සත්ව ආහාර නිෂ්පාදනය හා අනෙකුත් කර්මාන්ත සඳහා බඩඉරිඟු ආනයනය කිරීමට ගනු ලැබූ තීරණය ඉක්මනින්ම ක්‍රියාත්මක කරන්නැයි සමස්ත ලංකා කුකුළු ව්‍යාපාරිකයන්ගේ සංගමයේ සභාපති මාතලී ජයසේකර මහතා රජයෙන් ඉල්ලීමක් කළේය.
කෘෂිකර්ම, පශු සම්පත්, ඉඩම් සහ වාරිමාර්ග ඇමැති කේ. ඩී. ලාල්කාන්ත මහතාගේ ප්‍රධානත්වයෙන් ඉකුත්දා එම අමාත්‍යාංශයේ උපදේශක කාරක සභාව පාර්ලිමේන්තුවේදී රැස්වී සිදු කළ සාකච්ඡාවේදී පිටරටින් බඩඉරිඟු ගෙන්වීම සම්බන්ධයෙන් තීරණයක් ගෙන තිබේ.
සත්ත්ව ආහාර නිෂ්පාදනය සඳහා වසර 2024 සිට 2025 ජනවාරි 31 වැනිදා දක්වා බඩඉරිඟු මෙට්ට්‍රික්ටොන් 275,000කට ආසන්න ප්‍රමාණයක් ආනයනය කර ඇති බව එම සාකච්ඡාවේදී නිලධාරිහු අවධාරණය කර ඇත.
මෙරට වාර්ෂික බඩඉරිඟු අවශ්‍යතාව මෙට්ට්‍රික් ටොන් ලක්ෂ 6ක් බවත් එම ප්‍රමාණය රටින් සපයා ගැනීමට නොහැකි බවත් මෙහිදී අනාවරණය වී ඇත.
මේ වන විට රට තුළ නිපදවන බඩඉරිඟු ඇතැම් ජාවාරම්කරුවන් විසින් කිලෝවක් රුපියල් 130ත් 140ත් වැනි මිලකට මිලදී ගෙන තොග රැස්කරගෙන සිංහල හින්දු අලුත් අවුරුදු සමයේ කිලෝවක් රුපියල් 200ක් වැනි මිලිකට අලෙවි කිරීමට උත්සහයක් පවතින බවත් පැවසීය.
ඒ හේතුවෙන් බිත්තර සහ කුකුළු මස්වල මිලද උත්සව සමයේ ඉහළ යෑමට විශාල වශයෙන් බලපෑමක් ඇති කරනු ඇති බවත් සත්ත්ව ආහාර නිෂ්පාදකයෝ සඳහන් කරති.
මෙම ජාවාරම්කරුවන් සිදුකරගෙන යන එම ක්‍රියාවලිය වැළැක්වීම සඳහා බඩඉරිඟු ආනයනය කිරීම තුළින් මිල පාලනයක් ඇති වන බවත් එම නිසා ඇමැතිවරයා ගත් තීරණය ඉතාම යහපත් බවත් මාතලී ජයසේකර මහතා ප්‍රකාශ කළේය.
