සිය දිවි ගමනේ 92 වැනි වසර ද පසු කළ එස්.ජී. පුංචිහේවා මහා ලේඛකයාණන්, ගුරුනයුවාණන්, මාධ්‍යවේදියාණන්, පොදු ජනතාවගේ නීතිවේදියාණන් පිළිබඳ මතක සටහන් කීපයක් වේ.
* 1987, 89 භීෂණ සමයේදී සූරියකන්දේ වැළලුණු තරුණයන්ගේ හඬ ලොවට ගෙන ගිය දෙතුන් දෙනාගෙන් කෙනෙක් ඔබ.
* ණය ගෙවීමට අපහසු වූ ගොවීන් සිරගෙට දැක්කීමට නීති ගෙන ආ, ජල බදු මඟින් ගොවි ගෙල සිර කිරීමට තැත්කළ එ.ජා.ප. නායකයන්ට එරෙහිව පෑනත්, සිය නීතිඥ වෘත්තියත් කැප කළ කෙනෙක් ඔබ.
• ලූශුන්, ඛලීල් ගිබ්රාන් වැනි ලේඛකයන් සහ උසස් ජනතාවාදී සාහිත්‍යය රටට හඳුන්වා දුන් ඔබ.
• 1980 ජූලි මහ වැඩ වර්ජනය නිසා සිවු වසරක් විරැකියාවට ගොදුරු වූ නමුදු අනාථ වූ වර්ජකයන් රැක ගැනීමට සිය සවිය යෙදවූ ඔබ,
• උදේ පාසලේ ද සවස ‘ඇත්ත’ කර්තෘ මණ්ඩලයේ ද සේවය කරමින් සිසු දරුවන්ට මෙන්ම පාඨකයන්ට යුක්තිය, සත්‍යය වටහාදීමට වෙහෙසුණු ඔබ,
• දක්ෂ නීතිවේදියකු වුවද මුදල් රැස් කිරීමේ අරමුණෙන් තොරව, පීඩිතයන් පීඩකයන්ගෙන් මුදා ගැනීමට නීතිඥ වෘත්තිය කැප කළ, සොච්චම් ගුරු විශ්‍රාම වැටුපෙන් පණ ගැටගසාගත් ඔබ,
• සැබෑ සමාජ යථාර්ථය මතු කරමින් යුක්තිසහගත සමාජයක් ගොඩනැඟීමට උත්තම ගණයේ ග්‍රන්ථ රාශියක් ජනතාවට පිදූ ඔබ දෑස නොපෙනී, සිරුර දුබලවැ ගියද සමාජ අසාධාරණයට එරෙහිව, යුක්තිය පතා පණ පිරුණු සිය කටහඬ ලොවට මුදාහරිනු අද ද අපි යූටියුබ් මඟින් අසමු.
ඔබගේ දස දහස් සංඛ්‍යාත පාඨක ජනතාව වෙනුවෙන් ඔබට සුබපතමු. නිදුක් බව නීරෝගි බව, සුවපත් බව ඔබ සමඟම වේවා!
දෙනගම සිරිවර්ධන
