අනුරාධපුර රෝහලේ වෛද්‍යවරියකට අතවර කිරීම සම්බන්ධයෙන් අත් අඩංගුවට ගත් සැකකරු ලබන සඳුදා හඳුනා ගැනීමේ පෙරට්ටුවකට ඉදිරිපත් කරන ලෙසට අනුරාධපුර ප්‍රධාන මහේස්ත්‍රාත්වරයා නියෝග කර තිබේ.
ඊයේ (14) අධිකරණයට ඉදිරිපත් කිරීමෙන් අනතුරුව සැකකරු 17වැනිදා දක්වා රක්ෂිත බන්ධනාගාර ගත කිරීමට මහේස්ත්‍රාත්වරයා නියෝග කළේය.
මෙම අපරාධය සම්බන්ධයෙන් විමර්ශනවල ප්‍රගතිය දැක්වෙන වාර්තාවක්, මීළඟ නඩු දිනයේදී අධිකරණය හමුවට ඉදිරිපත් කරන ලෙසට ද ප්‍රධාන මහෙස්ත්‍රාත්වරයා අනුරාධපුර මූලස්ථාන ප්‍රධාන පොලිස් පරීක්ෂක ආර්.එම්. ජයවීර මහතාට තව දුරටත් නියෝග කර තිබේ.
අනුරාධපුර ශික්ෂණ රෝහලේ වෛද්‍යවරිය දූෂණය කිරීමේ සිදුවීමට සැකපිට හිටපු යුද හමුදා සෙබළෙකු මෙන්ම පැවිදි වී සිටි පුද්ගලයෙක් පසුගියදා අත්අඩංගුවට ගැනුණි.
අධිකරණ නියෝග මත රඳවා තබා ගෙන ප්‍රශ්න කරමින් සිටි සැකකරු අනිද්දා(17) දක්වා රක්ෂිත බන්ධනාගාරගත කෙරුණි.
සැකකරු විසින් පැහැර ගෙන ගොස් ඇති වෛද්‍යවරියට අයත් ජංගම දුරකථනය සොයා ගැනීමට මෙතෙක් හැකිවී නොමැත.
