පොලොන්නරුව, වැලිකන්ද ප්‍රාදේශීය ලේකම් කොට්ඨාසයේ දුෂ්කර පාසල්වල ආර්ථික අපහසුතා මැද අධ්‍යාපනය හදාරන සිසු සිසුවියන්ට අවශ්‍ය පොත්පත් සහ පාසල් උපකරණ ලබාදීමේ අරමුණින් වැලිකන්ද සෙවණපිටිය ශ්‍රී සම්බෝධි කාශ්‍යපාරාමාධිපති කවි බණ දේශක, උහුමියේ සුමනරතන නාහිමියෝ ඊයේ (16) පාසල් උපකරණ එකතු කිරීම සඳහා වැලිකන්ද නගරයේ පිණ්ඩපාත චාරිකාවක නිරත වූහ.
වැලිකන්ද ප්‍රාදේශීය ලේකම් කොට්ඨාසයේ මවුපියන් දැඩි ආර්ථික අපහසුතා මැද ජීවත්වන අතර ඔවුන්ගේ දූ දරුවන්ට පාසල් යැවීම සඳහා පාසල් පොත් මෙන්ම උපකරණ නොමැති නිසා දැඩි අසීරුතාවට පත්ව සිටින හෙයින් තමන් අඛණ්ඩව මෙම පිණ්ඩපාත චාරිකා පින්කම සිදු කරන බව සුමනරතන නාහිමියෝ සඳහන් කළහ.
පිණ්ඩපාත චාරිකාවක නිරතව දායක කාරකාදීන් විසින් ලබාදුන් පළමු පොත් සහ පාසල් උපකරණ තොගය එළඹෙන 23 වැනිදා වැලිකන්ද ලුම්බිණි ප්‍රාථමික විද්‍යාලය ඇතුළු විද්‍යාල කිහිපයක දරුවන් 300ක පිරිසකට පරිත්‍යාග කිරීමට කටයුතු කරන බවද සුමනරතන නාහිමියෝ සඳහන් කළහ. එදිනට කවි බණ දේශක අලවතුරේ විජිතවංශ කාව්‍ය ශූරීන්ගේ දේශනයක් සිදුකිරීමට ද නියමිතය.
