අම්පාර මහ රෝහලේ දි උඩු තොල නොමැතිව ඉපදුන දරුවකුගේ තොල සකස් කිරීමේ සාර්ථක සැත්කමක් අම්පාර මහා රෝහලේ මුඛ හනු පිළිබඳ විශේෂ වෛද්‍ය ආර්.අයි. රිෂාන් මහතා විසින් සිදුකර තිබේ.
දැනට මාස තුනකදි පමණ පෙර මේ දරු උපත සිදුවී ඇති අතර දරුවාට මාස තුනක් ගතවු පසු අම්පාර මහා රෝහලේදි මෙම සැත්කම ඉතා සාර්ථකව සිදුකර තිබේ.
මුඛ හනු පිළිබඳ විශේෂ වෛද්‍ය ආර්.අයි. රිෂාන් මහතා පැවසුවේ මෙම සැත්කම ඉතා සාර්ථකව කිරීමට හැකිවු බවයි. මෙම ශල්‍ය කර්මය කිරීමට අවශ්‍ය පහසුකම් මෙම රෝහලේ පවතින බව පැවසු වෛද්‍යවරයා ඒ සඳහා අම්පාර මහා රෝහලේ නිර්වින්දන වෛද්‍යවරුන්ගේ මෙන්ම හෙද කාර්යය මණ්ඩලයෙන් ලැබුණ සහය ඉතා අගය කරන බව පැවසීය.
මේ පිළිබඳ විමසීමේදි අම්පාර මහා රෝහලේ වෛද්‍ය අධ්‍යක්ෂ විශේෂඥ වෛද්‍ය රංග චන්ද්‍රසේන මහතා පැවසුවේ, දැනට අම්පාර මහා රෝහලේ මෙවැනි සැත්කම් සිදුකරන අතර ඒ සඳහා දක්ෂ විශේෂඥ වෛද්‍යවරයෙක් අම්පාර මහා රෝහලේ සිටින බවයි. මෙවැනි දරු උපත් අම්පාර දිස්ත්‍රික්කයේ කුමන ස්ථානයක සිදුවුවත් එය සාර්ථක සැත්කමක් මගින් එම අඩුපාඩුව සකස් කර ගැනීමට හැකි බව ද වෛද්‍ය අධ්‍යක්ෂවරයා සඳහන් කළේය.
