අක්මීමන, කපුහෙම්පොළ ප්‍රදේශයේ ගෙවත්තක සඟවා තිබූ ගිනිඅවි තොගයක් සමඟ සැකකරුවකු බස්නාහිර දකුණ අපරාධ කොට්ඨාසයේ නිලධාරීන් කණ්ඩායමක් විසින් ඉකුත්දා අත්අඩංගුවට ගනු ලැබීය.
පොලීසියට ලැබුණ තොරතුරකට අනුව කරන ලද මෙම වැටලීමේදී සැකකරු පදිංචි නිවෙස පිහිටි ගෙවත්තේ පස් කණ්ඩියක ගුහාවක් වැනි තැනක සඟවා තිබූ තුවක්කු 4ක්, රිවෝල්වර 2ක්, පිස්තෝල 1ක්, පතරොම් තුවක්කු සඳහා යොදන උණ්ඩ 48ක්, කඩු 3ක්, කිණිසි 5ක් සහ දුරදක්නයක් අත්අඩංගුවට ගෙන තිබේ.
මෙම සැකකරු 72 හැවිරිදි අයෙකි. මොහු කලක් ඉතාලියේ රැකියාවක නිරතව සිටි අයකු බව ද විමර්ශනවලදී අනාවරණය වී ඇත. මොහු මෙම ගිනිඅවි, ඉතාලියෙන් මෙරටට ගෙන්වන්නට ඇතැයි පොලීසිය සැක කරයි.
බස්නාහිර දකුණ අපරාධ කොට්ඨාසය භාර නියෝජ්‍ය පොලිස්පති ගයංග මාරපන මහතාගේ උපදෙස් මත මේ පිළිබද වැඩිදුර පරීක්ෂණ පැවැත්වෙයි.
