සුව හමුව

ග්‍රහණි රෝගය පිළි­බඳ ඔබ දැනු­ම්වත් ද?

ආයු­ර්වේද රෝග වර්ගී­ක­ර­ණයේ දැක්වෙන ග්‍රහණි රෝගය, බට­හිර වෛද්‍ය විද්‍යාවේ IBS (Irritable Bowel Syndrome) නමින් හඳු­න්වන රෝගය හා තර­මක් දුරට ලක්ෂ­ණා­නු­රූ­පව සම­පාත වන අතර එය වත්මන් සමා­ජයේ බොහෝ දෙනා පීඩා­වට පත්වී සිටින රෝග තත්ත්ව­යකි. ග්‍රහණි රෝගය විවිධ ස්වරූ­ප­යෙන් විද්‍ය­මාන විය හැකි අතර එහිදී, වැසි­කිළි යෑමේ අව­ශ්‍ය­තා­වයේ සහ වාර ගණනේ වැඩි­වී­මක් සිදුවේ. ඇතැ­ම්විට ආහා­ර­යක් ගත් විගස, තේ, කිරිතේ වැනි පාන­යක් ගත් විගස හෝ සම­හර පුද්ග­ල­යන්ට දුම්පා­නය හෝ බුල­ත්වි­ටක් ගත්විට වැසි­කිළි යාමේ අව­ශ්‍ය­තාව පැන නඟී. එසේ වැසි­කිළි ගියත් මළ පිට­වන ප්‍රමා­ණය අඩු වන අතර නැවත නැවත යාමේ අව­ශ්‍ය­තාව ඇතිවේ. සම­හර අව­ස්ථා­ව­ලදී ගම­නක් යන­විට අත­ර­ම­ගදී, සේව­යට පිටත් වීමට සූදා­නම් වන මෙහො­තේදී හදි­සියේ වැසි­කිළි යාම සිදු කරන්නේ බොහෝ­විට මෙම තත්ත්වය හේතු­වෙනි. එහෙත් කාලී­නව ඇති කර­ගත් පුරු­ද්දක් නිසා ද විය හැකිය.

රෝග ලක්ෂණ

බඩ­වැල් පෙර­ළීම, උදර වේද­නාව (ආහාර ගැනී­මෙන් යම් වේලා­වක් ගත වූ පසු) මළ පිට­වීමේ වෙනස් වීම් (මල­බ­ද්ධය, ඝන හෝ අර්ධ ඝන තත්ත්ව­යෙන්), අධි­කව අධෝ වාතය පිට­වීම ආදිය දැක්විය හැකිය.

ග්‍රහණි රෝගය සඳහා නිශ්චිත හේතු­වක් දක්වා නොමැති අතර ආහාර ජීර්ණය හා සම්බන්ධ ගැටලු, ආහාර මාර්ගයේ ක්‍රමා­කුං­චන චලන සහ සංවේ­දී­තාව සම්බන්ධ ස්නායු­මය ගැටලු සහ මාන­සික තත්ත්ව­යන් හේතු­වන බව දක්වා ඇත. රෝගය සඳ­හාම වූ නිශ්චිත ශල්‍ය හෝ චිකි­ත්සීය ප්‍රති­කා­ර­යක් සිදු නොක­රයි.

ආයු­ර්වේ­දීය විව­ර­ණය අනුව ග්‍රහණි ලෙස හඳු­න්වනු ලබන්නේ, ජීර්ණය වන ආහාර ශරී­ර­යට ග්‍රහ­ණය කර­ගන්නා කොටස එනම් ආමා­ශ­යෙන් පහළ ඇති ක්ෂුද්‍රා­න්ත්‍රය, මහා­න්ත්‍රය හා ඒ සම්බන්ධ සිය­ලුම අව­ය­ව­යන් වන අතර ඒ හා සම්බන්ධ විකෘති තත්ත්වය නිසා මෙම රෝගය ඒ නමින් හඳු­න්වනු ලබයි. මෙහිදී රෝග­යට හේතු ලෙස ආහාර දිර­වීමේ හැකි­යාව දුර්වල කරන සිය­ලුම ආකා­රයේ උණ රෝග, පාචන, අතී­සාර වැනි රෝග­ව­ලින් පෙළෙන අව­ස්ථා­ව­ලදී සහ ආහාර රුචිය අඩු අව­ස්ථා­ව­ලදී දිර­වීම අප­හසු ආහාර ගැනීම, ඔබ ගත් ආහා­ර­යක් දිර­වී­මට ප්‍රථම නැවත නැවත ආහාර ගැනීම (කෑ පිට කෑම), අධික ප්‍රමා­ණ­ව­ලින් ආහාර ගැනීම, ප්‍රධාන ආහාර වේල් ගත් විගස නිදා ගැනීම, තෙල් බහුල ආහාර, අධික උෂ්ණ ආහාර බහු­ලව සේව­නය කිරීම වේ.

