සැඟව සිටීමට උදවු කරන අයටත් නීතිය ක්‍රියාත්මක කරන්න
රිට් පෙත්සමේ තීන්දුව ප්‍රකාශය කල් තබන්නැයි ඉදිරිපත් කළ මෝසමත් ඉවතට
වැලිගම “W 15” හෝටලයට වෙඩි ප්‍රහාරයක් එල්ල කිරීමේ සිද්ධිය:
වැලිගම ÒW 15Ó හෝටලයට වෙඩි ප්‍රහාරයක් එල්ල කිරීමේ සිද්ධියට අදාළව පොලිස්පති දේශබන්දු තෙන්නකෝන් මහතා අත්අඩංගුවට ගන්නා
ලෙස නියෝග කරමින් මාතර මහේස්ත්‍රාත් අධිකරණය විසින් දී ඇති නියෝගය නීත්‍යනුකූල බවට තීරණය කළ අභියාචනාධිකරණය වහාම ඔහු අත්අඩංගුවට ගෙන අධිකරණයට ඉදිරිපත් කරන ලෙසට වැඩබලන පොලිස්පතිවරයා ඇතුළු බලධාරීන්ට ඊයේ (17) නියම කළේය.
එසේම අධිකරණය මඟහරිමින් මෙතෙක් ඔහුට සැඟවී සිටීමට ආධාර අනුබල දෙන අයට එරෙහිව නීතිමය පියවර ගන්නා ලෙසට මාතර මහේස්ත්‍රාත්වරයාට නියම කෙරිණ.
මාතර මහේස්ත්‍රාත් අධිකරණය විසින් ඉකුත් පෙබරවාරි මස 27 වැනිදා නිකුත් කළ එම නියෝග බල රහිත කරන ලෙස ඉල්ලා පොලිස්පති දේශබන්දු තෙන්නකෝන් මහතා ඉදිරිපත් කළ රිට් පෙත්සම නඩු ගාස්තුවට යටත්ව නිෂ්ප්‍රභ කරමින් අභියාචනාධිකරණය විසින් මෙම නියෝගය කරන ලදි.
අදාළ නියෝගය ප්‍රකාශ කිරීම කල් තබන ලෙස ඉල්ලා පෙත්සම්කාර පොලිස්පති දේශබන්දු තෙන්නකෝන් මහතා සිය නීතිඥවරුන් මඟින් ඉදිරිපත් කළ මෝසමක් ප්‍රතික්ෂේප කරමින් මෙම නියෝගය ප්‍රකාශයට පත් කෙරිණ.
අදාළ නියෝගය ප්‍රකාශයට පත් කිරීම සඳහා එම රිට් පෙත්සම කැඳවූ අවස්ථාවේදී පෙත්සම්කාර පොලිස්පති දේශබන්දු තෙන්නකෝන් මහතා වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා සඳහන් කළේ මෙම නඩු තීන්දුව ප්‍රකාශ කිරීම කල් තබන ලෙස ඉල්ලා තමන් විසින් මෝසමක් ඉදිරිපත් කරනු ලැබූ බවය.
සිය සේවාදායකයා අත්අඩංගුවට ගැනීම සඳහා වූ නියෝගයට අදාළව මාතර මහේස්ත්‍රාත් අධිකරණයේ විභාග වන නඩු ගොනුව මීට පෙර අභියාචනාධිකරණයට ඉදිරිපත් කර නොතිබූ බවය.
එය මේ වන විට තමන් විසින් අභියාචනාධිකරණයට ගොනු කර තිබීම නිසා එය සැලකිල්ලට ගන්නා තෙක් මෙම පෙත්සම පිළිබඳ නියෝගය ප්‍රකාශයට පත් කිරීම කල් තබන ලෙස අදාළ මෝසම මඟින් ඉල්ලා ඇති බවද ජනාධිපති නීතිඥවරයා සඳහන් කළේය.
එම ඉල්ලීමට දැඩි විරෝධය පළ කරන බව නීතිපතිවරයා ඇතුළු වගඋත්තරකරුවන් වෙනුවෙන් පෙනී සිටි අතිරේක සොලිස්ටර් ජනරාල් දිලීප පීරිස් මහතා එහිදී සඳහන් කළේය.
