අම්පාර ප්‍රදේශයට පැවති අධික වැසි සහිත අවස්ථාවේ දමන කොට්ඨාසයේ විදුලි රැහැන් කණුවලට වනඅලි පහරදී කඩා දමා තිබුණු අතර ඒවා යළි යථාවත් කිරීමට පසුගියදා අම්පාර විදුලිබල මණ්ඩලය විසින් පියවර ගනු ලැබීය.
දමන කොට්ඨාසයේ මරියාකන්ද ප්‍රදේශයේ ගැවසෙන වල්අලින්ගෙන් කුඹුරු ආරක්ෂා කර ගැනීම සඳහා ගොවියකු විසින් විදුලි රැහැනක් ඇදතිබෙනු දුටු අලියකු එයට බියවී ඒ අසල තිබුණු විදුලි කණුවකට පහරදී පෙරළා දමා කුඹුරට ඇතුළු වී තිබිණි.
මෙය තෙකලා විදුලි රැහැන් මාර්ගයක් වූ අතර අවදානම් අයුරින් විදුලිය සැපයීම මාස එකහමාරක් පමණ සිදුකළ බව ප්‍රදේශවාසීහු පවසති. මේ අතර හිඟුරාණ මලයාඩි ප්‍රදේශයේ තවත් විදුලි කණුවක් අලියකු පහරදී පෙරළා දමා තිබිණි.
පන්නල්ගම ප්‍රදේශයේ ද මෙසේ විදුලි කණුවලට අලින් පහර දී ඇත.
මෙම විදුලි කණු යථාවත් කිරීමට මෙතෙක් කල් ප්‍රමාද වී ඇත්තේ ප්‍රදේශයේ පැවති අධික වර්ෂාව හේතුවෙන් එම අතුරු මාර්ග මඩ වීමෙන් බවත් විදුලි කණු ප්‍රවාහනය කිරීමට පැවති බාධා හේතුවෙන් බවත් විදුලිබල මණ්ඩලයේ උසස් නිලධාරියකු පැවසීය.