රෝග ලක්ෂණ රෝගයේ අවස්ථා අනුව දීර්ඝව දක්වා ඇත.

එහිදී මූලි­කව ශරී­රයේ අලස බව, බර බව, වෙහෙස නොවී වෙහෙස දැනීම, උදර ආශ්‍රිත අධික ශබ්ද ඇති­වීම්, උගුර කට විය­ළීම, බඩ පුරවා දැමීම, අධි­කව අධෝ­වා­තය පිට­වීම, පපු පෙදෙසේ වේද­නාව, ඔක්කා­රය, වම­නය, මළ­පහ සමඟ සීදම් පිට­වීම, අක්‍ර­ම­වත් මළ­පහ පිට­වීමේ රටාව ආදිය දක්වා ඇති අතර මෙම තත්ත්වය කාලී­නව වර්ධ­නය වූ විට එය වෙනත් ශාරී­රික රෝග තත්ත්ව­යන් ලෙස ද ඇතිවේ.

එවිට ගෙල, ඉකිළි, කලව ආශ්‍රිත මාංස පේශි­වල අධික වේදනා තත්ත්ව­යන්, පපු පෙදෙසේ වේද­නාව, කොන්ද ප්‍රදේ­ශයේ වේදනා සහ සන්ධි ආශ්‍රිත වේදනා ලෙස ද රෝග ලක්ෂණ පෙන්වනු ලබයි. මෙම තත්ත්වය කාලී­නව පව­තින අම්ල පිත්ත එනම් ගැස්ට්‍ර­යි­ටීස් නිසා ඉක්ම­නින් ඇති විය හැකිය.

ග්‍රහණි රෝගය සඳහා ඉතා­මත් සාර්ථක ප්‍රති­කාර පද්ධ­ති­යක් ආයු­ර්වේද වෛද්‍ය ක්‍රමය තුළ පව­තින අතර එහිදී, මූලි­ක­වම ආහාර ජීර්ණය කිරීමේ ශක්තිය වැඩි­කි­රීම සහ අන්ත්‍ර­වල ක්‍රමා­කුං­චන චලන යථා තත්ත්ව­යට පත්කි­රීම සිදු කරනු ලබයි. ප්‍රති­කාර සිදු කරන කාලය අත­ර­තුර ඊට අදාළ ආහාර රටා­වන් සහ වැළ­කිය යුතු දේව­ලින් රෝගියා ඉව­ත්වීම අත්‍ය­වශ්‍ය වේ. එසේ ක්‍රමා­නු­කූල ප්‍රති­කාර පද්ධ­ති­යක් මඟින් සති­යක් හෝ සති කිහි­ප­යක් තුළ මෙම රෝග­යෙන් අත්මි­දිය හැකිය.

ග්‍රහණි රෝගය සඳහා පොදු ප්‍රති­කාර පද්ධ­ති­යක් දැක්විය නොහැකි අතර එය රෝගියා අනුව, වයස හා ස්ත්‍රී පුරුෂ බව අනුව, රෝගයේ ස්වභා­වය අනුව, වෙනත් ලබා­ගන්නා රෝග ප්‍රති­කා­ර­යන් ආදිය අනුව ද වෙනස් වන අතර සුදු­සු­කම් සහිත වෛද්‍ය­ව­ර­යකු හමුවී ප්‍රති­කාර ලබා­ගත හැකිය.

නොගත යුතු ආහාර වර්ග

ගැඹුරු තෙලේ සහ නැවත භාවිත කරන තෙල්ව­ලින් බදින ආහාර (කෙටි ආහාර වර්ග), කොත්තු සහ ෆ්‍රයිඩ් රයිස්, අමු පොල් යොදා සකස් කරන පොල් සම්බෝල, කොස්, පොළොස්, වරකා, කඩල, සිය­ලුම කේක් වර්ග සහ ඒ ආශ්‍රිත ආහාර වර්ග (ඩෝනට්, කප් කේක් ආදී…), පිෂ්ට සහ තෙල් බහුල ආහාර වර්ග.

මෙහි දක්වා ඇති ආහාර මඟින් ග්‍රහණි රෝගය මෙන්ම ගැස්ට්‍ර­යි­ටීස් සහ මිග්‍රේන් වැනි රෝග­යන් වැඩි­වීම සහ සුව වීමට කල්ග­ත­වීම සිදු වන අතර ඒවා­යින් වැළ­කීම ඉතා සුදුසු වේ.

