Home » ශ්‍රී ලංකා-නවසීලන්ත කාන්තා විස්සයි20 සටන අද සිට

ශ්‍රී ලංකා-නවසීලන්ත කාන්තා විස්සයි20 සටන අද සිට

by thanushika
March 14, 2025 3:55 pm 0 comment

සාංචාරක ශ්‍රී ලංකා කාන්තා ක්‍රිකට් කණ්ඩායම සහ නවසීලන්ත කාන්තා ක්‍රිකට් කණ්ඩායම අතර තරග 3කින් සමන්විත විස්සයි20 තරගාවලිය ආරම්භ කරමින් අද (14) පළමු තරගය මෙරට වේලාවෙන් පෙරවරු 11.45ට ක්‍රයිස්චර්ච්හි හැග්ලේ ඕවල් පිටියේදී පැවැත්වේ.

චමරි අතපත්තුගේ නායකත්වයෙන් එක්දින තරගාවලියට නම් කළ සංචිතයම මේ තරගාවලියටත් එක්වන අතර, සුසී බෙට්ස්ගේ නායකත්වයෙන් යුත් නවසීලන්ත සංචිතයේ වෙනස්කම් 3ක් සිදුව තිබේ. ඒ අනුව ආබාධයන්ට ලක්වූ කඩුලු රකින ක්‍රීඩිකා ඉසබෙලා ගේස්, වේග පන්දු යවන ක්‍රීඩිකා හේලි ජෙන්සන් සහ පිතිකාරිනී බෙලා ජෙම්ස් වෙනුවට කඩුලු රකින ක්‍රීඩිකා පොලි ඉන්ග්ලිස්, වමත් වේග පන්දු යවන බ්‍රී ඉලිං සහ තුන් ඉරියව් ක්‍රීඩිකා ෆ්ලෝරා ඩෙවොන්ෂයර් සංචිතයට එක්කර තිබේ. මේ ක්‍රීඩිකාවන් තිදෙනාම ජගත් විස්සයි20 තරග වරම් ලබා නැති අතර, පොලි සහ බ්‍රී ශ්‍රී ලංකාවට එරෙහි එක්දින තරගාවලියේ ජගත් තරග වරම් ලැබූහ.

මේ දෙපිල විස්සයි20 ද්වීපාර්ශ්වික තරගාවලියකින් හමුවන තෙවැනි අවස්ථාව මෙය වන අතර, මින් පෙර 2015 සහ 2023 තරගාවලි ද්විත්වයම ජය ගත්තේ නවසීලන්තයයි.

විස්සයි20 තරග 14කින් දෙපිල හමුවෙද්දී ශ්‍රී ලංකාව පළමු සහ එකම ජය වාර්තා කර ඇත්තේ 2023 වසරේ ජූලි 12 වැනිදා කොළඹ පී. සරා ඕවල් ක්‍රීඩාංගණයේදීය. සෙසු තරග 13ම ජය ගැනීමට නවසීලන්තය සමත්ව තිබේ. එබැවින් ශ්‍රී ලංකාව ඓතිහාසික ජයග්‍රහණයක් කරා ගෙන යෑමේ අවස්ථාව චමරි අතපත්තු ප්‍රමුඛ කණ්ඩායමට උදාවී තිබේ. දෙපිල අතර දෙවැනි විස්සයි20 තරගය මේ ඉරිදා (16) දිවා තරගයක් ලෙස ක්‍රයිස්චර්ච්හිදීම පැවැත්වේ.

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT