විදේශගතව සැඟව සිටින පාතාල කල්ලි නායකයකු සහ මත්ද්‍රව්‍ය ජාවාරම්කරුවකු වන බඩෝවිට අසංක නමැත්තාගේ උපදෙස් මත මෙරට අපරාධ මෙන්ම මත්ද්‍රව්‍ය ජාවාරම මෙහෙයවන ප්‍රධාන පුද්ගලයා සහ තවත් අයකු අත්අඩංගුවට ගත් බව බස්නාහිර පළාත දකුණු දිසාව අපරාධ කොට්ඨාසය පැවසීය.
එම සැකකරුවන් දෙදෙනා සමඟ රුපියල් ලක්ෂ 30කට ආසන්න වටිනා අයිස් සහ ෙහ‍ෙරායින් මත්කුඩු, වායු රයිපලයක්, ජංගම දුරකතන දෙකක් සහ ත්‍රිරෝද රථ දෙකක් ද පොලිස් භාරයට ගෙන ඇත. බඩෝවිට අසංක නමැත්තාගේ සමීපතමයකු පාතාල කල්ලි සාමාජිකයන් වන කොස් මල්ලි සහ සමන්ත යන පුද්ගලයන්ගේ සාමාජිකයන්ගෙන් එල්ලවන ජීවිත තර්ජන හේතුවෙන් සැඟව සිටින බවත්, එම පුද්ගලයා දෙහිවල ප්‍රදේශයේ සිදු වූ අපරාධ කිහිපයකට සම්බන්ධ අයකු බවත් බස්නාහිර පළාත් දකුණු දිසාව අපරාධ කොට්ඨාසය වෙත ලද තොරතුරකට අනුව එම සැකකරු සම්බන්ධයෙන් සිදු කළ විමර්ශනවල ප්‍රතිඵලයක් ලෙස පොලිස් සැරයන් 40730 ධනුෂ්ක නිලධාරියාට ලද තොරතුරකට අනුව සැකකරු ත්‍රිරෝද රථයකින් යමින් සිටියදී පිටකෝට්ට ප්‍රදේශයේදී අත්අඩංගුවට ගෙන තිබේ.
සැකකරු පරීක්ෂා කිරීමේදී ඔහු සන්තකයේ තිබී අයිස් මත්ද්‍රව්‍ය මිලිග්‍රෑම් 10,250ක් සොයා ගැනීමට හැකි වී ඇත. සැකකරු පොලීසියට රැගෙන ඒමෙන් අනතුරුව රැඳවුම් නියෝග ලබාගෙන සිදුකළ දීර්ඝ ප්‍රශ්න කිරීමේදී ප්‍රතිවිරුද්ධ කල්ලිවලින් එල්ල වන ජීවිත තර්ජන හේතුවෙන් හා දෙහිවල පොලිස් වසමේ නිවෙසකට පහරදී රුපියල් ලක්ෂ දොළහකට අධික දේපොළවලට අනර්ථයක් සිදු කිරීමත්, රුපියල් ලක්ෂ පහකට ආසන්න ජංගම දුරකතන කොල්ලකෑමත් සම්බන්ධයෙන් අත්අඩංගුවට ගැනීමට සොයන බැවින් මහරගම සපුමල් පෙදෙසේ දෙමහල් නිවෙසක් කුලී පදනම මත ලබාගෙන සැඟව සිටින බව අනාවරණය කර තිබිණි.
එකී නිවෙසට මාසික කුලී මුදල වන රුපියල් 60,000ක මුදල බඩෝවිට අසංක නමැත්තා ලබාදෙන බව සැකකරුගෙන් අනාවරණය වීමෙන් අනතුරුව එම නිවෙස සෝදිසි කිරීමේදී එහි සඟවා තිබූ වායු රයිපලය සොයා ගත් බවද පොලීසිය කීය. පොලීසිය වැඩිදුරටත් සඳහන් කළේ, සැකකරුගෙන් අනාවරණය වූ කරුණු මත බඩෝවිට අසංකගේ මත්ද්‍රව්‍ය බෙදා හරින පුද්ගලයා ද දෙහිවල නැදිමාල ප්‍රදේශයේදී හෙරොයින් මත්කුඩු ග්‍රෑම් 30යි මිලිග්‍රෑම් 30ක් සමඟ එම ප්‍රදේශයේදීම අත්අඩංගුවට ගත් බවයි. සැකකරුවන් අධිකරණය වෙත ඉදිරිපත් කිරීමට නියමිතය.