උප­දෙස් – රජයේ ආයු­ර්වේද වෛද්‍ය ඊ.එම්.ඊ.එස්. අල­හ­කෝන්

ඉරෝෂා දීපානි

මව­කගේ මොළයේ හැකි­ළීම හෙවත් සොබා­ද­හමේ දායා­දය

මෑත­කදී එක්සත් රාජ­ධා­නියේ වෛද්‍ය පර්යේ­ෂ­ක­යන් පිරි­සක් විසින් සිදු කරන ලද පර්යේ­ෂණ මාලා­වක ප්‍රති­ඵල අනුව ගර්භණී සම­යේදී හා දරු ප්‍රසූ­ති­යෙන් මාස හයක් දක්වා වූ කාල සීමා­වේදී එම මවු­ව­රුන්ගේ මොළයේ සිදු­වන සුවි­ශේෂී වෙන­ස්කම් රැසක් නිරී­ක්‍ෂ­ණ­යට ලක්වී තිබේ.

ඒ අනුව වයස අවු­රුදු 20ත් 38ත් අතර වන මවු­ව­රුන්ගේ (නියැ­දියේ) මොළය ආශ්‍රි­තව ලබා­ගත් MRI Scan දත්ත අනුව මොළය යම්කිසි ආකා­ර­යක හැකි­ළී­ම­කට නොඑසේ නම්, සංකෝ­ච­න­ය­කට (Shrinkage of the gray matter of the brain ) ලක්ව ඇති බව තහ­වුරු වී ඇත.

මේ තත්ත්වය නිසාම බොහෝ ගර්භණී කාන්තා­වන්ට අම­තක වීමේ සම්භා­වි­තාව ඉහළ යෑම ( උදා­හ­ර­ණ­යක් ලෙස යම්කිසි දෙයක් තැබූ ස්ථානය අම­තක වීම , තමන් විසින්ම තැබූ සට­හ­නක් නැවත ස්මර­ණය කිරීමේ නොහැ­කි­යාව) ආදිය මෙන්ම දෛනික කාර්ය­යන් අත­ප­සු­වීම දැක­ගත හැකිය.

එසේම සාපේක්ෂ වශ­යෙන් ගඳ සුවඳ දැනීම තීව්‍ර වීම , නුරු­ස්සනා සුලු ස්වභා­වය ඉස්මතු වීම ද මෙහිදී නිරී­ක්ෂ­ණය වී තිබේ. ඇත්තෙන්ම මෙහිදී සිදු­වන්නේ මොළයේ ඇති සෛල ප්‍රමා­ණය සංඛ්‍යා­ත්ම­කව අඩු­වීම නොව විශා­ල­ත්ව­යෙන් අඩුවී හැකි­ළී­මට ලක් වීමයි. මෙසේ හැකි­ළී­මට ලක් වූ නියු­රෝන දරු ප්‍රසූ­ති­යෙන් මාස හයක් වැනි කෙටි කාල­යක් තුළ නැව­තත් ප්‍රකෘති තත්ත්ව­යට පත්වන අතර මොළයේ ධාරි­තා­ව ද පෙර පැවති ප්‍රමා­ණ­ය­ටම පත් වන බව මෙහිදී පෙනී ගිය කරු­ණකි.

එමෙන්ම, මෙහිදී වැද­ගත්ම සහ වඩාත්ම විම­තිය දන­වන කාර­ණය වන්නේ මොළ­යෙහි සිදු­වන මෙම සංකෝ­ච­නය තුළින් (reduction of gray matter) මව­ටම ආවේ­ණික වූ වෙනත් හැකි­යා­වන් කිහි­ප­යක් තාව­කා­ලි­කව ඉස්මතු වීමයි.

එනම්, භාෂා­ව­කින් තොරව ශබ්ද සහ සංඥා ආශ්‍ර­යෙන් පම­ණක් යමක් තේරුම් ගැනී­මට ඇති හැකි­යාව පෙර නොවූ විරූ ලෙස ඉහළ යෑම. එය මෙහි ප්‍රධා­න­තම නිරී­ක්ෂ­ණ­යයි. මෙය මව සහ බිලිඳා අතර සන්නි­වේ­ද­නය ඉහළ දැමී­මට සොබා දහම විසින් ගන්නා වූ ක්‍රියා­මා­ර්ග­යක් ලෙස මේ වන විට හඳු­නා­ගෙන ඇත.

සහජ බුද්ධියේ (instincts) හා චිත්ත වේගීය බැඳීම් (emotional bonding) වලට අදා­ළව කට­යුතු කරන මස්තිෂ්ක ප්‍රදේ­ශ­යන්ද මෙම හැකි­ළීම අත­ර­වා­ර­යේදී යුහු­සු­ලුව ක්‍රියා­ත්මක වන බවද නිරී­ක්‍ෂ­ණය වී ඇත.

