ව්‍යාජ ලිපිනයන් සහ දුරකතන අංක ඇතුළු තොරතුරු ලබා දී ඇතුළත් කරන වියපත් රෝගීන් සුව වූ පසු ගෙනයාමට කිසිවකු ඉදිරිපත් නොවීම හේතුවෙන් බළපිටිය මූලික රෝහලේ පාලන කටයුතුවලට මහත් බාධාවක් වී ඇති බව රෝහල් වෛද්‍ය අධිකාරි වෛද්‍ය වෙනුර කේ. සිංගාරච්චි මහතා පවසයි.
“වයසක රෝගීන්, බාහිර රෝගී අංශයෙන් ඇතුළත් කරන විට භාරකරුවන් ව්‍යාජ ලිපිනයන් ද, වෙනත් කෙනෙකුගේ නමක් සහ දුරකතන අංක ද ලබා දී යනවා. රෝගීන් සුව වී ටිකට් කැපූවිට ගෙනයන්න කිසිවකු එන්නේ නැහැ. දවසකට රෝගීන් හාර දහසක් පමණ දෙනා ඇතුළත් වෙනවා. එවැනි රෝගීන් ගණනාවක් හිටියම රෝහලේ කටයුතුවලට මහත් බාධාවක්. පොල්වත්ත, ඉඳුරුව සහ මාදම්පේ යන පර්යන්ත රෝහල්වලට යැව්වත් ටික දවසකින් ආපසු බළපිටිය රෝහලටම එවනවා. රෝගියා එහෙට මෙහෙට යන එක විතරයි වෙන්නේ. මේ පිළිබඳව පරිපාලන ග්‍රාම නිලධාරියාටත්, පොලීසියටත් දැනුම් දෙනවා” පොලීසිය විසින් ඇතුළු කරන විට දුන් ලිපිනවල පදිංචි අය ගෙන්වා විමසන විට ඒ අය ඇතුළත් කළේ නැහැ කියල කියනවා. සෑම රෝහලකටම මේ ප්‍රශ්නය තිබෙනවා” යැයි ද අධිකාරිවරයා පැවසීය. තවදුරටත් කරුණු දැක්වූ ඒ මහතා මෙසේ ද පැවසීය. “බාහිර රෝගී අංශය නවීකරණය කර පහසුකම් සැලසීමට සැලසුම් සකස් කර තිබෙනවා. ඒ සඳහා රුපියල් මිලියන තුනක මුදලක් වෙන් වී තිබෙනවා. වැසිකිළි පද්ධතිය උතුරා යන අතර ඒ සඳහා රුපියල් මිලියන හතක මුදලක් වෙන් වී තිබෙනවා. වායු සමීකරණ කටයුතු සඳහා ද මුදල් වෙන් වී තිබෙනවා. ඖෂධ ගබඩාව සහ ශල්‍ය ගබඩාව ඉදිකර තිබෙන්නේ අඩක් පමණයි.
මෘත ශරීරාගාරය පිහිටා තිබෙනුයේ රෝහලේ පිටුපස තාප්පය ළඟයි. එතැන සුදුසු පරිදි බෝක්කුවක් නැතිකමින් අපජලය උතුරා යනවා. ඒ ඉදිරිපිට නිවෙස ඉදිරියේ අපජලය රැඳී තිබීමෙන් ඒ ජනතාවත් අපහසුතාවට පත්වෙලා. ඇතැම් කොන්ත්‍රාත්කරුවන් නියමිත පරිදි ඉදිකිරීම් නිම කර නැහැ” යනුවෙන් වෛද්‍ය අධිකාරිවරයා වැඩිදුරටත් පැවසීය.