මෙම පෙත්සම පිළිබඳව දෙපාර්ශ්වය විසින් ඉදිරිපත් කළ කරුණු පසුගිය 12 වැනිදා අභියාචනාධිකරණයේ පූර්ණ සැලකිල්ලට ලක් කිරීමෙන් අනතුරුව අදාළ තීන්දුව ප්‍රකාශ කිරීමට දින නියම කර තිබූ බව අතිරේක සොලිසිටර් ජනරාල්වරයා පෙන්වා දුන්නේය.
පෙත්සම සම්බන්ධයෙන් වෙනත් ලියකියවිලි කිසිවක් ඉදිරිපත් කිරීමට පෙත්සම්කාර පාර්ශ්වයෙන් එම අවස්ථාවේදී ඉල්ලීමක් සිදු නොකෙරුණු අතර මුල් නඩු ගොනුව ඉදිරිපත් නොකිරීම සම්බන්ධයෙන් කරුණු තමන් විසින් විරෝධතා ලෙස ඉදිරිපත් කළ බවද අතිරේක සොලිසිටර් ජනරාල්වරයා සඳහන් කළේය.
එසේම අදාළ මෝසම පෙරවරු 8.45ට තමන්ට ලැබුණු බව සඳහන් කළ අතිරේක සොලිසිටර් ජනරාල්වරයා ඉකුත් 12 වැනිදා අදාළ තීන්දුව ප්‍රකාශ කිරීම කල් තැබීමෙන් අනතුරුව එවැනි මෝසමක් ගොනු කිරීම සඳහා ඕනෑ තරම් කාලය පෙත්සම්කරුට තිබූ බවද පෙන්වා දුන්නේය.
එසේ තිබියදී මෙවැනි මෝසමක් ඉදිරිපත් කිරීම නීතිය අවභාවිත කිරීමට සහ නීතිය ආපසු හැරවීමට කරන උත්සාහයක් බවට පෙන්වා දුන් ඒ මහතා එවැනි උත්සාහයන්ට කිසිදු අවස්ථාවක අධිකරණය විසින් අවසර ලබා නොදිය යුතු බවද අවධාරණය කළේය.
එබැවින් මෙම මෝසම ඉවත දමා පෙත්සම සම්බන්ධයෙන් වන අභියාචනාධිකරණ නියෝගය එම අවස්ථාවේදීම ප්‍රකාශ කරන ලෙස අතිරේක සොලිසිටර් ජනරාල්වරයා අධිකරණයෙන් ඉල්ලා සිටියේය.
එහිදී පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා සඳහන් කළේ මෙම වෙඩි තැබීමේ සිද්ධියට අදාළව සෙසු සැකකරුවන් අත්අඩංගුවට නොගන්නා ලෙසට අධිකරණයේදී ඇති කරගත් එකඟතාව අනුව කටයුතු කරන ලෙස නීතිපතිවරයා විසින් අපරාධ පරීක්ෂණ දෙපාර්තමේන්තුවට උපදෙස් ලබා දී ඇති බවට සඳහන් කරමින් පොලිස් මාධ්‍ය ඒකකය විසින් නිවේදනයක් නිකුත් කර ඇති බවය.
එම එකඟතාව අනුව සිය සේවාදායකයා සම්බන්ධයෙන්ද කටයුතු කළ යුතු බවට ජනාධිපති නීතිඥවරයා එහිදී සඳහන් කළේය.
එහිදී අතිරේක සොලිස්ටර් ජනරාල්වරයා සඳහන් කළේ එම සැකකරුවන් විසින් ඉදිරිපත් කරනු ලැබූ පෙත්සමකට අදාළව මීට පෙර අධිකරණය හමුවේ ඇති කර ගත් එකඟතාවක් පිළිබඳව පොලිස් මාධ්‍ය ඒකකය විසින් එම නිවේදනය නිකුත් කර ඇති බවය.
මෙම පොලිස් මාධ්‍ය නිවේදනයේ පිටපතක්ද ජනාධිපති නීතිඥවරයා අධිකරණයට ඉදිරිපත් කළේය.
එය පරීක්ෂාවට ලක් කළ අභියාචනාධිකරණයේ වැඩබලන සභාපති විනිසුරු ලෆාර් තාහීර් මහතා කියා සිටියේ එම නිවේදනයේ සඳහන් වන ආකාරයට තම අධිකරණය විසින් එවැනි නියෝගයක් නිකුත් කර නැති බවය.