මෙම සියලු කාරණා හරහා ළද­රුවා හා මව අතර ආර­ක්ෂණ – යැපීම් සහ­ස­ම්බ­න්ධය සොබා දහම විසින් තහ­වුරු කරනු ලබයි.

වෛද්‍ය ඩී.එම්. අම­ර­සේ­කර

සැල­කි­ලි­මත් විය යුතුම ආඝා­තය

ඉකුත් වසර 10ක කාලය පුරා­වට ශ්‍රී ලංකාවේ රජයේ රෝහ­ල්ව­ලට ඇතු­ළත් කළ ආඝාත රෝගීන්ගේ සංඛ්‍යාව දෙගු­ණ­යක් වී ඇති බවත්, වාර්ෂි­කව 60,000කට ආසන්න රෝගීන් සංඛ්‍යා­වක් රෝහල් ගත කර තිබී­මෙන් සංඛ්‍යා ලේඛන අනුව ද මෙහි අව­දා­නම කියා­පායි. එමෙන්ම, ලෝක ආඝාත සංවි­ධා­නය මඟින් ලෝක ආඝාත දිනය ප්‍රකා­ශ­යට පත් කර ඇත. මෙහිදී ආඝාත රෝගීන්ගේ ස්වභා­වය සහ රෝගය වැල­ඳීමේ ඉහළ අනු­පා­ත­යන් පිළි­බඳ දැනු­ම්ව­ත්භා­වය ඉහළ නැංවීම රෝග නිවා­ර­ණය සහ ප්‍රති­කාර කිරීම මෙන්ම මෙයින් අව­ධා­ර­ණය කෙරේ. ඉඳින්, අ⁣පගේ මොළයේ කොටස් යම් යම් කාර්ය­යන් කිරීම සඳහා සූදා­නම්ව සිටියි. එසේම අප ශරී­රයේ සිදු කරන කාර්ය­යන් මොළයේ කාර්ය­යන්ම වේ. මොළයේ යම්කිසි දුර්ව­ල­තා­වක් ඇති වුව­හොත් ඊට අදාළ කාර්යය සිදු කර­ගත නොහැ­කිය. සිය­ලුම අව­ය­ව­ව­ලට රුධිර සැප­යු­මක් ඇතුවා සේම මොළ­ය­ටද රුධිර සැප­යු­මක් පවතී. රුධිර ප්‍රවා­හ­නයේ යම් අප­හ­සු­වක් සිදු­වු­ව­හොත් එම රුධි­රය ලබන ප්‍රදේ­ශය අඩ­පණ වීම­කට ලක්වේ. එවිට මොළයේ යම් කොට­සක් ක්‍රියා­ත්මක නොවන තත්ත්ව­යට පත්වේ. මෙසේ වී යථා තත්ත්ව­යට පත්වීම සුළු ආඝාත තත්ත්ව­යකි. ආඝා­තය ඇති වන්නේද හෘද­යා­බා­ධ­යක් හට­ගන්නා ආකා­ර­ය­ට­මය. ඒත් ඒ සිදු­වන්නේ මොළය තුළය.

මෙය දෙයා­කා­ර­ය­කට සිදුවේ.

* රුධිර සැප­යුම අව­හි­ර­වීම

* නහ­ර­යක් පුපුරා මොළය තුළට රුධි­රය වැගි­රීම

මේ තත්ත්ව­යන් දෙකම දැක­ගත හැකි අතර වඩාත් දක්නට ඇත්තේ රුධිර සැප­යුම අව­හිර වීමයි. එය 80%ක් පමණ වේ.

රුධි­රය වැගි­රීම තුළින් සිදු­වන්නේ ස්නායු සෛල තෙර­පී­ම­කට භාජ­නය වීමයි. රුධිර සැප­යුම අඩු වීමක් සිදු­වු­ව­හොත් ඊට අදාළ ප්‍රදේ­ශය ක්‍රියා විර­හිත වේ. මෙසේ වීමට ප්‍රධාන හේතුව මොළ­යට රුධි­රය සප­යන රුධිර වාහි­නී­වල අභ්‍ය­න්තර බිත්ති­වල මේදය තැන්පත් වීමය. මෙවැනි රුධිර වාහිනී තුළ රුධිර කැටි මඟින් අව­හිර වීමට ඇති හැකි­යාව ද වැඩිය. එවිට ඒ රුධිර වාහි­නී­ව­ලට සාමාන්‍ය පරිදි මොළ­යට රුධි­රය සැප­යී­මට නොහැකි වීමෙන් එම ඉන්ද්‍රි­ය­යන්ට හානි සිදුවේ.

