බගවන්තලාව පොලිස් වසමට අයත් තෙරේසියා වතුයායේ නිවසක දින කීහිපයකට පෙර මියගොස් සිටි අඹුසැමි යුවළකගේ සිරුරු සොයා ගත් බව බගවන්තලාව පොලීසිය කියයි.
මෙසේ සොයාගනු ලැබුවේ සින්නයියා විජේකුමාර් (39) සහ පෙරුමාල් ගෞරු (37) යන අයගේ සිරුරුයි.ඉකුත්දා (14) සිට තම සොහොයුරාගේ සහ ඔහුගේ බිරිය දැකීමට නොසිටි බවත්, ඒ අනුව නිවස විවෘත කර බැලීමේදි නිවසෙන් දුර්ගන්ධයක් ආ නිසා ඒ සම්බන්ධයෙන් විපරම් කිරීමේදී අඹුසැමි යුවළ නිදාසිටි ඇඳ මත මියගොස් සිටි බව මරණකරුගේ සොහොයුරා ප්‍ර‍කාශයක් ලබාදී ඇතැයි ද පොලීසිය කියයි.මරණය සම්බන්ධයෙන් පරීක්ෂණ පවත්වන බගවන්තලාව පොලීසියේ නිලධාරීන් සහ හැටන් පොලිස් කොට්ඨාසයේ ස්ථාන පරීක්ෂක නිලධාරීන් විසින් නිවසේදී වස බෝතල් තුනක් සොයාගෙන ඇති අතර මෙය වස පානය කර සියදිවි හානි කර ගැනීමක් බවට පොලිසිය සැක කරයි. මියගිය කාන්තාව මීට ප්‍රථම විවාහ වී ඇති කාන්තාවක් බවත්,මරණකාරියට අවු 14ක දියණියක් සිටින අතර,ඇය මියගිය කාන්තාවගේ සොහොයුරිය භාරයේ සිටින බවත් පොලීසිය පවසයි.
වස පානය කර මියයෑමට හේතුව මෙතෙක් අනාවරණය කරගෙන නැති අතර,අඹුසැමි යුවළගේ සිරුරු පශ්චාත් මරණ පරීක්ෂණයට දික්ඔය මුලික රෝහලේ විශේෂඥ අධිකරණ වෛද්‍යවරයා වෙත යොමු කර ඇත.
