නායයෑම් හේතුවෙන් උන්හිටි තැන් අහිමි පූනාගල මහකන්ද තේ කර්මාන්තශාලාවේ ජීවත් වූ පවුල් 51ක් සඳහා පර්චස් 10 බැඟින් වූ ඉඩමක් සහ නව නි‍ෙවසක් ලබාදීමට රජය තීරණය කර තිබේ.
ඒ අනුව නව නිවාස ඉදිකිරීම සඳහා මුල්ගල් තැබීම හල්දුම්මුල්ල ප්‍රාදේශීය ලේකම් කොට්ඨාසයේ පූනාගල කබරගල කොටසේදී වැවිලි සහ ප්‍රජා යටිතල පහසුකම් ඇමැති සමන්ත විද්‍යාරත්න මහතාගේ ප්‍රධානත්වයෙන් ඊයේ (16) සිදු කෙරිණි.
පර්චස් 10ක ඉඩම් කොටස සමඟ රුපියල් ලක්ෂ 28ක වියදමින් යුතුව අංගසම්පූර්ණ නි‍ෙවසක් ඉදිකිරීමට නියමිතය. නිවාස 51ක් ඉදිකිරීමේ ව්‍යාපෘතිය සඳහා වැවිලි සහ ප්‍රජා යටිතල පහසුකම් අමාත්‍යාංශය මඟින් මූල්‍ය වියදම් දරන අතර ශ්‍රී ලංකා යුද හමුදාවේ ශ්‍රමදායකත්වයෙන් ඉදිකිරීමට නියමිතය.
මේ නිවාස ඉදිකිරීම සඳහා මුදල් තමන්ගේ හෝ වෙනත් කාගේ හෝ පෞද්ගලික මුදල් නොව මහජනතාවගේම බදු මුදල් බවත් ඒ නිසා තමා ඇතුළු කණ්ඩායමට දැමූ මල් මාලා දැමිය යුත්තේ තමන් ඇතුළු පිරිසට නොවන බවත් ඇමැතිවරයා කියා සිටියේය.
ඇමැතිවරයා වැඩිදුරටත් මෙසේද පැවැසීය.
“ජනතාවට එහෙම වුණාට පාලකයන්ට එහෙම වුණේ නෑ. ගෙවල් ගිනි තිබ්බාට පස්සේ ඒවට මාසෙන් දෙකෙන් කෝටි ගණන් වන්දි ගත්තා. දැන් මේ නිවාස ව්‍යාපෘතියක් දුන්නේ රටේ ජනතාවගේ බදු මුදල්වලින්. අමාත්‍යාංශයෙන් මේ නිවාස සඳහා රුපියල් ලක්ෂ 1800ක් වෙන් කළා.
හැබැයි පසුගිය කාලේ මන්ත්‍රීවරුන් එයාලගේ ගෙවල්වලට එක ගේකට රුපියල් ලක්ෂ 1300ක් පමණ අරගෙන තිබෙනවා.”
ඌව පළාත් ආණ්ඩුකාර නීතිඥ කපිල ජයසේකර, වැවිලි සහ ප්‍රජා යටිතල පහසුකම් නියෝජ්‍ය ඇමැති සුන්දර ලිංග ප්‍රදීප්, යුද හමුදාපති ලුතිනල් ජෙනරාල් ලසන්ත රොද්‍රිගො, වැවිලි සහ ප්‍රජා යටිතල පහසුකම් අමාත්‍යාංශ ලේකම් ප්‍රභාත් චන්ද්‍රකීර්ති මහත්වරු මෙම අවස්ථාවට එක්ව සිටියහ.