බර­ප­තළ ආඝා­තය

ආඝා­ත­ය­කදී දක්නට ලැබෙන සුල­භම රෝග ලක්ෂ­ණය නම් මුහුණේ අත්වල හෝ පාද­වල හදි­සි­යෙන් ඇති­වන දුර්වල වීමකි. බොහෝ­විට ඒ ශරී­රයේ එක් පසෙක පම­ණක් දක්නට ලැබේ. මීට අම­ත­රව

* මුහුණ අත් හෝ පාද­වල ඇති­වන හිරි­වැ­ටීම( මෙය විශේ­ෂ­යෙන් ශරී­රය එක් පැත්තක දක්නට ලැබේ.), කථන අප­හ­සු­තාව හෝ කතා කරන දේ අන් අයට තේරුම් ගැනී­මට නොහැකි වීම, එක් ඇසක හෝ දෑසම හෝ පෙනීමේ දුර්ව­ල­තා­වක් ඇති­වීම, ඇවි­දීමේ අප­හ­සු­තාව, කර­කැ­විල්ල ශරී­රයේ සංතු­ල­නය හෝ සමා­යෝ­ජ­නය නැතිවී යෑම , හේතු­වක් නැතිව ඇති­වන අධික හිස­ර­දය, ක්ලාන්ත වීම හෝ සිහි නැති වීම ආදිය ද වෙයි.

ආඝා­ත­යෙන් පසුව පව­තින සෞඛ්‍ය තත්ත්වය රඳා පව­තින්නේ මොළයේ කුමන කොට­සට හානි වී තිබේද හා එම හානි­යෙන් ඇති වූ බල­පෑමේ තීව්‍ර­තාව මතය. ආඝා­ත­යක් මඟින් ශරී­රයේ එක් කොට­ස­කට එනම් මුහු­ණට අත­කට හෝ පාද­ය­කට පම­ණක් බල­පෑ­මක් ඇති­විය හැකියි. එම­ඟින් ශරී­රයේ එක් පැත්තක් මුළු­ම­නින්ම අප්‍රා­ණික වීමට ඉඩ­කඩ පව­තියි. ඉතා බර­ප­තළ ආඝා­ත­යක් මඟින් හදිසි මර­ණය පවා ඇති­කළ හැකිය.

සුළු ආඝා­තය

සුළු ආඝාත තත්ත්ව­යක ලක්ෂණ බර­ප­තළ ආඝාත තත්ත්ව­යක ලක්ෂ­ණ­ව­ලට සමාන විය හැකියි. එහෙත් ඒවායේ බල­පෑම එත­රම් බර­ප­තළ නොවේ. රෝග ලක්ෂණ සාමා­න්‍ය­යෙන් කෙටි කාල­යක් බොහෝ විට පැය­කට වඩා අඩු කාල­යක් පවතී.සුළු ආඝාත තත්ත්ව­යක් එක් වරක් හෝ කිහිප වරක් ඇති­වුණු පුද්ග­ල­ය­කුට පසු කල­කදී බර­ප­තළ ආඝාත තත්ත්ව­යක් දක්වා ඇති­විය හැකියි.

ආඝා­ත­යක් ඇති වූ විට කළ යුතු දේ

යම් පුද්ග­ල­යෙකු ආඝා­ත­යක ලක්ෂණ පෙන්වන්නේ නම් ඉක්ම­නින් වෛද්‍ය­ව­ර­ය­කුට හෝ ගිලන් රිය­කට හෝ දැන්විය යුතුයි. නැත්නම් ආස­න්නයේ පිහිටි රෝහලේ හදිසි ප්‍රති­කාර අංශ­යට වහා ඇතු­ළත් කළ යුතුයි. රෝග ලක්ෂණ බර­ප­තළ නොවූ­වද මෙසේ කළ යුතුවේ.එයට හේතුව සුළු ආඝා­ත­යක් තව දුර­ටත් බර­ප­තළ තත්ත්ව­යට වර්ධ­නය විය හැකි නිසායි. සුළු ආඝාත තත්ත්ව­ය­කදී වුවද ඔබ ඉහත ක්‍රියා­මාර්ග ගත යුතුයි. ආස­න්නව රෝහ­ලක් හෝ සෞඛ්‍ය මධ්‍ය­ස්ථා­න­යක් නොමැති නම් වෛද්‍ය­ව­ර­ය­කුට යොමු විය යුතුවේ.

ආඝාත තත්ත්ව­යට ප්‍රති­කාර කිරීම

ඔබට ලැබෙන වෛද්‍ය ප්‍රති­කා­ර­වල මට්ටම රෝහ­ලින් රෝහ­ලට වෙනස් විය හැකියි. ලැබිය යුතු ප්‍රති­කාර ප්‍රමා­ණය ආඝා­තයේ බර­ප­ත­ළ­කම අනුව තීර­ණය වේ.

