කිසියම් පුද්ගලයෙකු පෞද්ගලික කාරණයක් මත දිඹුලාගල දළුකාන ගම්මානයේ නිවෙසකට පසුගියදා උදෑසන ගිනි තැබීම හේතුවෙන් එම නිවෙසේ දරුවන්ගේ පොත්පත්, සුදුඇඳුම්, උප්පැන්න සහතික ඇතුළු වටිනා ලියකියවිලි රැසක් විනාශ වී ඇති බව මනම්පිටිය පොලීසිය පවසයි. නිවෙසේ තිබු ඇඳක්, කබඩ්, මේස, මෙට්ට ඇතුළු උපකරණ රැසක්ද ගින්නෙන් විනාශ වී ඇති බව පොලීසිය සඳහන් කළේය.
මෙලෙස ගින්නෙන් දැවී විනාශ වී ඇත්තේ දළුකාන සී ගම්මානයේ පදිංචි 23 හැවිරිදි දෙදරු මවක වන එම්. දිලානි යන අයට අයත් කුඩා පැල්පතකි.
ගිනි තැබීමට සම්බන්ධ කිසිදු අයකු මෙතෙක් අත්අඩංගුවට ගෙන නොමැති අතර සිද්ධිය සම්බන්ධයෙන් මනම්පිටිය පොලීසිය වැඩිදුර පරීක්‍ෂණ සිදු කරයි.
මම අම්මලාගේ ගෙදර ඉන්න වෙලාවේ නැන්දා කෙනෙක් ඇවිත් කිව්ව ගේ ගිනි ගන්නවා කියලා, මම දුවගෙන එනවිට ගෙදර ඇඳුම් පැලඳුම්, බඩු මුට්ටු සේරම පිච්චිලා, පුතාලා දෙන්නගේ ඇඳුම් සේරම විනාශ වෙලා, පුතාලට ඇඳුම් පැලඳුම් අරන් දෙන්න අපිට වත්කමක් නෑ පුළුවන් නම් අපිට කවුරු හරි උදව් කරන්න. මගේ පුතා ඉස්කෝලෙ යන්න ආසයි, ඉගෙන ගන්නත් ආසයි, ඒත් ඇඳුම් පැලඳුම් අරන් දෙන්න වත්කමක් නෑ. මහත්තයා කුලී වැඩ කරන්නේ, දැන් අපි ගොඩක් අසරණයි පුළුවන්නම් දරුවෝ ඉස්කෝලේ යවන්න පොත්පත් ගන්න උදව් කරන්න කියලා මම ඉල්ලීමක් කරනවා යැයි දිලානි හැඬු කඳුළින් එලෙස පැවසූවාය.
