දකුණු කොරියාවේ E-8 කාණ්ඩය යටතේ රැකියා ලබා දෙන බව පවසමින් ශ්‍රී ලංකාවේ විවිධ ප්‍රදේශවල පුද්ගලයින්ගෙන් රුපියල් ලක්ෂ 30කට වැඩි මුදලක් වංචා කරමින් කටයුතු කළ පුද්ගලයකු, ශ්‍රී ලංකා විදේශ සේවා නියුක්ති කාර්යාංශයේ විශේෂ විමර්ශන අංශයේ නිලධාරින් විසින් කුරුණෑගල දී අත්අඩංගුවට ගෙන තිබේ.
මෙම සැකකරු සම්බන්ධයෙන් දිවයිනේ විවිධ පොලිස් ස්ථාන වෙත පැමිණිලි ලැබී ඇති අතර, ඔහු අධිකරණ නියෝග පැහැර හරිමින් සිටි පුද්ගලයකු බව විමර්ශනවලදී අනාවරණය වී ඇත.
මොහු E-7 හා E-8 යන කාණ්ඩවල රැකියා ලබා දෙන බව පවසමින් මෙලෙස මුදල් ලබා ගෙන එම රැකියා ලබා නොදී, ප්‍රදේශයෙන් පලාගොස් සැඟව සිටිය දී මෙසේ අත්අඩංගුවට ගෙන තිබේ.
විශේෂ විමර්ශන අංශයේ කළමනාකරු වෙත ලද බුද්ධි තොරතුරක් මත මෙම මෙහෙයුම ක්‍රියාත්මක කරමින් අදාළ සැකකරු අත්අඩංගුවට ගෙන තිබෙන අතර සැකකරුට එරෙහිව ගාල්ල අධිකරණයේ නඩුවක් විභාග වෙමින් තිබූ හෙයින් ඔහු එදිනම සවස ගාල්ල මහේස්ත්‍රාත් අධිකරණය වෙත ඉදිරිපත් කළ බව ශ්‍රී ලංකා විදේශ සේවා නියුක්ති කාර්යාංශය පවසයි.
එහිදී සැකකරු මාර්තු මස 27 දක්වා රක්ෂිත බන්ධනාගාරගත කිරීමට මහේස්ත්‍රාත්වරයා නියෝග කර තිබෙන අතර මීට අමතරව සැකකරුට එරෙහිව ඇති තවත් පැමිණිලි 3 ට අදාළව නඩු 3 ක්ද කාර්යාංශය විසින් ගොනුකිරීමට නියමිතයි.
දකුණු කොරියාවේ E-8 කාණ්ඩයේ රැකියා ලබා දීම සඳහා කිසිදු පුද්ගලයකුට හෝ ආයතනයකට මේ වනතෙක් අනුමැතිය හිමි වී නොමැති බැවින්, එම රැකියා ලබා දෙන බව පවසා මුදල් ඉල්ලා සිටින කිසිදු අයෙකුට මුදල් හෝ ගමන් බලපත්‍ර ලබා දීමෙන් වළකින මෙන් ශ්‍රී ලංකා විදේශ සේවා නියුක්ති කාර්යාංශය මහජනතාවගෙන් ඉල්ලා සිටී.
එසේ මුදල් අයකරන පුද්ගලයින් පිළිබඳව තොරතුරු දන්නේ නම් කාර්යාංශයේ පැය 24 තොරතුරු මධ්‍යස්ථානයේ ක්ෂණික ඇමතුම් අංකය වන 1989 ඇමතීම මඟින් හා කාර්යාංශයේ විශේෂ විමර්ශන අංශයේ දුරකතන අංකය වන 0112 864241 ඇමතීම මඟින් තොරතුරු ලබා දෙන ලෙස එම කාර්යාංශය වැඩිදුරටත් ඉල්ලීමක් කරයි.