ආඝා­ත­යක මූලික ලක්ෂ­ණ­ව­ලින් පැය තුනක් ඇතු­ළත ඔබ රෝහ­ලට පැමි­ණි­ය­හොත් ඒ වෛද්‍ය­ව­රයා විසින් ඔබට ධම­නි­වල තිබිය හැකි රුධිර කැටි දිය­කර හැරීම සඳහා රුධිර කැටි දිය­වීමේ ඖෂ­ධ­යක් ලබා දෙනු ඇත. කෙසේ වුවද ලබා­දිය යුතු ප්‍රති­කා­රය තීර­ණය වන්නේ ආඝා­ත­යට හේතු වූ නිශ්චිත කරුණු මතය.

රෝග විනි­ශ්ච­යේදී ඔබට වැලඳී ඇත්තේ කුමන වර්ගයේ ආඝා­ත­යක් ද සොයා බැලී­මට වෛද්‍ය­වරු රෝග ඉති­හා­සය ලබා­ගෙන ඔබව පරීක්ෂා කොට විශේෂ පරී­ක්ෂණ සිදු කරනු ලැබේ.

ඔබේ රෝග ලක්ෂණ සම­නය කිරී­මට හා අනා­ග­තයේ ඇති­විය හැකි ආබාධ තත්ත්ව­යන් වැළැ­ක්වී­මට වෛද්‍ය­ව­රයා විසින් බොහෝ විට ඖෂධ නිර්දේශ කරනු ලැබේ.

උප­දෙස් – කොළඹ වෛද්‍ය පීඨයේ ජ්‍යෙෂ්ඨ කති­කා­චාර්ය මහා­චාර්ය රවින්ද්‍ර ප්‍රනාන්දු

ආශි­ර්වා­දිනි හෙට්ටි­ආ­රච්චි

ජීවිත-රට දෙකම වන­සන දුම්පා­නය

“දුම්පා­නය ශරී­ර­යට අහි­ත­ක­රයි, පිළිකා ඇති කරයි” ලෙස දුම්වැටි පැකැ­ට්ටු­වේ ද සඳ­හන් කර තිබි­ය­දීත් දුම්පා­නය කර­න්නන් ඒ දැක දැකම දුම්පා­නය කිරී­මට පෙළ­ඹෙන්නේ ඊට ඇබ්බැ­හි­වීම නිසාය. දුම්පා­නය පුද්ග­ල­ය­කුගේ කැමැත්ත වුවත් ඒ නිසා සමා­ජ­යට මෙන්ම රටේ ආර්ථි­ක­යට ද දැඩි බල­පෑ­මක් සිදු කරන හෙයින් දුම්පා­නය සහ එහි විනා­ශය නැවත නැව­තත් සිහි­පත් කළ යුතුය.

දුම්පා­නය නිසා දින­කට මිනිස් ජිවිත 40-50 අතර මර­ණ­යට පත් කර වස­ර­කදී මිනිස් ජීවිත 15000-20000ත් අතර ප්‍රමා­ණ­යක් බිලි­ගන්නා බවත් දුම්වැටි භාවිත කරන දෙදෙ­නෙ­ක­ගෙන් එක් අයෙකු මර­ණ­යට පත් කරන බවත් මද්‍යසාර සහ මත්ද්‍රව්‍ය තොර­තුරු මධ්‍ය­ස්ථාන විධා­යක අධ්‍ය­ක්ෂක සම්පත් ද සේරම් පව­සයි. දුම්පා­නය පිළි­බඳ ඔහු වැඩි­දු­ර­ටත් සඳ­හන් කරන්නේ මෙසේය.

‘දුම්පා­නය කරන අති බහු­ත­රය රෝගීන් බවට පත් කර­නවා. හෘද­යා­බාධ, පිළිකා වැනි මාරා­න්තික රෝග ගණ­නා­ව­කට දුම්පා­නය බල­පා­නවා. බෝනො­වන රෝග අනු­පා­තය සාමා­න්‍ය­යෙන් 80%කට ආසන්න ප්‍රමා­ණ­යක් වෙනවා. විශේ­ෂ­යෙන්ම බෝ නොවන රෝග ඇති කිරී­මට බල­පාන ප්‍රධාන සාධක අතර දුම්පා­නය සහ දුම්⁣කොළ ආශ්‍රිත නිෂ්පා­ද­නය මූලි­කම හේතු­වයි. දුම්පා­නය, සෞඛ්‍ය­ස­ම්පන්න නොවන ආහාර රටා, මත්ද්‍රව්‍ය භාවි­තය සහ ව්‍යායාම නොකි­රීම යන සාධක බෝනො­වන රෝග­ව­ලට බල­පාන සාධ­කයි. මීට අම­ත­රව ලිංගික බෙල­හී­න­තාව ඇති­කි­රී­මට ප්‍රධාන හේතුසාධ­කය ද දුම්පා­න­යයි.

