධ මත පළ කරනවා. අප උත්සාහ කරනවා රාජ්‍ය යන්ත්‍රණය ශක්තිමත් කිරීම හරහා ජනතාවගේ අවශ්‍යතා ඉෂ්ට කරන්න. අවුරුදු ගණනාවක් විනාශ වූ රටක් අප භාර ගත්තේ. අප කරන්නේ උඩුගං බලා පිහිනීමක්.
මෙරට ජනතාව මෙම පළාත් පාලන මැතිවරණයෙන්ද ජාතික ජන බලවේගය ජයග්‍රහණය කරවන බව අප විශ්වාස කරනවා. ඒ බලාපොරොත්තු ඇතිව තමයි අප මෙම මැතිවරණයට මුහුණ දෙන්නේ. මෙම පළාත් පාලන මැතිවරණයෙන් පසු අපට නගර සභාවල, ප්‍රාදේශීය සභාවල අපගේ මන්ත්‍රීවරුන් සමඟ මෙරට ජනතාව වෙනුවෙන් විශාල කාර්යභාරයක් ඉටු කළ හැකියි. අප දුන් පොරොන්දු ඉටුකරමින් ඉදිරි වසර 5තුළ මේ රට තුළ විශාල වෙනසක් සිදු කරන්න අප බලාපොරොත්තු වෙනවා. අප මේ රටේ සියලු ජනතාවගෙන් ඉල්ලන්නෙ ජාතික ජන බලවේගයේ ජයග්‍රහණය සමඟ එකතු වන ලෙස.”
ජාතික ජන බලවේගයේ කොළඹ මහ නගර සභා කණ්ඩායම් නායිකා ව්‍රායි කැලී බල්තසාර් මහත්මිය-
“අපට ශක්තිමත් කණ්ඩායමක් සිටිනවා. අප කණ්ඩායමක් ලෙස තමයි ඉදිරියේදී නගර, රට වෙනස් කරන්නේ. මේ වනවිට පැවැති දේශපාලන සංස්කෘතිය වෙනස් වී තිබෙනවා. මහජන නියෝජිතයා කොහොමද ක්‍රියා කරන්නේ කියා අපේ කණ්ඩායම මේ වනවිට ඔප්පු කර තිබෙනවා. අප ජනතාවට ආරාධනා කරනවා මාලිමාව දිනවන්න කියා.”
ජාතික ජන බලවේගයේ කඩුවෙල මහ නගර සභා කණ්ඩායම් නායක රංජන් ජයලාල් මහතා-
“කඩුවෙල කියන්නේ විශාල ජනතාවක් සිටින ප්‍රදේශයක්. අප වගකීමක් ඉෂ්ට කරන්න සූදානම්. ජනතාවගේ සිතුම් පැතුම් ඉටු කළ යුතුයි. මේ වනවිට කඩුවෙල ජනතාවට මහ නගර සභාවෙන් සාධාරණය ඉටු වෙලා නැහැ. අපි ජනතාවට සාධාරණය ඉටු කරනවා. කඩුවෙල අනෙක් කණ්ඩායම් අනාථ වෙලා. කඩුවෙලින් අප රටට විශාල ආදර්ශයක් දෙනවා.”
ඡායාරූප- ශාන් රඹුක්වැල්ල