ඒ පිළිබඳව කරුණු ඉදිරිපත් කළ අතිරේක සොලිස්ටර් ජනරාල්වරයා
අදාළ නඩුව සම්බන්ධයෙන් මහේස්ත්‍රාත් අධිකරණය නියෝගය ලබා දීමට පෙර එම එකඟතාව ඇතිකර ගත් බව පෙන්වා දුන්නේය.
මේ වන විට එම නඩුව සම්බන්ධයෙන් මහේස්ත්‍රාත් අධිකරණය විසින් නියෝගයක් ලබා දී ඇති බැවින් එම අධිකරණ නියෝගයට අවනතව කටයුතු කළ යුතු බව අතිරේක සොලිසිටර් ජනරාල්වරයා සඳහන් කළේය.
එබැවින් මීට පෙර ඇතිකර ගත් එකඟතාව අනුව තවදුරටත් කටයුතු කළ නොහැකි බවට පෙන්වා දුන් අතිරේක සොලිසිටර් ජනරාල්වරයා ඒ බව අධිකරණයට දැනුම් දෙන ලෙස නීතිපතිවරයා වෙනුවෙන් පෙනී සිටින කනිෂ්ඨ නීතිඥවරයාට උපදෙස් ලබා දෙන බවද සඳහන් කළේය.
එම එකඟතාව තවදුරටත් ක්‍රියාත්මක නොවන බවද නීතිපතිවරයා විසින් එය ඉවත් කරගෙන ඇති බවද ප්‍රකාශ කළ ඒ මහතා මෙම නිවේදනය නිකුත් කිරීම සම්පූර්ණයෙන්ම මාධ්‍ය සංදර්ශනයක් බවට චෝදනා කළේය.
පෙත්සම්කරු අදාළ අධිකරණ නියෝගය නිකුත් කළ දින සිට අධිකරණය මඟහරිමින් සැඟව සිටින බවට අතිරේක සොලිසිටර් ජනරාල්වරයා පෙන්වා දුන්නේය.
ප්‍රකාශයට පත් කිරීමට නියමිත නඩු තීන්දුවට බලපෑමක් සිදු කිරීමේ අරමුණින් මාධ්‍ය හරහා ප්‍රචාරය කිරීමට මෙම නිවේදනය නිකුත් කර ඇති බවද අතිරේක සොලිසිටර් ජනරාල්වරයා පෙන්වා දුන්නේය.
කෙසේ වුවද වෙනත් පෙත්සම් විභාගයකදී අධිකරණයේදී ඇතිකර ගත් එකඟතාව පෙත්සම්කරුට බල නොපාන බව සඳහන් කළ අතිරේක සොලිස්ටර් ජනරාල්වරයා පෙත්සම සම්බන්ධ වන නියෝගය නියම කළ පරිදි ප්‍රකාශ කරන ලෙස විනිසුරු මඬුල්ලෙන් ඉල්ලා සිටියේය.
දෙපාර්ශ්වය ඉදිරිපත් කළ කරුණු සලකා බැලීමෙන් අනතුරුව මෙම මෝසම ප්‍රතික්ෂේප කරමින් නියෝගය ප්‍රකාශ කිරීමට තීරණය කරන බව වැඩබලන සභාපති විනිසුරු මොහොමඩ් ලෆාර් තාහීර් මහතා ප්‍රකාශ කළේය.
ඒ අනුව අභියාචනාධිකරණ විනිසුරු සරත් දිසානායක මහතාගේ එකඟත්වයෙන් යුතු අදාළ නියෝගය වැඩබලන සභාපති විනිසුරු මොහොමඩ් ලෆාර් තාහීර් මහතා ප්‍රකාශ කළේය.
අදාළ තීන්දුව ප්‍රකාශ කරමින් අභියාචනාධිකරණ සභාපති විනිසුරුවරයා මෙසේ සඳහන් කළේය.
