පාසල් සිසුවකුට පිහියක් පෙන්වා බිය ගන්වා මුදල් කොල්ලකෑ පුද්ගලයා පසු පස හඹාගිය පිරිසක් එම පුද්ගලයාට ගල්වලින් පහර දීම හේතුවෙන් මියගොස් ඇතැයි කොහුවල පොලීසිය කියයි.
මියගිය පුද්ගලයා කවුරුන්දැයි මෙතෙක් හඳුනාගෙන නැතැයි ද පොලීසිය පවසයි.
කොහුවල වුඩ්ලන්ඩ් මාවතේ පදිංචි ව්‍යාපාරිකයකු පොලීසියට පැමිණ පැමිණිල්ලක් සිදුකරමින් ඔහු නි‍ෙවසේ සිට නුගේගොඩ දෙසට යාමට යතුරුපැදියෙන් මල්වත්ත පාර දිගේ පැමිණෙන අවස්ථාවේදී පුද්ගලයකු දුවගෙන පැමිණි බවත් ඔහු පිටුපස තවත් කිහිපදෙනෙකු පන්නාගෙන ආ බවත් එම පිරිස අතර කොහුවල ප්‍රදේශයේ පෑස්සුම් වැඩපොළක පුද්ගලයකු ද සිටිය බව පැමිණිලි කර ඇත.
අදාළ පැමිණිල්ල අනුව ක්‍රියාත්මක වූ පොලිස් නිලධාරින් නුගේගොඩ නාලන්දාරාම පාරේ ඇවිදින මං තීරුවේ වැටී සිටි පුද්ගලයා පරීක්ෂා කිරීමේදී හිස පිටුපස සහ වම්කන අසල කැපුම් තුවාල සහිතව ලේ පෙරමින් සිටි පුද්ගලයා කළුබෝවිල ශික්ෂණ රෝහලට ඇතුළත් කිරීමෙන් අනතුරුව මිය ගොස් ඇත.
අදාළ පැමිණිල්ල සම්බන්ධයෙන් සිදුකළ මූලික විමර්ශනවලදී පාසල් සිසුවාගෙන් මුදල් කොල්ලකෑ එම පුද්ගලයාට තවත් පුද්ගලයින් තිදෙනකු පසුපස එළවා ගොස් ගල්වලින් පහර දී ඇති බවට පොලීසිය විසින් තොරතුරු සොයාගෙන ඇතැයි උසස් පොලිස් නිලධාරියකු පැවසීය. අදාළ මරණය සම්බන්ධයෙන් ගල්කිස්ස මහේස්ත්‍රාත් අධිකරණය වෙත කරුණු වාර්තා කිරීමට නියමිතය.
