බදුල්ල තල්දෙන බදුලු ඔයේ සහ මහියංගණ මාර්ගයේ බෝක්කුවක් යට අබිරහස් ලෙස මියගොස් සිටි නාඳුනන පුද්ගලයන් දෙදෙනකුගේ මළ සිරුරු දෙකක් ඊයේ (13) පස්වරුවේ සොයා ගත් බව බදුල්ල පොලීසිය පවසයි. මේ මළ සිරුරු දෙක සොයා ගන්නා විට බෙහෙවින් නරක් වී දුගඳ හමමින් තිබූ බවද පොලීසිය කීය. තල්දෙන බෝලියද්ද මල්වත්ත ප්‍රදේශයේ බදුලු ඔයේ දෙල්ගහයට වැලි තොටුපොළේ වැලි ගොඩ දමමින් සිටි පුද්ගලයකු එක් මළ සිරුරක් දැක ඇති බව ද පොලීසිය සඳහන් කරයි. බදුලු ඔයේ ගසාගෙන ආ විශාල දැව කොටයක සිරවී මුනින් අතට හැරී තිබූ මළ සිරුරක් නිර්වස්ත්‍රව, නරක් වී පණුවන් ගසා දුගඳ හමමින් තිබූ බවත් එය හඳුනා ගැනීමට නොහැකි පරිදි විනාශ වී ඇති බවත් පොලීසිය පැවසීය. බදුල්ල පොලීසියේ නිලධාරින් සහ බෝලියද්ද වසම් භාර ග්‍රාම නිලධාරී චමින්ද ජයවර්ධන මහතා පාරුවක ආධාරයෙන් බදුලු ඔයෙන් එගොඩ වී ගොස් මළ සිරුර සම්බන්ධයෙන් පරීක්ෂණ පැවැත්වූහ. මේ අතර ඒ ස්ථානයේ සිට කිලෝමීටර් හතරක පමණ දුරකින් බදුල්ල මහියංගණ ප්‍රධාන මාර්ගයේ තල්දෙන 6 කණුව පුස්සැල්ලාව ප්‍රදේශයේ බෝක්කුවක් යට තිබූ අනෙක් නාඳුනන මළ සිරුරු ද ඒ අසල ලඳු කැලෑවට දර කැඩීමට යමින් සිටි අයකු දැක ලබා දුන් තොරතුරු මත සොයා ගත් බව පොලීසිය සඳහන් කළේය.
අබිරහස් ලෙස මියගොස් සිටි මේ පුද්ගලයන් දෙදෙනා මෙතෙක් හඳුනාගෙන නැති අතර ඔවුන් පිටපළාතක පදිංචි දෙදෙනකු බවට පොලීසිය සැක කරයි. මොවුන් දෙදෙනා කිසිවකු විසින් ඝාතනය කර මේ ස්ථානයට ගෙනවිත් දමන්නට ඇති බවට ද පොලීසිය සැක පළ කරයි.
බදුල්ල ජ්‍යෙෂ්ඨ පොලිස් අධිකාරි වසන්ත කන්දේවත්ත, පොලිස් අධිකාරි බුද්ධික ගුණසේකර මහත්වරුන්ගේ උපදෙස් මත බදුල්ල මූලස්ථාන ප්‍රධාන පොලිස් පරීක්ෂක ටී.එම්. රත්නායක, පොලිස් පරීක්ෂක බී.එම්. අබේපාල මහත්වරුන් ඇතුළු නිලධාරීහු වැඩිදුර පරීක්ෂණ පවත්වති.
