යාපනය අර්ධද්වීපයේ කච්චතිව් දූපතේ, ඓතිහාසික ශාන්ත අන්තෝනි මුනිඳුන්ගේ දේවස්ථානයේ වාර්ෂික දේව මංගල්‍යය, ශ්‍රී ලාංකික හා ඉන්දියානු බැතිමතුන් විශාල පිරිසකගේ සහභාගිත්වයෙන් ඉකුත් 14 සහ 15 යන දෙදින තුළ අති උත්කර්ෂවත් අයුරින් පැවැත්විණි.
ඉන්දියාවේ සිවගංගෙයි රදගුරු පදවියේ ගරු ලුර්දු ආනන්දන් පියතුමා, යාපනය රදගුරු පදවියේ ගරු පී.ජේ. ජෙබරත්නම් පියතුමා, කොළඹ අගරදගුරු පදවියේ ගරු සිස්වාන් ද කෲස් පියතුමා, ඉන්දියාවේ රාමේශ්වරම් පැරිෂ් පූජක ගරු අශෝක් පියතුමා සහ ඩෙල්ෆ්ට් පැරිෂ් පූජක ගරු පී. පතිනාදන් පියතුමා යන පූජකවරුන්ගේ මෙහෙයවීමෙන්, යාපනය රදගුරු අති උතුම් ජස්ටින් ඥානප්‍රකාසම් පියතුමාගේ සහ යාපනය දිස්ත්‍රික් ලේකම් මරුදලිංගම් පිරතීපන් මහතාගේ සංවිධායකත්වයෙන් සහ ශ්‍රී ලංකා නාවික හමුදාවේ පූර්ණ දායකත්වයෙන් මෙම දේව මංගල්‍යය පැවැත්විණී.
මෙම දේව මංගල්‍යයේ අවසන් පූජාව සිදුකෙරුණු පෙරේදා (15) දින පෙරවරුවේ ධීවර ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් සහ නාවික හමුදාපති වයිස් අද්මිරාල් කාංචන බානගොඩ යන මහත්වරුන් ඇතුළු දෙස් විදෙස් සම්භාවනීය අමුත්තන් හා රාජ්‍යතාන්ත්‍රික නියෝජිතයින්, සම්භාවනීය අමුත්තන් ඇතුළු පිරිසක් සහභාගි වී සිටියහ.
ඉන්දීය සහ ශ්‍රී ලාංකික ධීවර ප්‍රජාව ඇතුළු කිතුනු මෙන්ම බොදු බැතිමතුන් ද මහත් ගෞර‍ව බහුමානයෙන් පුද පූජා පවත්වනු ලබන මෙම ශාන්ත අන්තෝනි මුනිඳුන්ගේ දේවස්ථානයේ වාර්ෂික දේව මංගල්‍යය සාර්ථකව පැවැත්වීම සඳහා අවශ්‍ය යටිතල පහසුකම් නාවික හමුදා නිලධාරින්ගේ සුවිශේෂි දායකත්වයෙන් සිදුකෙරිණි.
දේව මංගල්‍යට සහභාගීවූ නාවික හමුදාපති
වයිස් අද්මිරාල් කාංචන බානගොඩ මහතා ඇතුළු සම්භාවනීය පිරිස
නාවික හමුදාවේ උතුරු නාවික විධානයේ ආඥාපතිගේ අධීක්ෂණය යටතේ ශ්‍රී ලංකා නාවික හමුදාව විසින් සියලු පහසුකම් සම්පාදනය කිරීමට කටයුතු කර තිබෙනු එහි ගිය අපට දැකගත හැකිවිණි. යාපනය දිස්ත්‍රික් ලේකම් කාර්යාලය සහ ඩෙල්ෆ්ට් ප්‍රාදේශීය ලේකම් කාර්යාලය හා සම්බන්ධීකරණය වී බැතිමතුන් හට අවශ්‍ය පානීය ජලය, ආහාර, සනීපාරක්‍ෂක පහසුකම්, තාවකාලික කුටි, තාවකාලික මංමාවත් හා ජැටි සකස් කිරීම මෙන්ම විදුලි බල පහසුකම් ස්ථාපනය, බැතිමතුන්ගේ ආරක්‍ෂාව සඳහා ජීවිතාරක්‍ෂක කණ්ඩායම් යෙදවීම මෙන්ම, වෛද්‍ය පහසුකම් සැලසීම සඳහා වෛද්‍ය කාර්ය මණ්ඩලයකින් සමන්විත වෛද්‍ය මධ්‍යස්ථානයක් ස්ථාපනය කිරීම ද නාවික හමුදාව විසින්ම සිදුකර තිබුණේ නාවික හමුදාවේ සංවිධාන ශක්තියෙනි.
මෙම වාර්ෂික දේව මංගල්‍යය සඳහා පැමිණි සම්භාවනීය අමුත්තන්, රාජ්‍ය තාන්ත්‍රික නිලධාරීන්, පූජකවරුන්, රාජ්‍ය නිලධාරීන්, බැතිමතුන් ඇතුළු අනෙකුත් සේවාවන් සැපයීම සඳහා පැමිණි ජනතාව මෙන්ම, දෙස් විදෙස් මාධ්‍යවේදීන් හා දේව මෙහෙය සඳහා අවශ්‍ය විවිධ සැපයුම් ද කන්කසන්තුරය සහ කුරිකඩ්ඩුවාන් සිට කච්චතිව් දූපත දක්වා ආරක්‍ෂිතව මුහුදු මාර්ගයෙන් ප්‍රවාහනය කිරීම ද නාවික හමුදාවේ දායකත්වයෙන් සිදුකෙරිණී.
