මධ්‍යම අධිවේගී මාර්ගයේ ඊයේ (14) අලුයම් කාලයේ සිදු වූ අනතුරකින් පුද්ගලයෙක් මිය ගොස් තිබේ.
මධ්‍යම අධිවේගී මාර්ගයේ මීරිගම දෙස සිට කුරුණෑගල දෙසට නාගලගමුව ප්‍රදේශයේ ධාවනය වූ ලොරි රථයක් කාර්මික දෝෂයකට ලක් වීම හේතුවෙන් මාර්ගයේ වම්පසින් නවතා ලොරි රථය පරීක්ෂා කරන අවස්ථාවේ එම දිසාවටම ධාවනය වූ ෆීර්ෂ ලොරි රථයක් නවතා තිබූ ලොරි රථයේ ගැටී මෙම අනතුර සිදුව ඇතැයි පොලිසිය සදහන් කරයි.
අනතුරින් ෆීෂර් ලොරි රථයේ ගමන් කළ රියදුරු සහ රිය සහායක තුවාල ලබා රෝහල්ගත කිරීමට මාර්ගයේ ගමන් කළ වෙනත් වාහනයක රියදුරුවරයෙකු සහායට පැමිණ තුවාල ලැබූ රෝගීන් එසේ රැගෙන යාමට සුදානමින් සිටින අතරතුර එම දිසාවටම ධාවනය වූ කන්ටේනර් රථයක් ෆීෂර් ලොරි රථයේ නැවත ගැටී තිබේ.
එහිදී, සහායට පැමිණි රියදුරු, ෆීෂර් ලොරි රථයේ රියදුරු, රිය සහයකයා හා කාර්මික දෝෂයට ලක් වූ ලොරි රථයේ රියදුරුද බරපතල තුවාල ලබා කුරුණෑගල රෝහලට ඇතුලත් කිරීමෙන් පසු ෆීෂර් ලොරි රථයේ රිය සහයකයා මියගොස් ඇති බව පොලීසිය පවසයි.
මෙසේ මිය ගොස් ඇත්තේ, වයස අවුරුදු 38 ක් වු වඩුගොඩ, බූස්ස ප්‍රදේශයේ පදිංචිකරුවෙකි.
මධ්‍යම අධිවේගී මාර්ග කුරුණෑගල අනුපාලක ස්ථානය මගින් අනතුරට පත් වූ වාහන නාරම්මල පොලිස් ස්ථානයට ඉදිරිපත් කර තිබේ.
වයස අවුරුදු 29 ක් වන සදලංගල ප්‍රදේශයේ පදිංචි කන්ටේනර් රථයේ රියදුරු අත්අඩංගුවට ගෙන ඇති අතර නාරම්මල පොලිසිය වැඩිදුර විමර්ශන සිදු කරයි.