දුම්පා­නය කර­න්නන්ගේ ජිවි­තය දුම්පා­නය සමග සිර­ගත කර­නවා. ඔවුන් දුම්පා­නය සමඟ සිර­වෙ­නවා. මොවුන් එදි­නෙදා ජීවි­ත­යේදී පහ­සු­වෙන් සහ සර­ලව කළ බොහෝ දේ දුම්වැ­ටි­යක් නැතිව කිරී­මට අප­හසු තත්ත්ව­ය­කට පත් කර­ග­න්නවා. උදා­හ­ර­ණ­යක් ලෙස කෑමට පසුව දුම්වැ­ටි­යක් අනි­වා­ර්ය­වීම වැනි කෘත්‍රිම අව­ශ්‍යතා ඇතිවී අව­සා­නයේ වැසි­කි­ළි­යට යෑමට පවා දුම්වැ­ටි­යක් නැති­වම බැරි තැන­කට ජීවි­තය සිර­ක­ර­ග­න්නවා.

දුම්පා­නය නිසා ඇති­වන ඊළඟ ව්‍යස­නය ඒ සඳහා විය­දම් කිරී­මට සිදු­වන විශාල මුද­ලයි. ශ්‍රී ලංකාවේ දින­කට දුම්පා­නය කර­න්නන් කෝටි 52ක් පමණ වැය කර­නවා. අඩු ආදා­ය­ම්ලා­භීන් අත­රත් දුම්පා­නය බහු­ලව දකි­න්නට තිබෙ­නවා. ඒ සඳහා ඔවුන්ගේ ආදා­ය­මින් සැල­කි­ය­යුතු ප්‍රමා­ණ­යක් දුම්පා­න­යට වැය කර­නවා. මේ තත්ත්වය නිවසේ ආර්ථි­ක­යට වගේම රටේ ආර්ථි­ක­ය­යත් බල­පා­නවා.

දුම්පා­නය නිසා විශාල බදු ආදා­ය­මක් රට⁣ට ලැබෙ­නවා යන මිථ්‍යා විශ්වා­ස­ය­කුත් ගොඩ­නැ­ගුණු කාල­යක් පැවැ­තුනා. ඒත් ඒක අසත්‍ය බව අපි මෑත­කදී කළ අධ්‍ය­න­ය­කින් පැහැ­දිලි වුණා. දුම්කොළ බදු ආදා­යම සමස්ත බදු ආදා­ය­මින් සිය­යට 6ක්වැනි සුළු ප්‍රමා­ණ­යක් පම­ණයි. 2019 වාර්තා අනුව දුම්කොළ මුළු බදු ආදා­යම බිලි­යන 92.9යි. ඒත් දුම්වැටි භාවි­තය නිසා සෞඛ්‍ය­යට රුපි­යල් බිලි­යන 214ක් වැය­කර තිබුණා. දුම්පා­න­යට ඇබ්බැ­හි­වීම සිට දුම්පා­නය සහ එයින් ලබන ආදා­යම වැනි සිය­ල්ලක්ම මෙවැනි අසත්‍ය තොර­තුරු බව පැහැ­දිලි කරු­ණක්.’

ඒව­ගේම දුම්වැ­ටියේ දැවී ඉති­රි­වන අව­සන් කොටස, නැති­නම් අපි සිග­රුට් කොටය ලෙස හඳු­න්වන කොටස දුම්වැ­ටියේ පෙර­ණය කිසිදු අයු­ර­කින් ප්‍රති­ච­ක්‍රි­ක­ර­ණය කළ නොහැ­කියි. ඒ නිසා මේ කොටස් සාමා­න්‍ය­යෙන් වස­ර­කදී ලෝකයේ බිලි­යන 2200ක් පමණ පරි­ස­ර­යට මුදා­හ­රි­නවා. පරි­ස­රය⁣ට ඇති­ක­රන ප්‍රබල බල­පෑම නිසාම වර්ත­මා­නය වන විට ලෝකයේ පෙර­ණය භාවිත තහ­නම් කිරී­මට සාකච්ඡා වෙමින් පව­ති­නවා.

ඉරෝෂා දීපානි

පාඨක ගැටලු සහ පිළිතුරු

දරුවාට හිසරදයක්!

