හිටපු බස්නායක නිලමේවරයකු වන සමගි ජන බලවේගයේ සංවිධායකවරයකුගේ නිවෙසක් බිඳ භාණ්ඩ සොරා ගත්තේ යැයි පැමිණිල්ලකට අනුව කහවත්ත ඇන්දාන පොලීසිය සිදු කළ ව්මර්ශනයකදි එම සොරා ගත් භාණ්ඩ අතර තිබූ ඔස්ට්‍රියාවේ නිෂ්පාදිත ගිනි අවියක් සහ උණ්ඩ සමඟ සොරකමට සම්බන්ධ සැකකරු අත්අඩංගුවට ගෙන පැල්මඬුල්ල වැඩ බලන මහේස්ත්‍රාත් හවුපේ එම්. ජයසිරි මහතා හමුවට ඉදිරිපත් කිරීමෙන් පසු සැකකරු ලබන 25 වැනිදා තෙක් රක්ෂිත බන්ධනාගාරගත කිරීමට නියෝග කළේය.
පෙරේදා 14 වැනිදා මෙම සැකකරු අධිකරණයට ඉදිරිපත් කරනු ලැබීය.
මහනුවර ප්‍රදේශයේ දේවාල දෙකක බස්නායක නිලමේවරයකු සහ සමගි ජන බලවේගයේ මහනුවර දිස්ත්‍රික් සංවිධායකවරයකුට අයත් කහවත්ත ඇන්දාන ගොඩකුඹුර කීනමුල්හේන වතුයායේ වතු බංගලාව පසුගිය 08 වැනිදා බිඳ ඇතැයි එම වතු හිමියා ඇන්දාන පොලීසියට පැමිණිළි කර තිබිණි. ජල මෝටරයක් ඇතුඵ භාණ්ඩ කිහිපයක් සොරාගෙන ගොස් ඇතැයි පැමිණිල්ලේ සඳහන් වූ බව පොලීසිය අධිකරණයට කරුණු වාර්තා කළේය.
වතු බංගලාවෙන් සොරා ගන්නා ලද භාණ්ඩ කිහිපයක් වත්තේ පහළ කොටසක සඟවා තිබියදී පොලීසිය විසින් සොයා ගෙන තිබ්ණි. ආන්දාන පොලීසියේ සැරයන් (32051) මාධව මහතාගේ මෙ‍ෙහයවීමෙන් වැඩිදුරටත් පරීක්ෂණ කිරීමේදී අලකොළ ගාලක සැඟවී සිටි සැකකරු අත්අඩංගුවට ගෙන ප්‍රශ්න කිරීමේදී සොරා ගත් භාණ්ඩ අතර තිඹු ගිනි අවියක්, බෝර 12 උණ්ඩ හයක් දුරදක්නයක් ද පොලීසිය විසින් සොයා ගත් බව පොලීසිය අධිකරණයට දැනුම් දුන්නේය.
එම ගිනි අවිය හිටපු බස්නායක නිලමේවරයාට අයත් දැයි සොයා පරීක්ෂණ සිදු කරන බවත් ඔහුගෙන් එක් ප්‍රකාශකයක් ලබා ගත් අතර තවත් ප්‍රකාශයක් ලබා ගන්නා බව පොලීසිය පවසයි.