මෙවර දෙස් විදෙස් බැතිමතුන් නවදහසකට අධික ප්‍ර‍මාණයක් කච්චතිව් දූපතේ එක්රොක් වී සිටියහ.
ඉන්දියාවේ බැතිමතුන් සිය බඩු බාහිරාදිය කද බැඳගනිමින් පවුල් පිටින් ධීවර යාත්‍රා මගින් කච්චතිව් දූපතට පැමිණ කඳවුරු බැඳ දේව මෙහෙය සඳහා සූදානම්ව සිටිනු එහි ගිය අපි දුටිමු. කච්චතිව් දූපතෙන් බැසගත් තැන සිට කිලෝමීටර් දෙකකට ආසන්න දුරකින් දේවස්ථානය පිහිටා තිබිණි. විශේෂයෙන්ම ඉන්දියාවේ සිට පැමිණි වෙළෙඳුන් වන්දනාවේ පැමිණි පිරිස් සඳහා මග දෙපස තාවකාලිකව තනාගත් වෙළෙද කුටිවල සිටිමින් බඩු බාහිරාදිය විකිණීම කළේ දකුණු ඉන්දියාවේ තොරොම්බල් කඩවල් සිහියට නංවමිනි. ඉමිටේෂන් මාල, වළලු, කරාබු, ප්ලාස්ටික් බඩු, දරුවන්ගේ සෙල්ලම් බඩු, ඇඳුම් ආයිත්තම් මේ කඩවල පිරී තිබිණි. දේවමෙහෙයට යන එන පිරිස් එම කුටිවල රැඳෙමින් අවශ්‍ය බඩුබාහිරාදිය මිලට ගනු පෙණිනි. මෙම බොහෝ තාවකාලික කුටිවල ඉන්දියානු මුදල් නෝට්ටු ගනුදෙනුවීම විශේෂත්වයකි.
දේව මෙහෙය සඳහා සහභාගි වී සිටි දෙස් විදෙස් පූජ්‍ය පක්ෂය එක්රැස්වී සිටි පිරිසට දේශනා පවත්වමින් දේව ආශීර්වාදය පැතූහ. ශාන්ත අන්තෝනි පියතුමන්ගේ ආශීර්වාදය ලබාගැනීමට පැමිණි පිරිස් යාතිකා ගයමින් දේව මෙයෙට සහභාගි වී සිටියහ. දේව මෙහෙය අවසානයේ බැතිමතුන් සියල්ලෝම දේවාශීර්වාද ලබාගැනීමෙන් පසු දූපතින් නික්ම යෑම සඳහා යුහුසුලුව කටයුතු කරනු දක්නට ලැබිණි. ඒ අනුව පෙරේදා (15) දහවල් 12 පමණ වන විට එම බැතිමතුන් සිය වන්දනා ගමන නිමාකොට දූපතෙන් නික්මීම සිදුවිය.
මෙම මංගල්‍යය අවසානයේදී මාධ්‍යයට අදහස් දැක්වූ නාවික හමුදාපතිවරයා මෙසේ පැවසීය.
‘‘මෙවර මෙම මංගල්‍යයට අටදහසකට අධික පිරිසක් මේ වන විට සහභාගි විය. මෙම උත්සවය සාර්ථකව සංවිධානය සඳහා නාවික හමුදාවෙන් විශාල වෙහෙසක් ගන්නවා. නාවික හමුදාපති හැටියට ඒ ගැන කියන්නේ ඉතාමත් සතුටින්. මේ පැමිණ සිටින හැම නිලධාරියෙක්ම ඒ සඳහා කැපවෙනවා. ගියවර මෙම මංගල්‍යයට සහභාගි වී තිබුණේ තුන්දහස් පන්සීයක් පමණ පිරිසක්. නමුත් එය මෙවර බැතිමතුන්ගේ පැමිණීම සීග්‍ර වර්ධනයක් ලෙස දකින්න පුළුවන්.“
මෙම මංගල්‍යයට පැමිණ සිටි ධීවර ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් මහතා මෙසේ පැවසීය.
‘‘මේ දේව මෙහෙය සඳහා විශාල පිරිසක් පැමිණ සිටියා. මා දැක්ක එකම දේ තමයි එකම ජාතියක් ලෙස මේ ස්ථානයට පැමිණි පිරිස් වන්දනාමාන කළා. අපේ රටට සාමය, සමාදානය උදාවෙන්න මේ ජනතාව පැතුවා. අපි බේද බින්න නොවී එක්සිත්ව ඉන්න තමයි මේ දේව මෙහෙයෙන් අපි පතන්නේ. ඊළඟ මංගල්‍යය මීටත් වඩා හොඳින් කරන්න තමයි අපි බලා පොරොත්තු වෙන්නේ. මේ මංගල්‍යයෙන් අපි බලාපොරොත්තු වෙන්නේ අපේ රටේ විතරක් නෙමේ ජාත්‍යන්තරයේත් සමගිය අපේක්ෂාවයි.“
ශාන් රූපස්සර