මෙම පෙත්සම්කරු සාමාන්‍ය පුරවැසියෙක් නොවෙයි. ඔහු රටේ පොලිස්පතිවරයා. රටේ නීතිය රැකීම සහ නීතියේ ආධිපත්‍යය ආරක්ෂා කිරීමේ වගකීම ඔහු සතුයි. ඔහුට නීතිය පිළිබඳව අවබෝධයක් තිබිය යුතුයි. එවැනි වගකිවයුතු පුද්ගලයකුට අධිකරණ නියෝග මඟහරිමින් කටයුතු කිරීමට නොහැකියි . සුළු වැරදි සම්බන්ධයෙන් වන සාමාන්‍ය මිනිසුන් අත්අඩංගුවට ගෙන අධිකරණයට ඉදිරිපත් කර නීතිය ක්‍රියාත්මක කරවීමට පොලිස්පතිවරයා ලෙස ඔහුම ක්‍රියාත්මක වී තිබෙනවා. එසේ තිබියදී නීතියෙන් සැඟව සිටීමට මෙලෙස උත්සාහ කිරීම අනුමත කළ නොහැකියි.
මෙම පෙත්සම් ඉදිරිපත් කිරීමේදී පෙත්සම්කාර පාර්ශ්වය කරුණු වසන් කර තිබෙනවා. මාතර මහේස්ත්‍රාත් අධිකරණයේදී විභාග වන නඩුවට අදාළ බී වාර්තා ,.මරණ පරීක්ෂණ වාර්තා, කාර්ය සටහන් ඇතුළු මුල් සම්පූර්ණ නඩු ගොනුවක් ඉදිරිපත් කර නැහැ. එහිදී පෙත්සම්කරුට වාසිසහගත ලියවිල්ලක් පමණක් ඉදිරිපත් කර තිබෙනවා .
රිට් පෙත්සමකදී අධිකරණයේ අභිමතය ප්‍රකාශ කෙරෙනවා. එය ලබා ගැනීම සඳහා සම්පූර්ණ වශයෙන් කරුණු ඉදිරිපත් කළ යුතුයි . එහෙත් මෙහිදී පෙත්සම්කරු විසින් අවශ්‍යම කරුණු කර ඇති බව අධිකරණයේ මතයයි. යනුවෙන් විනිසුරුවරයා සිය තීන්දුව ප්‍රකාශ කරමින් සඳහන් කළේය.
පොලිස්පතිවරයා වශයෙන් කටයුතු කරමින් සැකකරු මෙම පෙත්සම ඉදිරිපත් කර තිබෙනවා. ඔහු සාමාන්‍ය පුරවැසියකු නෙමෙයි මේ රටේ පොලිස්පතිවරයා. ඔහු අපරාධ නීතිය පිළිබඳ හොඳින් දන්නවා. නීතිගරුක අයෙකු ලෙස ඔහු මුලින්ම කළ යුතුව තිබුණේ මාතර මහේස්ත්‍රාත් අධිකරණයේ නියෝගයට අවනතව අධිකරණයට ඉදිරිපත් වීමයි.
මහේස්ත්‍රාත්වරයාගේ නියෝගය දෝෂ සහිත නම් ඒ සම්බන්ධයෙන් අනුගමනය කළ යුතු විධිමත් නීතිමය ක්‍රමයක් තිබෙනවා. එසේ තිබියදී එය අනුගමනය නොකර සැඟවී සිටින්නට පෙත්සම්කරු කටයුතු කර තිබෙනවා. තමන් නීතියට ඉහළින් සිටින පුද්ගලයකු ලෙස සිතාගෙන පෙත්සම්කරු කටයුතු කර ඇති බවක් අධිකරණයට පෙනී යනවා
සාමාන්‍ය පුරවැසියෙකුට එරෙහිව මෙවැනි වරෙන්තුවක් නිකුත් කරනු ලැබුවොත් එය ක්‍රියාත්මක කිරීමට අවශ්‍ය කටයුතු කළත් නීතියේ ආධිපත්‍යය ක්‍රියාත්මක කරන ආයතනයක ප්‍රධානියකුට එරෙහිව එසේ නීතිය ක්‍රියාත්මක නොවන්නේ නම් එය බැහැර කළ නොහැකියි.
