දංඕවිට පොලීසියෙන් කට්ටි පැන්න නමගිය අපරාධකරුවකු සොරකම් කරන ලද මුදල් හා ස්වර්ණාභරණ සමඟ ඉකුත් 14 වැනිදා රාත්‍රී අත්අඩංගුවට ගත් බව තඹුත්තේගම පොලීසිය පවසයි.
මෙසේ අත්අඩංගුවට ගනු ලැබුවේ වේවැල්දෙණිය දඬුකන්ද ප්‍රදේශයේ පදිංචි ආසිරි ෂෙහාන් (38) නමැති පුද්ගලයෙකි. සැකකරු මාසෙකට පෙර නිට්ටඹුව ප්‍රදේශයේ දංඕවිට පොලිස් වසමේ සොරකමක් කර පලා ගොස් තලාව, තම්මැන්නාගම ප්‍රදේශයේ ඥාතියකුගේ නිවෙසේ සැඟවී සිට තිබේ. එසේ නවාතැන් ගෙන ඇත්තේ තලාව, තම්මැන්නාගම ප්‍රදේශයේ විශ්‍රාමික යුද හමුදා සෙබළකුගේ නිවෙසේ බව තඹුත්තේගම පොලීසිය පවසයි.
තම නිවෙසේ ඉතිරි වැඩකටයුතු කිරීම සඳහා විශ්‍රාමික යුද හමුදා නිලධාරියා විසින් ඉකුත් දිනකදී තලාව ප්‍රදේශයේ බැංකුවකින් ගෙනවිත් මෙම මුදල් සඟවා තිබූ බවට පැමිණිල්ලේ සඳහන් වී තිබේ.
පසු ගිය 13 වැනිදා රාත්‍රියේදී තලාව ප්‍රදේශයේ ප්‍රසිද්ධ විහාරස්ථානයක සැකකරුත් සමඟ පෙරහර නැරඹීමට ගොස් යුද හමුදා සෙබළාගෙන් වසන් වී ඔහුගේ නිවෙසට ගොස් නිවෙස බිඳ එහි තිබූ මුදල් රුපියල් ලක්ෂ එක හමාරක් සහ රත්රන් මුදු දෙකක් සැකකරු විසින් සොරකම් කර අසල පාරේ ඇති ගසක් යට සඟවා නැවත පෙරහර නැරඹීමට ගොස් තිබෙන බව සැකකරු පොලීසිය වෙත පාපෝච්චාරණයක් කළ බවට පොලීසිය පවසයි.
නිවැසියන් විසින් මුදල් සහ රන් ආභරණ නොමැති බව තඹුත්තේගම පොලීසිය වෙත කරන ලද පැමිණිල්ලක් අනුව නිවෙසේ සිටි සැකකරු ගැන සැක සිතී ඔහුගෙන් කරන ලද දීර්ඝ ප්‍රශ්න කිරීමෙන් අනතුරුව සැකකරුගේ පාපෝච්චාරණය අනුව මෙම ස්වර්ණාභරණ සහ මුදල් සියල්ල සොයාගත් බව තඹුත්තේගම පොලීසියය වැඩිදුරටත් පැවසීය.
සැකකරුගෙන් දීර්ඝ ලෙස ප්‍රශ්න කිරීමේදී ඔහු දංඕවිට ප්‍රදේශයෙන් පලා ගොස් ඇත්තේ වෙනත් සොරකමකට එම පොලීසියට අවශ්‍ය පුද්ගලයකු බවට සිටියදී බවට මූලික පරීක්ෂණවලදී පොලීසිය විසින් සොයාගෙන තිබේ.
විශ්‍රාමික යුද හමුදා සෙබළකුගේ මෙම පැමිණිල්ලට අනුව තඹුත්තේගම මූලස්ථාන ප්‍රධාන පොලිස් පරීක්ෂක ආර්.බී. ජයසිංහ මහතාගේ උපදෙස් පරිදි පොලිස් පරීක්ෂක විමලසේන, පො.සැ. (47973) ජයසිංහ, පො.සැ. (36358) කුමාර, පො.සැ. (74421) දිසානායක, කා.පො.කො. (7107) තුෂාරි යන අය සහභාගි වූහ.
සැකකරු තඹුත්තේගම මහේස්ත්‍රාත් අධිකරණයට ඉදිරිපත් කිරීමෙන් අනතුරුව 25 වැනිදා දක්වා රක්ෂිත බන්ධනාගාරගත කරන ලෙස තඹුත්තේගම මහේස්ත්‍රාත් බුද්ධික මල්වත්ත මහතා නියෝග කළේය.
