පොලොන්නරුව, වැලිකන්ද ප්‍රාදේශීය ලේකම් කොට්ඨාසයේ කුරුලුබැද්ද සහ මදුරංගල ප්‍රදේශයේ රෑනෙන් තනිවූ අලි පැටවුන් දෙදෙනකු පෙරේදා (14) ප්‍රදේශවාසීන් විසින් සොයා ගැනිණි.
ඉන් කුරුලුබැද්ද ප්‍රදේශයෙන් හමුවූ අලි පැටවාගේ වයස සතියක් පමණ වන බවත්, එම අලියා රෑනෙන් තනිවී ඇති බවට සැක කරන අතර, ප්‍රතිකාර සඳහා ගිරිතලේ වනජීවී නිලධාරීන් විසින් රැගෙන යන ලද බවත් ගම්වාසීහු කියා සිටියහ. වනජීවී නිලධාරියකු කියා සිටියේ, වැලිකන්ද, මදුරංගල ප්‍රදේශයෙන් හමුවූ මාසයක් පමණ වයසැති අලි පැටවා රෑනට පෑගී මියගොස් ඇති බවයි. එම අලි පැටවාගේ අවසන් කටයුතු සිදු කළ බවත්, කුරුලුබැද්ද ප්‍රදේශයෙන් හමු වූ අලි පැටවා රැගෙන ගොස් මේ වන විට ප්‍රතිකාර කරමින් පවතින බවත් ගිරිතලේ වනජීවී පශු වෛද්‍ය කාර්යාලයේ නිලධාරියෙක් අප කළ විමසීමකදී පැවසීය.
වැලිකන්ද වනජීවී කාර්යාලයේ අඩවි ආරක්ෂක සී.ඒ. වනසිංහ මහතා සඳහන් කළේ, මේ පිළිබඳ වැඩිදුර පරීක්ෂණ කටයුතු සිදු කරමින් පවතින බවයි.
