තම දරුවන් සමඟ 2025 වසරේදී පදිංචි වීමට ලොව හොඳම රට බවට ශ්‍රී ලංකාව පත්ව තිබේ.
ලෝකයේ ප්‍රමුඛ පෙළේ ව්‍යාපාරික සඟරාවක් වන CN Traveler විසින් සිදුකර තිබෙන ශ්‍රේණිගත කිරීමට අනුව ශ්‍රී ලංකාව එහි පළමු ස්ථානයට පැමිණ තිබෙන අතර තම පවුලත් සමඟ වෙනත් රටකට සංක්‍රමණය වීමේදී කරුණු රාශියක් සලකා බැලිය යුතු බවද එම සඟරාව පෙන්වා දී ඇත.
සංක්‍රමණය වන රටේ සංස්කෘතිය? රැකියාවක් සොයා ගැනීම කොතරම් පහසුද? ප්‍රවාහන සේවා? අදාළ රටේ ප්‍රදේශවාසීන්? අපේ ආරක්ෂාව? සෞඛ්‍ය සේවාව? අධ්‍යාපන පද්ධතිය ආදිය සම්බන්ධයෙන් අවධානය යෙමු කළ යුතු බව එම සඟරාව කියා සිටී.
රටකට පදිංචි වීමට යෑමේදී මේ කරුණු සම්බන්ධයෙන් අවධානය යොමු කරන අතර එම සාධක සියල්ල සම්පූර්ණ කළ රටක් ලෙස ශ්‍රී ලංකාව හඳුන්වා දී තිබේ.
ඒ අනුව මේ සෑම සාධකයක්ම සම්පූර්ණ රටක් ලෙස ශ්‍රී ලංකාව 2025 වසරේදී ලෝකයේ පවුල් සඳහා වඩාත්ම හිතකර රට ලෙස නම් කර ඇත. එලෙස නම්කර ඇත්තේ සුඛෝපභෝගී සංචාරක සඟරාවක් වන Conde’ Nast Traveler හි වාර්තාවකට අනුවයි. ලොව පුරා පරිශීලකයන්ට මුදල් යැවීමට උපකාර කරන අමෙරිකානු ප්‍රේෂණ සමාගමක් වන Remitly සමාගම, නැවත පදිංචි වීමට සලකා බලන අයට දැනුම් දීම සඳහා නිර්මාණය කර ඇති නව ආගමන දර්ශකයක් ක්‍රියාත්මක කර තිබේ.
2025 මාර්තු මාසයේදී නිකුත් කළ මේ වාර්තාව, සෞඛ්‍ය සේවා ගුණාත්මකභාවය සහ ආර්ථික ශක්තියේ සිට ආරක්ෂක මිනුම් සහ ඩිජිටල් සම්බන්ධතාව දක්වා සාධක 24ක් යටතේ රටවල් 82ක් ශ්‍රේණිගත කර තිබේ. ඒ සෑම සාධකයකම මුළු ලකුණු 100ක් ලබාදී ඇත.
මේ වාර්තාවට අනුව 2025 වසරේදී ලොව පවුල් සඳහා වඩාත්ම හිතකර රටවල් අතර ඉහළින්ම ඉන්නේ ශ්‍රී ලංකාවයි.
ශ්‍රී ලංකාව මෙවැනි ස්ථානයකට පත්වීම සඳහා මෙරට අධ්‍යාපන ක්‍රමය ආකර්ෂණීය ලකුණු (1.0 න් 0.7) ලබා ගත් අතර, වසරකට ඩොලර් 354.60ක අඩු වාර්ෂික ළමාරක්ෂක පිරිවැයක් ලබාගෙන තිබේ. අමෙරිකා එක්සත් ජනපද ඩොලර් 16,439.4ට සාපේක්ෂව, එය 10 වැනි ස්ථානයේ පසුවෙයි.
ශ්‍රී ලංකාවට අමතරව මෙම දර්ශකයට අනුව ස්වීඩනය, නෝර්වේ, නවසීලන්තය, අයිස්ලන්තය, ජර්මනිය, ෆින්ලන්තය, ඩෙන්මාර්කය, ඔස්ට්‍රේලියාව, අමෙරිකා එක්සත් ජනපදය පදිංචි වීමට ලොව සුදුසුම රටවල් අතර පසුවෙයි.
