ඓතිහාසික රුහුණු මහා කතරගම දේවාලයේ අරමුදලෙන් විවිධ සත්කාර බොහොමයක් මේ වනවිට ක්‍රියාත්මක කර තිබේ. එම වැඩසටහන් අතර නව වැඩසටහනක් ලෙස ශ්‍රී ලංකාව පුරා සිටින පිහිටක් අවැසි අසරණ මිනිසුන් වෙනුවෙන් “කඳ දෙව් සරණ” යාත්‍රාව කතරගමින් ආරම්භ කර තිබේ.
වීදි තුළ ජීවත්වන යාචක පුද්ගලයන් හඳුනාගෙන ඔවුන්ට තිබෙන රෝග වැනි දේවල් සඳහා ප්‍රතිකාර සිදු කිරීමත්, නාවා පිරිසුදු කර නව ඇඳුම් අන්දවා මෙම පිරිස් සඳහා උපකාර කිරීමත් මෙම නව වැඩසටහනේ අරමුණයි.
රුහුණු මහා කතරගම දේවාලයේ බස්නායක නිලමේ ඩිෂාන් ගුණසේකර මහතාගේ සංකල්පයක් මත “ක්ලීන් ශ්‍රී ලංකා” වැඩසටහනට අනුව මෙම වැඩසටහන දියත් කෙරේ.
ඇස නෙගැසෙන, අසරණ වූ යාචක පිරිස් සඳහා මෙම සත්කාර වැඩසටහන දිවයින පුරා සිදු කරන බව බස්නායක නිලමේ ඩිෂාන් ගුණසේකර මහතා සඳහන් කළේය. එහි ආරම්භය සනිටුහන් කරමින් කතරගම නගරයේ පොදු ස්ථානවල සිටින අසරණ මිනිසුන්, ආබාධිත පිරිසක් සහභාගි කරගෙන මෙම වැඩසටහන කතරගම බස් නැවතුම්පොළ භූමියේදී ආරම්භ කෙරිණි. කතරගම දේවාලය සතුව ඇති රථයක් මේ සඳහා යොදාගෙන ඔවුනට අවශ්‍ය වෛද්‍ය ප්‍රතිකාර සඳහා යොමුකර සනීපාරක්ෂක අවශ්‍යතා, කොණ්ඩා කැපීම, අවශ්‍ය රෙදි පිළි ලබාදීම, බෙහෙත් ලබාදීම සිදු කරයි.
මෙම වැඩසටහන සඳහා කතරගම දිසා රෝහලේ කාර්ය මණ්ඩලයේ සියලු දෙනාගේ සහයෝගය සහ කතරගම සෞඛ්‍ය වෛද්‍ය කාර්යාලයේ ප්‍රධාන වෛද්‍ය අජිත් කුමාර මහතා ඇතුළු නිලධාරීන්ගේ සහයෝගය මෙන්ම කතරගම පොලිස් ස්ථානයේ ප්‍රජා පොලිස් ඒකකයේ සහයෝගය ද මෙම කර්තව්‍යය සාර්ථක කරගැනීම සඳහා ලැබී තිබේ.
