මෙවර රාමසාන් උත්සවය, සලාම් රාමසාන් යන තේමාව යටතේ ජාතික උත්සවයක් ලෙස රාජ්‍ය අනුග්‍රහයෙන් පැවැත්වේ.
මේ සම්බන්ධයෙන් කොළඹ දී පැවති මාධ්‍ය හමුවකදී ජාතික රාමසාන් උත්සව කමිටුවේ සභාපති රිසාන් නසීර් මහතා සඳහන් කළේ මෙවර ජාතික රාමදාන් උත්සවය සලාම් රාමදාන් යන තේමාව යටතේ මාර්තු 21 වැනිදා සිට 31 වැනිදා දක්වා උත්සවශ්‍රීයෙන් පැවැත් වීමට සියලු කටයුතු සූදානම් කර ඇති බවයි.
වත්මන් සමාජයේ යම්තාක් දුරකට පසුබැස ඇති සම්ප්‍රදායන් සමාජයට ප්‍රදර්ශනය කිරීමේ සාමාජයීය අරමුණ පෙරදැරි කරගනිමින් හා ජාතික සමගිය මුළු ලොවට විදහා පෑමේ අරමුණින් මෙවර ජාතික රාමසාන් උත්සවය සංවිධානය කෙරෙයි.
බස්නාහිර පළාත් සභාව විසින් පත්කරන ලද ජාතික රාමසාන් උත්සව කමිටුව විසින් මෙම ව්‍යාපෘතිය සැලසුම් කර තිබේ. මෙම ජාතික උත්සවයට සමගාමීව මාර්තු 21 සිට 31 වැනිදා දක්වා දින 10ක් මුළුල්ලේ කොළඹ නගරය වටා ආලෝකවත් කිරීමට සහ ග්‍රීන් පාත් පරිශ්‍ර‍ෙය් දින 3ක් මුළුල්ලේ සංස්කෘතික උත්සවයක් පැවැත්වීමට අවශ්‍ය කටයුතු සූදානම් කර තිබේ.
ශ්‍රී ලංකාවේ සංස්කෘතික විවිධත්වය විදහා දක්වන තවත් එක් උත්සව කලාපයක් වශයෙන් සලාම් රාමසාන් උත්සවය සංවිධානය කිරීමට සැලසුම් කර තිබේ. මේ හරහා මුස්ලිම් ජනයාගේ විවිධ පාරම්පරික සහ සාම්ප්‍රදායික චාරිත්‍ර ආදී හරයන් පිළිබඳව මූලික අවබෝධය හා දැනුම වැඩිදියුණු කිරීමට අපේක්ෂා කෙරේ.
මෙම උත්සවය පැවැත්වීම තුළින් ආගමික හා සංස්කෘතික වශයෙන් සමස්ත සමාජය එකමුතු කිරීමට හා අනෙකුත් සංස්කෘතික උත්සවයන් සමරන ආකාරයටම වැඩි ප්‍රජා සහභාගිත්වයක් ආර්ථික සහභාගිත්වයක්, සහ අන්තර් ආගමික අවබෝධයක් ඇතිව සැමරීමට අවශ්‍ය කටයුතු සංවිධානය කොට තිබේ.
රාමසාන් උත්සවය මුස්ලිම් ජනයාගේ පාරම්පරික සංස්කෘතික ආචාරධර්ම ආහාරපාන යනාදී සියලු දෑ වන බැවින් මේ පිළිබඳව සමාජයේ සෙසු සියලු දෙනා සමඟ බෙදා හදාගැනීමට මෙම කාරණා පිළිබඳ සමාජයට හෙළිදරව් කිරීමට අවශ්‍යයි.
ලෝකය පුරා වෙසෙන මුස්ලිම් සංස්කෘතීන්ට සම්බන්ධ බොහෝ දෑ පිළිබඳ දැනුම මෙම සංස්කෘතික උත්සවයේදී සමාජයට පිරිනැමේ.
උපවාසය අත්හැරීමට පමණක් නොව ශ්‍රී ලාංකිකයන් ලෙස එකමුතුකම, සහයෝගීතාව, ආශිර්වාදය සහ දියුණුව වෙනුවෙන් සිංහල, දෙමළ, මුස්ලිම් සියලු ප්‍රජාව එක්ව සමරන සුවිශේෂී අවස්ථාවක් සහ සුවිශේෂී දිනයක් බවට පත්කිරීම මෙම වැඩසටහනේ අපේක්ෂාවයි.
