නිල්වලා ගඟ පිරිසුදු කිරීමේ “SAVE NILWALA“ ව්‍යාපෘතිය, මාතර දිස්ත්‍රික් සම්බන්ධීකරණ කමිටුවේ සභාපති, කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතාගේ ප්‍රධානත්වයෙන් ඉකුත් 13 වැනි දින අකුරැස්ස ප්‍රදේශයෙන් ආරම්භ කෙරිණි.
මිනිස් ක්‍රියාකාරකම් හමුවේ අපවිත්‍ර වෙමින් පවතින නිල්වලා ගඟ හා ඒ ආශ්‍රිත ප්‍රදේශ පිරිසුදු කොට පානීය ජලයේ ගුණාත්මක භාවය ඉහළ නැංවීම හා සංචාරක කර්මාන්තය ඉහළ නැංවීම අරමුණු කරගනිමින් මෙම ව්‍යාපෘතිය ක්‍රියාවට නැංවේ. විශේෂයෙන්ම අධික වර්ෂාව පවතින දිනයන්හි දෙදියගල හා තදාසන්න ප්‍රදේශවලට ඇදහැලෙන වර්ෂාව හේතුවෙන් දිඟිලි ඔය පිටාර ගලමින් ඇතිවන ගංවතුර තත්ත්වය පාලනය කර ගැනීමට නිල්වලා ගඟ පිරිසුදු කිරීම මනා පිටුවහලක් වේ. ඒ තුළින් කඩිනමින් ජලය බැසයාමට සැලැස්වීම SAVE NILWALA ව්‍යාපෘතියේ මූලික අරමුණුවලින් එකකි.
මෙදිනම අමාත්‍යවරයාගේ ප්‍රධානත්වයෙන් දෙදියගල ප්‍රදේශය කේන්ද්‍රකර ගනිමින් දේශීය හා විදේශීය සංචාරකයින්ගේ ආකර්ෂණයට ලක්වෙන අයුරින් සකස් කෙරෙන අකුරැස්ස දෙදියගල මූලික කරගත් සංචාරක කලාප ව්‍යාපෘතිය ද ආරම්භ කිරීමට කටයුතු කෙරිණ.
දැනටමත් ප්‍රදේශවාසීන්ගේ මැදිහත්වීමෙන් සුළු වශයෙන් පවත්වාගෙන යන දෙදියගල රක්ෂිතය ආශ්‍රිත සංචාරක කලාපය නිසි සැලැස්මක් යටතේ සංවර්ධනය කොට අවශ්‍ය යටිතල පහසුකම් ලබාදීමටත්, ගම්වාසී ජනතාව සංචාරක ව්‍යාපාරයට සම්බන්ධ කර ගනිමින් ගම්වාසීන්ට ප්‍රතිලාභ ලබාදීමට මෙම ව්‍යාපෘතිය සම්බන්ධයෙන් අකුරැස්ස ප්‍රාදේශීය ලේකම් කාර්යාලයේදී පැවැති සාකච්ඡාවේදී තීරණය කෙරිණි.
මෙම සංචාරක කලාපයට යෝජිත ග්‍රාම සේවා වසම් වන දෙදියගල, ලේනම උතුර, ලේනම දකුණ, හුලංදාව, දොළමාවත, ඇහැළපේ, කොහුගොඩ, දිගනහේන හා ගම්වාසීන් මෙම ව්‍යාපෘතියට සම්බන්ධ කර ගැනීම පිළිබඳව සාකච්ඡා කෙරිණි.
අකුරැස්ස ප්‍රාදේශීය ලේකම් කාර්යාලයේ මැදිහත් වීමෙන් නිර්මාණය කරන ලද https://dediyagalanaturetours.com/ නමැති වෙබ් අඩවිය අමාත්‍යවරයා විසින් අන්තර්ජාලයට මුදාහරිමින් සංචාරක කලාපයේ ආරම්භය සනිටුහන් කිරීම විශේෂත්වයකි.
වසර ගණනාවක් අකුරැස්ස ප්‍රාදේශීය ලේකම්වරයා ලෙස කටයුතු කළ අකුරැස්ස සහ තදාසන්න ප්‍රදේශවල පවතින තත්වයන් මැනවින් දත්, වර්තමාන මාතර දිස්ත්‍රික් ලේකම් / දිසාපති චන්දන තිලකරත්න මහතා ප්‍රමුඛ ප්‍රධාන මාතර දිස්ත්‍රික් ලේකම් කාර්යාලය, මාතර දිස්ත්‍රික් ආපදා කළමනාකරණ සම්බන්ධීකරණ ඒකකය, අකුරැස්ස ප්‍රාදේශීය ලේකම් කාර්යාලය, අතුරලිය ප්‍රාදේශීය ලේකම් කාර්යාලය, පොලීසිය, යුද හමුදාව, අකුරැස්ස මහජන සෞඛ්‍ය පරීක්ෂක කාර්යාලය, ජාතික තරුණ සේවා සභාවේ මාතර දිස්ත්‍රික් කාර්යාලයන්හි නිලධාරීන් සමඟ සේව් නිල්වලා පදනම, ප්‍රදේශවාසීන් ඇතුළු පිරිසක් සහභාගි වී සිටියහ.