එසේ නොකළහොත් නීතිය ක්‍රියාත්මක කරන ආයතනය කෙරෙහි පවතින මහජන විශ්වාසය බිඳවැටී යුක්තිය සහ සාධාරණත්වය ඉටු කර ගැනීම සඳහා මිනිසුන් නීතිය තමන් අතට ගැනීමට පෙලඹෙනවා. එසේ වුවහොත් අරගලයට සමාන තත්ත්වයක් ඇති වීමට හැකියාව තිබෙනවා. නීතිය ක්‍රියාත්මක කිරීමට බැඳී සිටින ආයතන ප්‍රධානියා නීතියට අවනත නොවී සැඟව සිටීම වැරදි පූර්වාදර්ශයක් ලබා දීමක්. නිසි ක්‍රමවේදය අනුගමනය නොකර රිට් පෙත්සමක් ඉදිරිපත් කිරීමට කටයුතු කිරීම වැරදිසහගත බව අධිකරණයට පෙනී යනවා යනුවෙන් අදාළ තීන්දුව ප්‍රකාශ කරමින් අභියාචනාධිකරණ වැඩබලන සභාපති විනිසුරු ලෆාර් තාහීර් මහතා තවදුරටත් සඳහන් කළේය.
එසේම පෙත්සම්කරු සහන පතා මෙම අධිකරණයට පැමිණ තිබෙන්නේ පිරිසුදු දෑතින් නොවන බවයි පෙනී යන්නේ. එම නිසා ඔහු ඉල්ලා සිටින සහන ප්‍රදානය කිරීමට අධිකරණයට හැකියාවක් නැහැ යනුවෙන් විනිසුරුවරයා තවදුරටත් සඳහන් කළේය.
අධිකරණයට ඉදිරිපත් වූ කරුණු සලකා බැලීමේදී අපරාධ නඩු විධාන සංග්‍රහයේ 136(1)1 වගන්තිය යටතේ මෙවැනි නියෝගයක් නිකුත් කිරීමට මහේස්ත්‍රාත්වරයාට බලය නැති බව පෙත්සම්කාර පාර්ශ්වය ඉදිරිපත් කළ කරුණු පිළිගැනීමට හැකියාවක් නැති අතර අපරාධ නඩු විධාන සංග්‍රහය යටතේ මහේස්ත්‍රාත්වරයාට මෙවැනි නියෝගයක් නිකුත් කිරීමට බලය තිබෙන බවට එහිදී තීන්දු කරන බව අභියාචනාධිකරණ වැඩබලන සභාපති විනිසුරු ලෆාර් තාහීර් මහතා තවදුරටත් සඳහන් කළේය.
විභාගයට ඉදිරිපත් වූ කරුණු සැලකිල්ලට ගෙන කරුණු අටක් අවධානයට ලක් කරමින් මහේස්ත්‍රාත්වරයා විසින් අදාළ නියෝගය ප්‍රකාශ කර ඇති බව විනිසුරුවරයා එහිදී සඳහන් කළේය.
1.පෙත්සම්කරු පොලිස්පතිවරයා ලෙස කටයුතු කරමින් පැරා මිලිටරි කණ්ඩායමක් ක්‍රියාත්මක කිරීමට කටයුතු කර තිබීම
2.කොළඹ අපරාධ කොට්ඨාසයේ නිලධාරීන් දකුණු ප්‍රදේශයට ගෙන ගොස් වැරදි ලෙස ස්ථානගත කර තිබීම .
3.අදාළ වැටලීම සම්බන්ධයෙන් කිසිදු සටහනක් තබා නැති වීම.
- අදාළ වැටලීම සිදු කිරීම සම්බන්ධයෙන් ප්‍රදේශයේ පොලිස් ස්ථානාධිපතිවරයා දැනුම්වත් කර නොතිබීම.
5.ටී 56 ඇතුළු ගිනිඅවි නීති විරෝධී ලෙස ලබාගෙන නීති විරෝධී ලෙස භාවිත කර තිබීම.
6.සිද්ධියේදී තුවාල ලැබූ කොළඹ අපරාධ කොට්ඨාසයේ නිලධාරියා ළඟම රෝහලට ඇතුළත් නොකර ඉමදූව අධිවේගී මාර්ග පිවිසුම තෙක් වාහනය රැගෙන යාම.
7.එම සිද්ධිය වන අවස්ථාවේදී වැටලීමට සම්බන්ධව සිටි සියලු නිලධාරීන්ගේ රාජකාරි දුරකතන ක්‍රියාවිරහිත කර තිබීම.
8.මෙම සිද්ධිය සම්බන්ධයෙන් මහේස්ත්‍රාත් අධිකරණ නියෝගය ලබා දීමෙන් අනතුරුව එම අධිකරණය නියෝගයට අවනත නොවී පෙත්සම්කරු සැඟව සිටීම.
