රට වටා වී අලෙවි මණ්ඩලවලට අයත් වී ගබඩා මේ වන විට විවෘතව ඇත්තේ ගොවියාගේ වී මිලදී ගැනීම සඳහා බවත්, ඊට සමගාමීව පොල්පිතිගම ප්‍රාදේශීය ලේකම් කොට්ඨාසයේ පිහිටා ඇති මාඑළිය, දාගම වී ගබඩාව විවෘතව තිබෙන බවත් ගබඩාව භාර නිලධාරී දක්ෂිණ විජේසේන මහතා සඳහන් කළේය.
ඔහු සඳහන් කළේ, මේ වන විට ගොවීන් හතර දෙනකුගේ වී කිලෝ 3,904ක් පමණක් ඊට ලැබී ඇති බවයි. මෙහි වී ගබඩා තුනක් වන අතර, ඉන් එක් ගබඩාවක වී කිලෝ ලක්ෂ දහය බැගින් වී කිලෝ ලක්ෂ තිහක් ගබඩා කිරීමේ පහසුකම් ඇත. නාඩු වී කිලෝවක් රුපියල් 120කටත්, සම්බා වී කිලෝවක් රුපියල් 125ක් හා කීරි සම්බා වී කිලෝවක් රුපියල් 132කටත් මෙහිදී මිලදී ගන්නා නමුත් පිටස්තර වෙළෙඳුන් ඊට වඩා වැඩි මිලට ඒවා මිලදී ගැනීමට කටයුතු කරන බැවින් රජයේ වී ගබඩාවලට වී ගෙනැවිත් භාර දීමට ගොවියා පසුබට වීමෙන් මෙම තත්ත්වය උදා වී ඇතැයි ඔහු පෙන්වා දුන්නේය.
ඒ පිළිබඳව කෘෂිකර්ම නියෝජ්‍ය අමාත්‍ය නාමල් කරුණාරත්න මහතා පොල්පිතිගම ප්‍රාදේශීය ලේකම් කාර්යාලයේ පැවැති සංවර්ධන කමිටු රැස්වීමේදී අදහස් දක්වමින් කියා සිටියේ, ගොවියා රජයේ වී ගබඩාවලට වී නොදුන්නත් රජය ගොවියාට විය යුතු සාධාරණය ඉටු කළ බවයි.
