පාවාදීමේ පලියක් ගන්නා බව පවසා පාසල තුළ පන්ති කාමරයේදී තිනර්වලට ගිනි අවුළුවා සිසුවකුට ගිනි තැබූ 5 වසර සිසුන් තිදෙනකු ගම්පොළ, කුරුඳුවත්ත පොලිස් භාරයට ගෙන පරීක්ෂණ අරඹා තිබේ.
පන්ති කාමරයේ තිබූ තිනර් බෝතලයක් සොරාගැනීම සම්බන්ධව මෙසේ පාවා දුන්නැයි කෝපවූ ගම්පොළ අධ්‍යාපන කලාපයට අයත් කුරුඳුවත්ත, යටපාන ප්‍රදේශයේ ප්‍රාථමික විද්‍යාලයක වයස අවුරුදු 10 හා 11 වයස්වල සිසුන් තිදෙනකු පන්ති කාමරයේදී තීන්ත භාජනයකට තිනර් දමා එයට ගිනි තබා තවත් සිසුවකුගේ ඇඟට විසි කිරීමෙන් එම සිසුවාගේ දෙපා ගිනිගෙන තුවාල වීමේ සිද්ධියකට මෙම ප්‍රාථමික සිසුන් තිදෙනා පෙරේදා (15) දින කුරුඳුවත්ත පොලිස් භාරයට ගෙන තිබුණි.
මෙම බිහිසුණු සිද්ධියට මුහුණ දුන් සිසුවා පවසන ආකාරයට මෙම විදුහලේ තිබූ තිනර් කෑන් එකක් 5 වසර පන්තියේ සිසුන් විසින් එහි වැසිකිළි ප්‍රදේශයට රැගෙන ගොස් ඒවා හලමින් ගිනි තබමින් සිට තිබේ.
පසුව එක් සිසුවකු බෝතලයකට එම තිනර් පුරවාගෙන පාසල් පොත් බෑගයේ සඟවාගෙන ඇති අතර එම සිද්ධිය පාසල් බලධාරීන්ට පැවසුවයි මෙම ආරවුලට හේතු වී තිබේ.
එම 5 ශ්‍රේණිය පන්ති භාර ගුරුවරිය ද නොමැති අවස්ථාවක මෙම පාවාදීම පිළිබඳව කෝපවූ එම සිසුවා ඇතුළු තවත් සිසුන් දෙදෙනකු තීන්ත භාජනයකට තිනර් පුරවා එයට ගිනි තබා පන්තියේ සිටි මෙම සිසුවා දෙසට විසිකර තිබේ.
එම සිසුවා ඉන් බේරීමට උත්සාහ කළත් ඔහුගේ දෙපා මතට ගිනි ගන්නා තිනර් හැලීම නිසා ඔහුගේ සිරුරට ගිනි ඇවිළී ඇත. ඔහු කෑ ගසමින් 5 පන්තියේ සිට 4 පන්තිය දෙසට දිව ගොස් තිබේ.
4 වසර පන්තියේ සිටි ගුරුවරියක ගිනිගෙන දුවන මෙම සිසුවා අල්ලාගෙන ඔහුගේ දෙපාවලට පොත් බෑග්වලින් ගසමින් හා ජලය හලමෙන් එම ගින්න නිවා දමා තිබේ. පසුව සිසුවා කුරුඳුවත්ත රෝහලට රැගෙන ගිය අවස්ථාවේ ඔහු ගම්පොළ ශික්‍ෂණ රෝහලට රැගෙන යන ලෙස උපදෙස් ලැබී තිබේ.
මෙම සිද්ධිය පසුගිය පෙබරවාරි 13 වැනි දින සිදුව ඇත. පාසලේ විදුහල්පතිනිය මේ පිළිබඳව නිසි ක්‍රියාමාර්ගයක් නොගෙන සිද්ධිය වසන් කර තිබේ. ගුරුවරුන් පවසා ඇත්තේ තීන්ත ගාමින් සිටියදී බුදු පහන පෙරළී ඒ අසල තිබූ තිනර් වගයකට ගිනි ඇවිළී සිසුවා පිලිස්සුණු බවයි.
දින 5ක් රෝහල්ගතව සිටි මෙම සිසුවා සත්‍ය හෙළිකරමින් පොලීසියට කට උත්තරයක් දී තිබුණද ඒ පිළිබඳව අවධානය යොමු නොවී තිබියදී” කුරුඳුවත්ත පොලිස් ස්ථානාධිපතිවරයා සිද්ධිය දැනගැනීමෙන් පසු මෙලෙස සිද්ධියට හවුල් වයස අවුරුදු 10, 11 වයස්වල සිසුන් තිදෙනකු පොලිස් භාරයට ගෙන කටඋත්තර ලබාගෙන තිබේ.
මෙම සිසුවාගේ මව වන උඩහේන්තැන්න, වීරාවවත්තේ පදිංචි එම්. තිලකමනි විසින් මේ සම්බන්ධයෙන් පොලීසිය වෙත පැමිණිලි කර ඇත. ඇය පවසන්නේ තම දරුවාට මෙම සිද්ධියක් සමඟ මාසයක් පුරා පාසල් ගමන නැවතී ඇති බවයි.
එසේම සුව නොවූ තුවාල සඳහා බෙහෙත් ලබාගැනීමට අධික වියදමක් දරා ත්‍රී රෝද රථයකින් රෝහලට යෑමට සිදුවන බවත් පවසන ඇය, සිද්ධිය පිළිබඳව සාධාරණයක් ද ඉල්ලා සිටින්නීය.
කුඩා සිසුන් සිටින ස්ථානයක අනතුරුදායක ගිනිගන්නා ද්‍රාවණ තබා තිබීම හා සිද්ධිය වසන් කිරීමට උත්සාහ ගැනීම පිළිබඳව විමසීම සඳහා විදුහල්පතිනි නිලන්ති ප්‍රදීපිකා මහත්මියට දුරකතනයෙන් කතා කළද මාධ්‍යයෙන් විමසන බව දැනගත් ඇය දුරකතනය විසන්ධි කර දැමුවාය.
කුරුඳුවත්ත පොලිස් ස්ථානාධිපති ප්‍රධාන පොලිස් පරීක්ෂක සරත් විජේසිංහ මහතා විසින් සිද්ධිය ගම්පොළ අධිකරණය වෙත වාර්තා කිරීමට පියවර ගෙන ඇත. බාල වයස්කරුවන් සම්බන්ධයෙන් පියවර ගැනීම සඳහා සිද්ධිය පොලිස් නීති කොට්ඨාසය වෙත යොමුකර උපදෙස් ලබාගැනීමට පියවර ගෙන ඇත.