ඉදිරිපත් වූ සිද්ධිමය කරුණු පමණක් නොව මරණ පරීක්ෂණ වාර්තාව ඇතුළු කරුණු සැලකිල්ලට ගෙන මාතර මහේස්ත්‍රාත් අධිකරණය විසින් අදාළ නියෝගය නිකුත් කර ඇති බවට අධිකරණයේ මතය බවද තීන්දුව ප්‍රකාශ කරමින් වැඩබලන සභාපති විනිසුරුවරයා සඳහන් කළේය.
ඒ අනුව පෙත්සම්කරු අත්අඩංගුවට ගන්නා ලෙස මාතර මහේස්ත්‍රාත් අධිකරණය විසින් නිකුත් කර තිබෙන වරෙන්තුව නීත්‍යනුකූල බවට අභියාචනාධිකරණය තීන්දු කළේය.
ඒ අනුව පෙත්සමේ වගඋත්තරකරුවන්ට නොතීසි නිකුත් කරන ලෙස කළ ඉල්ලීමද මාතර මහේස්ත්‍රාත් අධිකරණයේ නියෝගය අත්හිටුවන නියෝගයක් නිකුත් කරන ලෙස කළ ඉල්ලීමද ප්‍රතික්ෂේප කිරීමට තීරණය කෙරිණි.
රුපියල් 10525/- ක ගාස්තුවකට යටත්කොට පෙත්සම නිෂ්ප්‍රභ කරන ලදි.
නඩු තීන්දුව ප්‍රකාශයට පත් කිරීමෙන් අනතුරුව විවෘත අධිකරණයේදී ප්‍රකාශයක් සිදු කළ අතිරේක සොලිසිටර් ජනරාල් දිලීප පීරිස් මහතා සඳහන් කළේ මෙවැනි තීන්දුවක් ලබාදීම සම්බන්ධයෙන් අධිකරණයට ස්තුතිය පළ කරන බවය .මෙය අධිකරණ ඉතිහාසයේ ඓතිහාසික තීන්දුවක් වනු ඇති බවද අතිරේක සොලිසිටර් ජනරාල්වරයා එහිදී සඳහන් කළේය.
2023 වසරේ දෙසැම්බර් මස 31 වැනිදා මාතර වැලිගම ප්‍රදේශයේ පිහිටි ‘W 15’ හෝටලය ඉදිරිපිට වෙඩි තැබීමක් සිදු වූ අතර එම සිද්ධියේදී කොළඹ අපරාධ කොට්ඨාසයට අනුයුක්ත පොලිස් සැරයන්වරයකු මරණයට පත්වී තිබුණි.
එම සිද්ධිය සම්බන්ධයෙන් ඉදිරිපත් වූ බී වාර්තාවකට අනුව පොලිස්පති දේශබන්දු තෙන්නකෝන් මහතා අත්අඩංගුවට ගන්නා ලෙස මාතර මහේස්ත්‍රාත් අධිකරණය විසින් නියෝගයක් නිකුත් කරන ලදි.
තමන්ගෙන් ප්‍රකාශයක්වත් සටහන් කර ගැනීමට පෙර අත්අඩංගුවට ගන්නා ලෙස නියෝග නිකුත් කිරීම නීති විරෝධී මෙන්ම අසාධාරණ වන බැවින් මාතර මහේස්ත්‍රාත් අධිකරණය විසින් නිකුත් කර තිබෙන නියෝගය බල රහිත කිරීමේ රිට් ආඥාවක් නිකුත් කරන ලෙස දේශබන්දු තෙන්නකෝන් මහතා අධිකරණයෙන් ඉල්ලා සිටියේය.
මෙම පෙත්සමේ වගඋත්තරකරුවන් ලෙස මාතර මහේස්ත්‍රාත් අරුණ බුද්ධදාස, වැඩබලන පොලිස්පති ප්‍රියන්ත වීරසූරිය, මහජන ආරක්ෂක අමාත්‍ය ආනන්ද විජේපාල, එම අමාත්‍යාංශයේ ලේකම් රවි සෙනෙවිරත්න, අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර, එහි වත්මන් අධ්‍යක්ෂ පී. අම්පාවිල ඇතුළු දහ හතර දෙ‍නකු නම් කර තිබුණි.
