ශ්‍රී ලාංකික සිසුන්ට අමෙරිකා එක්සත් ජනපද අධ්‍යාපන අවස්ථා විවර කරන අධ්‍යාපන ප්‍රදර්ශනය නොමිලේ පැවැත්වීමට ශ්‍රී ලංකාවේ අමෙරිකානු තානාපති කාර්යාලය පියවර ගෙන තිබේ.
ඒ අනුව EducationUSA විශ්වවිද්‍යාල අධ්‍යාපන ප්‍රදර්ශනය 2025 සඳහා නොමිලේ සහභාගී වීමට ලියාපදිංචි විය හැකි අතර එක්සත් ජනපද – ශ්‍රී ලංකා ෆුල්බ්‍රයිට් කොමිසම සමඟ සහයෝගීතාවෙන් එක්සත් ජනපද උසස් අධ්‍යාපනය පිළිබඳ රජයේ නිල තොරතුරු මූලාශ්‍රය වන EducationUSA මඟින්, මේ මස 20 වැනි දින සිට 22 වැනි දින දක්වා කොළඹ, ගාල්ල සහ මාතර නගරවල එක්සත් ජනපද විශ්වවිද්‍යාල පිළිබඳ ප්‍රදර්ශනයක් පවත්වන බව ශ්‍රී ලංකාවේ එක්සත් ජනපද තානාපති කාර්යාලය පවසයි. මේ ප්‍රදර්ශන මාලාව එළඹෙන 20දා කොළඹ කිංග්ස්බරි හෝටලයේ දී ද 21දා ගාල්ල රැඩිසන් බ්ලූ හෝටලයේ දී සහ 22 දා මාතර, රුහුණ විශ්වවිද්‍යාලයේ දී පැවැත්වීමට සැලසුම් කර තිබේ. උපාධි, පශ්චාත් උපාධි සහ ආචාර්ය උපාධි වැඩසටහන්වලට ඇතුළත් වීමට අපේක්ෂා කරන සිසුන්ට එක්සත් ජනපදය පුරා පිළිගත් විශ්වවිද්‍යාල නවයක නියෝජිතයන් හමුවීමට මෙහිදී අවස්ථාව ලැබේ.
සිසුන්, මවුපියන් සහ පාසල් පරිපාලක නිලධාරීන් ඇතුළු සියලු දෙනාටම මේ සඳහා සහභාගී වීමට හැකිවන අතර මේ ප්‍රදර්ශනයට සහභාගි වීමට ගාස්තුවක් අය නොකරන බවද ප්‍රදර්ශනය සඳහා ලියාපදිංචි වීම අවශ්‍ය බව ද තානාපති කාර්යාලය කියයි.
මේ සම්බන්ධ වැඩි විස්තර සහ ලියාපදිංචිය සඳහා bit.ly/EducationUSARoadshow2025 මඟින් පිවිසිය හැකිය.