ප්‍රශ්නය :

මගේ පුතාගේ වයස අවු­රුදු 04යි. එයාට නිත­රම ඔළුව කැක්කුම කිය­නවා. පැන­ඩෝල් දුන් විට තාව­කා­ලි­කව අඩු වෙනවා. නැවත දින 03 – 04කින් ඔළුව රිදෙ­නවා කිය­නවා. මෙයට කුමක් කළ යුතුද….? (නිරාෂා – මහ­නු­වර )

පිළි­තුර :

හිස­ර­ද­යක් කිය­න­වා­නම් අපි බලන්න ඕන ඒක මොන­වගේ ද කියලා. හිසේ ගෙඩි­යක් ද වෙන යම් භයා­නක දෙයක්ද කියා සෙවිය යුතුයි. හිසේ ගෙඩි­යක් වැනි තත්ත්ව­යක් තිබෙන්නේ 1%කගේ වගේ අඩු ගණ­න­කට නිසා බිය නොවන්න. ඒ කෙසේ වුණත් ඒක බලන්නේ රතු අව­දා­නම් සාධ­ක­ව­ලින්. දෙවැන්න එසේ නොවෙ­න­වා­නම් දරු­වාට තිබෙන්නේ අව­දා­න­මක් නොමැති හිස­ර­ද­යක් ද , ප්‍රාථ­මික හිස­ර­ද­යක් ද කියා සොයා බැලිය යුතුයි . ඉරු­වා­ර­දය ද , ආත­තිය හා බැඳුණු හිස­ර­දය ද, අධ්‍යා­ප­නික ගැට­ලු­වක් ද, වෙනත් ගැට­ලු­වක් ද , දරු­වාට ඇතිවූ පීඩ­න­යක් සමඟ ආ හිස­ර­ද­යක් ද කියා සෙවිය යුතුයි.

ප්‍රශ්නය :

බබා ඉප­දුණේ සිසේ­රි­යන් සැත්ක­ම­කින්. එයාට උණක්, සෙම්ප්‍ර­ති­ශ්‍යා­වක් හැදු­ණත් සුව වෙන්න සෑහෙන දව­සක් ගත වෙනවා. සිසේ­රි­යන් දරු­වන්ගේ ප්‍රති­ශ­ක්ති­ක­ර­ණය අඩු බව මා අසා තිබෙ­නවා . එහි සත්‍ය­තා­වක් තිබේද? (සාවිත්‍රි _ කෑගල්ල)

පිළි­තුර :

සිසේ­රි­යන් සැත්ක­මෙන් දරු­වකු බිහි වෙද්දි අපට හිත­කර ක්ෂුද්‍ර ජීවීන් ටික එක­තු­වෙලා නෙවෙයි දරුවා එළි­යට එන්නේ. සාමාන්‍ය ප්‍රසූ­ති­ය­කින් දරු­වකු බිහි­වන විට එම ස්ථානයේ හිත­කර ක්ෂුද්‍ර ජීවීන් රැසක් එකතු කර­ගෙ­නයි දරුවා එළි­යට එන්නේ. එනිසා විද්‍යා­ත්මක දත්ත නිරී­ක්ෂ­ණ­යේදී පෙනෙ­නවා සාමාන්‍ය ප්‍රසූ­ති­ය­කින් බිහි­වන දරු­වාට ප්‍රති­ශ­ක්ති­ක­රණ හැකි­යාව වැඩියි කියලා. ප්‍රති­ශ­ක්ති­ක­රණ සෛල සහ ඒ නිප­ද­වෙන දේවල යම් වාසි­දා­යක තත්ත්ව­යක් තියෙන බව පෙනෙ­නවා. දීර්ඝ­කා­ලී­නව බැලූ­විට සිසේ­රි­යන් සැත්ක­ම­කින් උප­දින දරු­වන්ට අසා­ත්මි­කතා (ඇල­ජික්) , හතිය වගේ දේවල් සහ ප්‍රති­ශ­ක්ති­ක­රණ පද්ධ­තිය හා බැඳුණු ආර­ක්ෂා­වත් ඒ හා බැඳුණු රෝග­ව­ලත් යම් වැඩි ප්‍රති­ශ­ක්ති­යක් නිරූ­ප­ණය වන බව ඒ පිළි­බඳ පළ කර ඇති ජාත්‍ය­න්තර දත්ත­වල සහ දීර්ඝ­කා­ලී­නව ඉප­දුණු දරු­වන් පිළි­බඳ අධ්‍ය­ය­නය කිරී­මේදී පෙන්නුම් කර­නවා.

උපදෙස් – විශේ­ෂඥ වෛද්‍ය අනු­රුද්ධ පාදෙ­ණිය (රිජ්වේ ආර්යා ළමා රෝහල_බොරැල්ල )

මනෝජ් රුක්මල් කුමා­ර­සිංහ

ඔබේ සෞඛ්‍ය ගැට­ලු­වත් අපට යොමු කරන්න
දින­මිණ, සුව හමුව, ලේක්හ­වුස්, කොළඹ 10
news.dinamina@lakehouse.lk